ياسمين: طيب تنسِي الكورس خالص وتسيبي أي حاجة في إيدِك وتيجي تلحقيني حالًا!
"كنت هحكيلكُوا بس ياسمين قاطعتنِي، وده موضوع طويل وياسمين شكلها عملت مُصيبة ..إن شاءاللّٰه يسمح لنا الوقت وأحكيلكُوا في ظروف تانية أحسن."
غزل: ليه إيه حصل؟
ياسمين: الدُولاب متبهـ... لأ الأوضة كلها متبهدلة وعبارة عن هدُوم فوق وتحت ويمين وشمال وفي كُل مكان وأنا مش عارفة ألبِس إيه، مفيش حاجة عجبانِي ومش عارفة أختار إيه، هقابلهُم إزاي!!
"كانت بتتكلم بِـتوتُر وعصبية من بداية المُكالمة بحاول أعرف سببهُم."
غزل: ليه أنتِ رايحه فين، وتقابلي مين؟
ياسمين: عزيز وعيلتُه!
"وقفت ثواني في مكاني أفتكر النهاردة يوم إيه في أيام الإسبُوع."
غزل: هُما مش كانُوا جايين بُـكرة يَـ بنتي؟
ياسمين: المفروض آه.
غزل: أومال في إيه، إيه اللِ إتغيّر؟
"ردِت بِـعصبية ونبرة صوت عاليه.."
ياسمين: معرفش يَـ غزل معرفش، أنا لقيت بابا بيقولِ لي إنهُم كلِّمُوه وقالولُه جايين النهاردة بليل وهوَّ قال لهُم يتفضلُوا ولا ينوَّرُوا ولا مش عارفة إيه، وببعت لِـعزيز مش بيرُد عليا ..مفهمنيش ومقالِّيش حاجة!
السؤال هِنا ..بابا وافِق وفاجئنِي ليه؟ والسؤال الأهم أنا هلبِس إيه وهعمل إيه في ساعتين يعني؟
غزل: طيب إهدِي بس .. النهاردة من بُـكرة مفرقش حاجة يَـ ياسمين.
ياسمين: لأ فرق، أنا لسه مش مُستعِدة وبطني بتوجعنِي ومتوترة ومش عارفة هلبِس إيه!
"حاولت مضحكش علشان متشتمنيش بس هي كُل مُشكلتها دلوقتِ هتلبِس إيه."
غزل: يَـ بنتي متقلقيش نُص ساعة وهتلاقينِي عندِك نشُوف هتلبسي إيه وأمكيچِك وأظبطِك، وهتطلعي أحلى عرُوسة كده كده بس إهدِي.
ياسمين: نُص ساعة؟ كتير.. نُص ساعة كتير يَـ غزل، هُما 10 دقايق ولو تقدري تخليهُم 5 بس إعملي كده.
"ياربي على الهبل اللِ إحنا فِيه، إزاي واحدة مجنُونة كده هتبقىٰ عرُوسة بجد!"
… … … … … …
ياسمين: ألبِس حاجة رقيقة وهاديه ولا جريئة ومُلفِته؟ شيك وإيلجنت ولا مُريحه وعاديه؟!
"سكتت ثانية وكمِلت.."
ياسمين: دريس؟ دريس ولا ميني دريس ..سادة ولا منقوش؟ لأ چيبه ..چيبه واسعه ولا صَك؟ چيبه ولا بنطلون! بلُوزه؟ ألبِس چامب سوت! غزل عندِك عبايه سوده هناك هاتيها.
"سكتت دقيقتين تبُصلي وأنا واقفه بنسَق الاكساسوريز، وكمِلت تاني.."
ياسمين: آه والألوان! هلبس إسود.. الإسود ملِك الألوان، لأ بس البينك جميل وزاهي، الرُصاصي مُحايِّد، والزيتِي مُناسِب، والأحمر خطير، بس الأبيض مُبهِج، لكن الأصفر مُتفائل، والبنفسجي مش تقليدي، بس الأزرق يخُض واللبنِي هادي، والأورنچ.. لأ معنديش حاجة أورنچ، بس عندي بُني يَـ غزل والبُني حـ...
"قاطعتها فجأة بِـزعيق.."
غزل: غزل صدعِت! بس بقىٰ بس.
ياسمين: أيوه مَ...
غزل: هِششش ولا حرف.
"حطيت صابعي قدام بؤقي وأنا بقول لها كده.. علامة على قفل بؤقها يعني زي مَ بنتعامِل مع الأطفال، عشان دي كده واحدة لم تتجاوز السبع سنوات!
عدى 5 دقايق كاملين من غير مَ تتكلم وده لوحدُه هدُوء - لم ينعم بِه هذا البيت منذ الصباح - لازم نشكُر ربنا عليه، رُوحت وقفت قدامها بعد مَ خلصت إختيار وتنسيق 4 out fits سيبتلها حُرية الإختيار بينهُم، مديتلها إيدي بِـأول واحد وأنا بقول.."
غزل: شُوفي ده كده.
"مسكِت البلُوزه.. بصيتلها ورجعت بصيتلي وقالت.."
ياسمين: بلُوزه حمره؟ هلبسلهُم أحمر يَـ غزل! أول مرة هيشُوفونِي يشُوفونِي بِـ أحمر؟!
غزل: إيه حرام! الأحمر بقى عيب؟
ياسمين: لأ مينفعش، أنا مش هلبس أحمر.
"حدفت أول أوتفيت على السرير وأنا بقول لها.."
غزل: متلبسيش أحمر، شُوفي التاني ده.
"بصِّت على الأوتفيت التاني وقالتلي.."
ياسمين: إيه لُون الشاي بِـلبن ده! ألبس بيچ ليه؟
غزل: مالُه!
ياسمين: مبحبهُوش، أصلًا مبيطلعش حِلو عليا.
"إتنهِدت وقولتلها.."
غزل: حاضر يَـ ياسمين متحبيهُوش.
"وحطيتُه جمب الأول.. محسسانِي إن دي مش هدُومها!
ملحقتش أتكلِم المرة دي وأول لما شافِت الأوت فيت التالت شهقت وقالت.."
ياسمين: ترتِر ؟! هدخُل عليهُم بِـ توب فِيه ترتر؟ هو أنا رايحه فرح يَـ غزل! وده ألبِس عليه إكساسوريز إيه؟ صاجات!
"هو بعيدًا عن إنُه مش ترتر أوڤر أبدًا.. بسيط خالص أبسط من الضجّه اللِ عملتها دي وإنُه كان هيتلبِس عليه كارديچان مش هيظهرُه، بس أنا أجيب مين يقنعها إن الهدُوم دي جايباها من دُولابها؟"
غزل: يارب الصبر من عندَك! شُوفي الأوت فيت الأخير يَـ ياسمين خلينا نخلَص.
ياسمين: هو فين؟
غزل: مَ أهو يَـ بنتي!
ياسمين: الدريس ده؟
غزل: أيوه.
ياسمين: أنا هلبِس الدريس اللِ في إيدِك ده بس!!
"أنا لو بدِيلها بيزك شفاف - بلاش أقول حاجة تانية - مش هتبُصلي البصَّه دي، بس علشان أنا زهقت ومعدش قدامنا وقت فَ زي مَ قالت أم كلثوم لِـ الصبر حدُود."
غزل: قومي قيسيه.
ياسمين: لأ أنا مش هلبِس ده.
"حاولت أحافظ على هدُوئي وثباتي وأنا بقول لها.."
غزل: قومي يَـ ياسمين وريهُوني عليكِ.
ياسمين: لأ هيطلع شكلُه وحش واللهِ أنا مش عايزاه و...
"قاطعتها بِـعصبية إتخضِت منها وقلت.."
غزل: قومي إتنيلي جربيه الناس قربُوا يوصلُوا!
"الجُملة الأخيرة كانت كفيلة تخليها تقوم تلبِس الترتر اللِ مش عاجبها، بتعامِل مع طفلة ياربي! ده واللهِ أوقات البنات بيطلع منهُم حاجات غريبة بجد.
