غزل: إدخُلي في الموضُوع علطُول.
"ردِّت بِـإستهبال.."
ياسمين: موضُوع إيه؟
"رَديت بِـتريقة.."
غزل: الموضوع المُهم خالص خالص خالص.
ياسمين: أنا قلت موضُوع مُهم! أنا في مواضيع مُهمة في حياتي أصلًا؟ ده أنا تافهه يَـ غزل.
غزل: دقيقتين كمان وهقوم أمشِي.
ياسمين: هو علِّمك الخُلق الضيَّق زيُّه؟
غزل: معلمنيش لا ضيَّق ولا واسِع وملكيش دعوة بِيه وبينَا دلوقتِ وخلينا فيكِ وفي موضُوعِك.
"بتحاوِّل تتوِّه في الموضوع وتلِف وتدُور فَ قالتلي.."
ياسمين: إيه ده بتغييـري عليه منِّي أنا كمان ولا إيه؟
"زهقت فَ قولتلها بِـعصبية.."
غزل: ياسمين! في إيه؟
"إتخضِّت فَ ردِّت بسرعة في نفس الثانية.."
ياسمين: كلمنِّي وعايز يجي وأنا مش عارفه أعمل إيه!
"سكتّ دقيقة أستوعِب وسألتها.."
غزل: هو مين؟ و يجي فين!
ياسمين: يجي هِنا.
غزل: هِنا إزاي؟
ياسمين: هِنا ..هِنا في البيت.
غزل: يجي يعمِل إيه في البيت؟
ياسمين: هَيشتري البيت.
غزل: بيت مين!
"ردِّت بِـعصبية.."
ياسمين: هيجي ليه غير عشان يتقدملِي! إنتِ غبية ليه يَـ غزل؟
غزل: يتقدملّك! اللّٰه عندنا فرح.
ياسمين: واللهِ العظيم مَ ناقصه هبل، هو الموضُوع مُتخلِف لوحدُه.
غزل: أنتِ اللِ مُتخلفة، هو قال لِك تتجوِّزُوا عُرفي! ده بيقول عايز يجي عشان يتقدِّم ويطلُب إيدك، يعني هيدخُل البيت من بابُه بِـكل إحترام.
ياسمين: أيوه مَ هي دي المُشكلة!
غزل: الإحترام؟
ياسمين: لأ، يدخُل البيت من بابُه دي.
غزل: كنتِ عايزاه يجي من الشباك ولا إيه مش فاهمة!
"إتنهِدت وقالتلِي.."
ياسمين: غزل ..مفيش حد يعرف حاجة غيرك أنتِ وأحلام وإتنين صُحابي في السكن هناك، هقول لهُم إيه هِنا ولا هجيبهالهُم إزاي!
غزل: امممم فهمت.
"فِضلنا ساكتين شوية بنفكر في حل، ومرة واحدة رُوحت قايلَه من غير مَ أفكر.."
غزل: نقول لِـ آدم!
ياسمين: يختااااييي ده أنا مش خايفة غير من آدم!
"عندها حق واللهِ، أنا لو كنت أخدت 10 ثواني بس تفكير مكُنتش هقترح الإقتراح ده."
غزل: نقول لهُم أخو واحدة صاحبتِك وهيَّ اللِ جايبهُولِك.
ياسمين: بعيدًا عن نُقطة صاحبتي مين اللِ عايشه في أخِر الكوكب دي! بس خليني ماشيَّه معاكِ وفرضنا إني نفذت الإقتراح ده، هو مش المفروض إن أختُه اللِ هيَّ صاحبتي دي هتيجي معاه يَـ أذكىٰ إخواتِك؟
غزل: آه.
ياسمين: آه في عينِك يَـ غزل! هتيجي إزاي وهوَّ معندهُوش إخوات بنات أصلًا؟
غزل: نستنىٰ 9 شهور ونقول لِـطنط مامتُه تخلِفلُه أخت بنت.
ياسمين: طَب وليه نستنىٰ 9 شهور؟ مَ يجيبهَا من السوبر ماركت أسرع وأسهل.
غزل: واللهِ لو الـ up date ده نزل في السوبر ماركتس عندهُم فَ قوليلُه يعمِل كده.
ياسمين: غزل قومي روَّحي، أنا آسفه واللهِ عشان فكرت فيكِ تيجي تفكري معايا.
غزل: خلاص سيبِك منِي وقولي أنتِ نعمل إيه؟
ياسمين: مَ أنا لو أعرف مكنش زماني قاعده معاكِ القاعده دي دلوقتِ.
"قالت كده وتنهّدت بِـقلة حيله، فَ تنهدت أنا كمان وحطيت إيدي على خدِي بِـزهَق.. لما نشُوف أخر قاعدة المُطلقات دي هترسىٰ على إيه."
غزل: طَب نقول لهُم شافِك وعجبتيه فَ طلب رقم باباكِ؟
ياسمين: في واحد عاقِل بيرُوح يتقدِّم لِـواحدة عشان شافها بس وعجبتُه؟
غزل: واللهِ فِيه، مش منطقي بس موجُود.
ياسمين: مش مُبرر ومش هتبقى كذبة مُقنعة ليهُم.
غزل: ياسمين هو أنتِ ربنا خلقِك عشان تعترضِي على أفكاري بس؟
ياسمين: مَ أنتِ لو تفكري قبل مَ تقولي أفكارك دي مش هتقوليهَا خالص فَ مش هعترض عليها.
"بصيتلها بِـعصبية ورجعت أبُص لِـ السقف تاني لعل وعسى ألاقي حلّ!"
غزل: ياسمين بُصي بقى ..
"لما جبت أخري وزهقت قومت قعدت بِـشكل مُستقيم وبصيتلهَا وأنا بتكلِم بِـجديه شديدة وأقول.."
غزل: إحنا مبنعرفش نكذب ..إحنا أساسًا مينفعش نكذب لإن الكذبة دلوقتِ أو بعدين هتتكشف، ووقتها الأمور مُمكن تتعقد ويرفضُوا الموضوع وتحصل حاجات مش حابِّينهَا لإن مَ بُنيَّ على باطِل فَ هو باطِل، فَ مفيش قدامنا غير حل واحد.
"سألت بِـ إهتمام.."
ياسمين: إيه هو؟
غزل: آدم.. وإسمعيني بس كده قبل مَ تمارسِي هوايتِك المُفضلة وتعترضي، مين اللِ أقنع عمُو حُسام باباكِ بِـموضوع السفر والسكن في مُحافظة تانية بعد مَ كان مش موافِق؟
ياسمين: آدم.
غزل: حِلو، ومين اللِ أقنع أخوكِ إنُه يدخُل الكُلية اللِ دخلها وإتخرج منها وبيشتغل شغل بسببها كويس وناجِح في حياتُه ماشاء اللّٰه بعد مَ كان رافض رفض تام؟
ياسمين: آدم.
غزل: جميل، ومين اللِ بيقنِع مامتي ومامتِك بِـ أي جِنان عايزين نعملُه سوى بعد مَ بيكونوا مُعترضين؟
ياسمين: آدم.
غزل: كويس، مين بقىٰ اللِ إتكلِم مع ماما من كام شهر وأقنعها تلغِي حوار العريس بعد مَ كُلنا فشلنا في الأصرار عليها؟
"تنهدت وقالت.."
ياسمين: آدم.
غزل: ومين الوحيد اللِ مُمكن يساعدنا دلوقتِ ويبقى عندُه القدرة على إقناع عمو وطنط؟ آدم ..بس علشان آدم يقنعهُم لازم إحنا نقنعُه الأول.
ياسمين: ودي أصعب.
غزل: للأسف آه.
ياسمين: قولي لِـنفسِك.
غزل: بس مش مُستحيلة يَـ ياسمين.
ياسمين: يَـ غزل بجد مش هينفع ولا هـ...
غزل: نجرب ..مش هنخسر حاجة!
ياسمين: ....
غزل: ها؟
"قالت بِـتردُد.."
ياسمين: طَب ..طَب مين هيقول لُه؟
غزل: إحنا الإتنين
