= أومال بتزنِّي وتصحينِي من النُوم ليه؟
- عشان عايزة أسألَك سؤال واحد بس.
= سؤال إيه!
- إنتَ مبتشتغلش فوتوجرافر ليه؟!
= !!!
- مش بتجيب كاميرا وتمتهِن المهنة دي ليه؟
= يعني أنا سمعت صح في الأول؟
- آه.
= غزل أنتِ مِتصله بيَّا الساعة ... هي الساعة كام؟
- 3 ونُص.
= مِتصله بيا الساعة 3 ونُص الفجر عشان تقولي الهبل اللِ بتقوليه ده!!
- واللهِ مش هبل ولا حاجة، أصل بُص ..تعالى نفكر بِـالعقل ونتكلم بِـالمنطق و...
"قاطعنِي بِـعصبية طفيفة وقال.."
= وانتِ العقل والمنطق مبيشتغلُوش عندِك غير الساعة 3؟ مَ تقولي اللِ أنتِ عايزاه باقي اليوم.. حبَكِت الساعتين اللِ أنا نايم فيهُم يعني؟
- الحق عليا كنت بفكرلَك وأساعدك في التخطيط لِـمُستقبلَك.
= يَـ ستي هنتناقش ونتكلم ونخطط وأعمل لِك كل اللِ أنتِ عايزاه، بس ليه دلوقتِ!!
"سكتت كام ثانية أفكر وبعدين قولتلُه.."
- مش عارفة، بس الفِكرة أول لما نطِت في دماغي كلمتَك علطُول.
= أشتمِك ولا أدعي عليكِ؟
- قوم صلِّ الفجر وإدعيلي عشان صحيتَك تصلِّيه.
"فَ ضحك وقال لي.."
= إيه اللِ مصحيكِ لِحد دلوقتِ أصلًا؟ ده أنا قلت هتنامي يوم مُتواصِل بعد اللِ عملتُوه في الخطُوبة.
- ده أنا كنت جايَّه مَيته بجد.
= مَ أنا مش عارف إيه التهييس ده ولا كنتِ شاربه إيه!
- كُنت فرحانة، كنت مبسوطة علشانهُم خالص.
= أه صحيح ..هو كل اللِ كانُوا بيجُوا يسلِّمُوا علينا بيقولوا لنا عُقبالكُوا ليه ؟!
"فوق الـ 10 أشخاص ..اللِ يجي يسلِّم على إيمي يبُص عليا وأنا قاعده على يمينها ويبُص لِـ آدم اللِ قاعد على شمالها ويقولها عُقبالهُم، كل واحدة من صُحابي تُقف جمبي ولا تتكلِم معايا تقول لي عُقبالكُوا إنتوا كمان خلينا نخلَص منِك قريب، وفي ناس تانية لا نعرفهُم ولا يعرفُونا إفتكرُونا مخطُوبين، هو كلُه كان واخد بالُه إلّا أنا ؟! "
- مش عارفة، سيبَك منهُم.
= ماشي.
"ضحكت في سرِّي ومردتش فَ قال.."
= قومي إتوضِي يلا عشان تصلِّي الفجر وتنامِي.
- حاضر، وإنتَ كمان يلا عشان تلحق تنام شوية قبل مَ ترُوح شُغلَك.
= شُوف إزاي! دلوقتِ ألحق أنام عشان الشُغل؟
"ضحكت وحسيتُه إبتسم، وقال لي.."
= تصبحي على خِير.
- وإنتَ من أهلُه.
_________________________
|صارلِي مِدة عَم جرِّب
بدِي إحكيك
بشُوفك بهرُب بتلبَّك
بطَّلع فِيك
بخاف إذا قلتلَّك يصير بدَّك
تِبعُد عنِي |
"أنا بعمِل إيه؟ بسمع كلام ياسمين ..بلمَّح، كده بلمَّح ؟! آه، مَ هو حتى التلميح مش هلمَّحُه صريح متفتكرُوش غلط!
أنا عارفة إنُه في الأوضة جُوه وأنا واقفه في البلكُونة المُقابله لِـ الأوضة بِـالظبط، ومعنى إنُه مخرجش ومعلَّقش يبقى الأغنية دي لم تجذب انتباهُه ومفهمش، نجرب واحدة تانية عادي.."
| مَرأوا عليّا أيَّام
قلت لِـحالي
خلَص الحُب كلُّه خيال ..
كلُّه أحلام
وفجأة طِلعت إنتَ مَ بعرف مِن وين
وبلَّش ها القلب يدُّق
ويكتُب غرام
وبالي مشغُول فِيك
لا عاد أعرف آكُل ولا نَام |
