لكل عراقي قصته

الرابـع |

لـ : بُـن الريـامي
                   ¯¯¯¯¯¯¯¯¯¯¯¯¯¯¯¯
هديـل تگول لـ اخوهـا :
ما حسبك اخو ولا حاطها ببالي
مايدرون بيك انتَ النفـس مالي
مايدرون باللحظـة احجي بيك اسبوع
يدرون من اضيعـك دمعتي تلالي
لـ علي الشيخ
__________________________________
كُميل /
چانت تحجي بخوف وصوتها بي رجفة وتبجي حيل
:والقران اشرد والله العظيم .. يي ببيت صديقتي وما اكُلك وين شنو حتى تجيني تاخذني ونبي احرك نفسي.. ونبي اذا تجبرني  احرك نفسي كاافي تعبت تعبت حسو بيه.. مااريدك لك مااريد اني كافي عيب عل.

سكتت من سمعت هديل تصيحلي ع الغدة ونهت المكالمة عاد اني ابتعدت للمطبخ
هديل : يلا وينك صدُك چذب
كُميل : ها شنو شبيج
هديل :حبيبي هذا الغدة وعوفه لتغسل المواعين كُلشي لتسوي اني موجودة
كُميل :روحي يم البنيات بابا شوفيهم

دَاكل وبالي يم هاي البنية منو ديجبرها وشبيها هلكد تبجي وليش متريد تگول مكان البيت ماحسيت غير اني ناسف الماعون نسف
عاد كمت غسلت المواعين وسويت جاي وكعدت اگلب بالفون علما يخدر.. وشفت رجلين دتنزل من الدرج.. اخذت الچاي مالتي وطفرت للاستقبال بقيت كاعد لحدما صارت بالاربعة صعدت لغرفتي.. طلعت قميص اسود وبنطرون قماش رصاصي وكويتهم ورحت اسبح علما يبردون.. بدلت وعدلت شعري ولحيتي لبست ساعتي واسواري وخليت عطري ونزلت للحجية
حسنة :يُمة صلوات على النبي شطالع عين الله عليك
كُميل :بعد روحي حجية شلابس هو بنطرون وقميص
حسنة :يمة تشبه ابوك الله يرحمه مثل شياكته واناقته
كُميل :الف رحمة على روحهم.. حجية انتِ شطالعة چنج گلوب ضاوي.. شو بالله خدودج خلي ابوسهم.. افيييش افيييش  ينوكلن ينوكلن يامحمد
حسنة :بعد روحي يحفظك ربي ولايحرمنا منك
كُميل :ولا يحرمنا منج حبيبتي
حسنة :يمة تعال هنا
كُميل :حجية مادام تعال هنا يعني سالفة بيها زواجي.. لتخليني اعوفج واطلع
حسنة :خايب كميّل وعلي خوش بت يرتاحلها گلبك
كُميل :لا يمة مااريد فدوة لاتجبريني ولا تلحين علي
حسنة :خايب يالاغبر وعلي تتفوت لاتضيعها من ايدك..ولك يمة وقار اخت عويّز صويحبك ولك شلونها وعلي تنحط ع جرح يطيب فدوة لگلبها
كُميل :لاتخليني اسب ابو عويّز حجية مااريد

عاد الحجية صارت اعصاب وبدت تصيح
حسنة :هاي لان خوش بنية انتَ ماتدور هيجي تدور بس گح** انت وجماعتك الخرطي 
صحت بوجها باعصاب :يي حجية اني ادور گح** ديلا روحي دوريلي
عاد هي رفعت ايدها وغمتني.. عفتها وطلعت للطرمة وطلعت جكايري.. اهل الولد يجون بالخمسة ونص گالي.. وهسه بالاربعة ونص.. ردت اخذ السيارة واطلع بس شفتها اجتني مكسورة خاطر 
حسنة :ولك تزعل مني يبو عويّن تزعل من امك
عاد ماتحملت رحت بس راسها
كُميل :حجية اني ازعل منچ ؟ ازعل من روحي وماازعل منج .. بس فدواتچ موضوع الزواج لاتفتحي بعد
حسنة :يمة چا مو عمرك وصل 32 چا شوكت بعد روحي حتى بعد محد تقبل بيك
كُميل :خليني حجية ، مادام باقي ووياج وويه هديل ميخالف خلي لايقبلن بيه ، عوفيني هيجي اذا تردين راحتي
حسنة :بكيفك بعد
چان تنزل هديل روح ابوها هي شطالعة صلوات ع النبي تخبل.. والبنات نزلو وراها
هديل مدنكة بحياء :شلوني
نور :ديلا بالله عود سوت نفسها تستحي
هديل :غضب الله فوك راسج ينويّر حتى مخليتيني اعيش اللحظة
كلها ضحكت
حسنة :صلوات ع النبي يبيبي يحفظج الله من كل عين حبيبة.. تجننين وعلي
اجتي عليه بست راسها
كُميل بغصة :مو جديدة عليج بنيتي دومج تخبلين روح ابوج انتِ
هديل :حبيبي انتَ
دارت وجهها ع البنات وأشرت عليهم
هديل :حبيبي هاي نور صديقتي وهاي وقار اخت مُعتز وهاي لِقاء بنت الدكتور صباح .. بنات هذا كُميل اخوية
واني اكول وين شايفها من اجت لهديل العصر اتفاجأت طلعت لِقاء نفس البنية الشفتها بالحادث چنت شاك وهسه اتأكدت ، والدكتور صباح طلع ابوها
كُميل :اهلاً وسهلاً خوية
البنات: اهلاً بيك
كُميل :شلونچ خوية وقار  ، اعرف عند عويّز  اخت يخوية وگال صديقة هديل اتشرفت بيج .. الحيوان محتاجه اليوم ويايه بس حرامات منازل
وقار:اني اعرفك ، الي الشرف ، مادري والله ع اساس اليوم ينزل بس شو ماكو
كُميل :يلا ع غير مرة ان شاء الله الجايات هواية
بقو البنات كاعدين بالهول واني صعدت لغرفتي ونبهتهم يشوفوهم بالكاميرا من يجون يصيحولي
عاد سمعت أصواتهن خبصن الدنيا كُلش حبيت جمعتهن حسيتهن صدك اخوات هديل.. منتبهات على كلشي وعينهن عليها ووياها وياها بكل خطوة.. حتى من اجوي يكمزن ويصيحن اجو خبصن الدنيا
اني سويت الدرج بايتين.. نزلت عدلت شعري ع السريع بباب المطبخ وطلعت استقبلهم.. جايين 6 ولد وثلاث نسوان.
سلمت عليهم ودخلو والنسوان استقبلتهم الحجية بباب الاستقبال.. الاستقبال صاير على نصين تقريباً لان چبير كُلش.. الباب يصير بنص وبكُل جهة منه استقبال.. كعدت اني والولد بجهة والنسوان والحجية بجهة
صارت بينا اسوالف عادية والحجية اندمجت ويه النسوان اسولف لحدما دخلت هديل شايلة الضيافة متوترة وخايفة وكُلش مستحية.. واني اشوف عين هذا الولد حسين مانزلت منها لهفته عليها واضحة كُلش للحظة اجيت اگوم افگس عيونه.. انطت النسوان وكمت اخذت منها ضيّفت الزلم.. راحت كعدت يم الحجية وبدت المرة تسولف وياها والحجية ساكتة ومبتسمة وهديل عينها بالكاع مارفعتها.. لحدما شفت وجه بيبي اتغيرت ملامحه واتوترت عاد عرفت هنا انو سألو على اهلي
الولد يسولفون ويايه واني بالي مو يمهم حتى مااعرف شحجي ، ورة مادخلت هديل خفت عليها كُلش شوية وكامت هديل والحجية صاحتني يم النسوان وشاورتني بس خايفة الحجية ووضعها مايطمن كلش
حسنة :سألت الولد على اهله
كُميل :لا بعدني ، ليش
حسنة :ها لا ماكو شي بس لازم تسأله غير نشوفه منين ما منين.
كُميل :اكيد حجية لازم..بس ماانفتح موضوعه سولفنا اسوالف عامة
حسنة :ميخالف ييمة
رجعت للولد وهم نفس وضعهم
كُميل :يي خوية سولفلي انتَ منين ما منين ياعشيرة ياعمام
شو سألت هيجي والولد غص انتهى ويدكون على ظهره الشباب وانخبصنا بي شوية ورجع زين
حسين :اححم.. اني ح. حسين كاظم حبيب اني.
كُميل بتردد وتوتر :كاظم حبيب؟اكدر اعرف والدك شيشتغل
ابراهيم :احم.. والدي منفصل عن والدتي من مدة طويلة.. والدي چان مدير شركة معروفة سابقاً
كُميل :اكدر اعرف اسم الشركة
ابراهيم سكت ودنك
حسين : شركة ***  للتصاميـم المعماريـة الهندسيـة
حسيت هنا انضربت على راسي.. دخت دوخة قوية وبعد ماحسيت بشي غير واني واسمع صوت فوك راسي وبقيت مغمض عيوني
ابراهيم :غيـر تگول اسم ابوها شاكر سعد
حسين :واذا اسم ابوها شاكر سعد.. شبيك ابراهيم شكو.. صاير شي اني مااعرفه
ابراهيم:لا ماكو.. اني راح اروح ابقى يمه انتَ والولد
راح اخو حسين وحسين طلع برا.. فتحت عيوني اني بالمستشفى واكو مغذي مشكلي بيدي واحس جسمي نحلان كلش مابيه افتح عيوني .. كعدت شلعت المغذي وشلت الكانونة بعدم مبالاة وايدي بدت تنزف مااهتميت الها شفت اكو باكيت كلنكس ع الميز اليم راسي جريت مجموعة وسديت بيها ايدي وطلعت بالگوة امشي.. شافني حسين اجاني ركض
حسين :وين وين خوية هاي شسويت
دنكت على اذن حسين وگلت :انعل والدي ليجي لبيتي بعد فهمت لو لا
عفته ومشيت 
حسين صفن وصاح :ليش غير افهم
درت علي
كُميل :اسال اخوك
عفته وطلعت من المستشفى حتى ماسجلت خروج خلي هم يحيرون
اخذت تكسي ورجعت للبيت شفت النسوان بعدهم بالبيت ويمهم الحجية تبجي وهديل كاعدة بباب المطبخ تبجي والبنات يمها
شافتني هديل دخلت اجت عليه ركضت وحضنتني
هديل :شبيك حبيبي خوفتنا عليك
همست بصوت شبه رايح :هديل متتزوجين
هديل مسحت دموعها وهزت راسها سريع بمعنى لا هديل :مااتزوج والله مااتزوج مااعوفك.. بس كول شبيك ليش اتخربطت
وگفت بباب الاستقبال.. شهكت الحجية واجت تركض عليه
حسنة :يمة ابو عوين فدوة روحي لروحك..ولك يمة ريت المرض بيه ولا بيك بعد رويحتي
سُهيل :اسم الله عليج رويحت ابو عون
بستها من راسها ورفعت عيني للنسوان..
كُميل :حجية كلي لولدج انعل ابوهم اذا لمحتهم بشارعنا مو بس يم بيتي.. وهسه اتفضلو يلا اخذو راحتكم
ام حسين مدنكة فشلانة حسيتها بس النسوان البقية متعجبات عدلن عبيهن وطلعن
الحجية بحظني من جهة وهديل من الجهة الثانية
نور :ع. عزا كُ. كُميل هاي ايدك دتنزف
شهكت الحجية وهديل كامت ترجف وتصيح وين وين
وقار :هديل وين الصيدلية مالتكم
هديل شافت ايدي مليانة دم فتحت عيونه حيل واتجمدت
لقاء : الصيدلية وين بسرعة
كُميل بنحول وصوت شبه مختفي: بالكاونتر يم علبة الخياطة
راحت لِقاء ركضت تجيبها
وقار:نور اخذي هديل دخليها جوة.. وحجية عينيني نمشي كُميل لجوة.. صيري قوية فدوة
كُميل بنفس حاله:مابيه شي اني امشي
الحجية لزمتني واني مثل السكران.. ايدي دمرت الكاع بالدم رحت كعدت ع التخم بعد مااحس بشي اغمى عليه
لًقاء / رحت اجيب الصيدلية من الكاونتر.. هديل شافت اخوها انصدمت نريدها تتحرك ماكو وبيبي حالها مو احسن من هديل باقية تبجي وتنوح ونور كُلش تخاف من الدم لموقف صار وياها همات انصدمت... عاد وقار صاحت بيها اخذت هديل وصعدت لغرفتها.. وقار رادت تساعد كُميل لان يمشي ويتعثر اعتقد بسبب النزف ضغطه كُلش هبط بس هو مقبل ولمحته دخل وحده..داصعد ع الكرسي اخذها واسمع بيبي شهكت وتصيح ع كُميل عاد اني اخذتها وركضت بسرعة
لِقاء :بيبي لتخافين مابي شي فدوة على كيفج.. وقااار لج الحكي ع بيبي
وقار راحت ركضتلها وكعدتها وجابتلها مي.. واني شديت ايده بالشاش وخابرت بابا حتى يجي بسرعة وهو گال مسافة الطريق ويمكم.. لمحت هديل كاعدة ع الدرج وفاتحة عيونها حيل وترجف وجها اصفر وحلكها ابيض ركضت عليها ونسيت كُميل حظنت وجها بين ايديّ
لقاء :هُدهُدي اسمعيني اُمي شو باوعيلي مابي شي والله مابي شو باوعيلي 
هديل : حيع. حيعوفني م. م. مثل معافوني ب. بابا وماما
تحجي وتشهك وترجف
لقاء: اُمي انتِ والله مابي شي فدوة لعيونچ خابرت بابا هسه يجي يشوفه..
عاد هي سمعت هيجي ونفجرت بالبچي اني ارتاحيت شوية لان فكت صدمتها
هديل :فدوة ساعدوه والله مااكدر بدونه ابوية هو لولو مااكدر بدونه فدوة
حظنتها وبقت تبچي لحدما سمعت بابا يصيحلي ركضنا اثنينا من الدرج
صباح: باباتي وينه ابو عون
لِقاء :يا ابو عون بابا.. هذا كُميل.. كُميل متخربط بالهول جوه
عافني بابا وركض علي.. جايب ويا مُغذي وشغلاته كُلهم
صباح: حجية والله مابي شي.. بس لازم اخذه للمُستشفى نجيكه ويحتاج دم.. ليبقى بالكم
شوية ودخلو اخوان وقار اثنينهم  ، واحد منهم بالزي العكسري مالته 
الشباب : السلام عليكم
الكل: وعليكم السلام
مُعتز :شبي دكتور.. شبي ابو عون فدوة لتهد حيلي
صباح :بابا مُعتز امير تعالو ويايه نشيله للسيارة
امير :عوفه حجي وخر.. مُعتز يلا
شالوه ونقلوه لسيارة مُعتز.. مُعتز يسوق وامير كاعد ومخلي راس كُميل بحظنه
حسنة: دكتور اني اجي وياكم
صباح: لا حجية اكعدي بمكانج فدوة رحتلچ.. مابي شي والله
لقاء : بابا اني اجي وياك فدوة
صباح :يلا تعالي اصعدي ويايه بالسيارة
رحت لبست صاية من هديل بسرعة فوك ملابسي لان ملابسي صارت بيها دم وعدلت شالي ونعال  هديل وركضت بسرعة
صاحت بيبي وراية
حسنة: لولوة يبيبي ديربالج على وليدي.. امانة يمچ يمة
صباح :لتخافين حجية ماكو شي
لقاء :بعيوني بيبي
بابا خابر للمُستشفى حتى يحظرون سدية.. ويحظرون الطوارئ  .. وصلنا ولگينا الشباب كدامنا اجوي الممرضين وشالو بالسدية واحنه نركض.. مخليت ايـة مقريتها
اكـو دُعاء ماما دائماً تقراه من تدخل عمليات فعلمتني علي للشدائد وللشفاء ولتسهيل كُل امر مستصعب
"اللهم يارب المعجزات وقاضي الحاجات يامجيب الدعاء ، اللهم ارزقني فرحـة شافيـة مدهشة كافيـة يعجز قلبي عن تصورها ويتلعثم لساني عن شكرها بشفاء كُميل شاكر شفاءاً عاجلا يارب اللهم وانتَ المدبر العزيز القدير" وعفت بابا والشباب راحو ويه كُميل واني كعدت على كرسي  وطلعت موبايلي بقيت اقره سورة يـس كملتها ورحت وراهم شفته نايم بالغرفة ومشكليله بطل دم
صباح :رحم الله والديكم باباتي تسلمون.. بقى ابننا يمنا اخذو راحتكم بابا
مُعتز :لا حجي اني باقي.. ابو نور هذا عضيدي مااعوفه .. امير انتَ روح طمن البنات واخذ بنت الدكتور وياك
لقاء: لا اني مااروح
مُعتز : خوية شعندج هنا.. هوسة المُستشفى
لقاء :لا بيبي وصتني فدوة..
صباح:خليها تبقى
امير: ديربالكم علي.. ثيمالا
لقاء:بابا يصير ندخل يمة.. ع الاقل بس افتح ڨيديو لبيبي و للبنات يشوفوه
صباح :ميخالف.. اي شي يحتاج دزي علينا باباتي.. اني بغرفتي
مُعتز :خوية اني برا خاف يكعد
لقاء:تسلم ربي يحفظك
مدري لويش بس حسيت نفسي مسؤولة علي.. رحت كعدت يمه واتصلت كام على وقار
لقاء :وقار بيبي يمج
وقار :اوي عيني يكومه بالسلامة.. بلي حودي الها
شافته وكامت تبجي
حسنة :فدوة لروحي روحك وليدي يمة.. ولج يمة لولوة  شكالو علي
لقاء:بيبي حبيبتي مبي شي والله بس لان نزف خلوله بطل دم  هسه يصحه مثل الاسد يگوملكم
حسنة :سندنا هذا اذا يطيح كلنا نطيح.. بيه ولا بوليدي
لقاء:لا اسم الله حبيبي هم غير يتسندون بيج الخير والبركة انتِ
حسنة :بيبي مااوصيج علي ولو ادري ابو نور ميقصر بس ميخالف
لقاء :بعيوني.. ديربالكم على هديل فدوة.. وقار اريد احجي وياج عوفي بيبي ترتاح
وقار :وك عيني.. يلا بيبي اتمددي مادام صليتي
حسنة:يي يبيبي فدوة غديتلج
اتمددت بيبي ووقار طلعت برة
وقار:هـا لقلق
لقاء:يمامي فدوة نورسة بيها شي.. شوفيها عفية.. ديربالج عليها هي قبل حادث كُميل بيها شي انوب شافت الدم اتخربطت احوالها
وقار :لج شفتها بدون متكولين.. من تجين احجيلج.. كعدتهم يمي هي وهُدهُد وبيبي بوقت الصلاة وسكتتهم شوية صلو وقرو قرآن لشفائه وهسه نامو.. خطية حتى مقبلو ياكلون شي.. نور وهديل وحده حظنت الثانية ويبجون ونامو ع هالوضعية
لقاء :اووي ياعيني الله يساعدهم.. يلا روحي انتِ همات ارتاحي وبقي موبايلج يمج ترا اخابرلج
وقار :طمنيني عفية
لقاء :الله كريم
رحت غسلت من الحمامات مال غرفة الدم الي بايدي ولزمت فوني وقربت الكرسي و كعدت يم راسه اقره سورة النور وانوب سويت ختمة للامام المهدي الصلاة على محمد وآل محمد "1000 مرة" لشفائه
لازمة السبحة وشفته عقچ عيونه وبعدين فتحها
لقاء بابتسامة: الحمدالله ع السلامة خوفتنا عليك
كُميل بوهن وتعب :الله يسلمج.. اني وين
لقاء :بالمُستشفى عيني
كُميل :منو جابني
لقاء :الولد مُعتز وأمير اخوان وقار وبابا همات.. ومُعتز برا واگف ينتظرك تكعد باله يمك
كُميل :وانتِ لقاء مو
لقاء:بلي ، نفسي البنية الشفتها ويه عَمو ابو الخط
كُميل :كُل الهلا بيج بوية ، ليش ماراجعة يبوي
لقاء :بيبي وصتني عليك مكدرت اعوفك.. امانة من بيبي يمي
ابتسم بتعب وغمض عيونه : دايمة خوية
لقاء بابتسامة :من رخصتك خلي نروح نصيح دكتور صباح يچيكك ونجي
كُميل:ممنون
طلعت مُعتز شافني خطية اجه ركض عليه
لقاء بابتسامة:صحى ويريد يشوفك
راح يركضله بدون محجى حجاية واني رحت لغرفة بابا
كُميل/ كعدت لگيت نفسي بالمُستشفى مادري منو جابني وشوكت اجيت وشكد الوقت هسه بس الي اعرفه راسي مسطور ونحلان كُلش.. سمعت صوت رقيق ديتحمدلي بالسلامة درت عيني واشوفها صديقة هديل لقاء.. كاعدة قريب علي وبيدها السبحة ووجها تعبان..اتحمدتلي بأسلوب جداً رزن ومؤدب و كامت تصيح ابوها طلعت ودخل عليه مُعتز يركض.. مُعتز صديق روحي واخوي من قبل من چان ذوالفقار بالعراق.. هذا اذا اني اطيح هو يطيح اذا اني اضحك هو يضحك.. اخوي الماجابته امي.. الانسان الوحيد الي اثق بي بهالدنيا هو وذوالفقار بعد ابد.. دخل عليه عيونه تلمع والدمعة بعيونه
مُعتز :ابو عون
كُميل :تچايتي
مُعتز :خوفتنا عليك لك
كُميل :بسيطات نمونة
عصر عيونه ومسح دمعة منه وضحك
مُعتز:خاب دنجب.. شبيك سندس طحت.. مو فشلتنا هسه شيكولون عليك بزر چوكليته وغمز
كُميل :احترم نفسك سليت
مُعتز :بس شلون قطعة فدوة لالله.. استحيت ادخل خليتكم تختلون براحتكم..
كُميل :لا يا حيوان شعدنا نختلي.. عمي البنية مااعرفها گوة هي
مُعتز :ليش تخليني اگوم بيك هسه وانتَ متمدد لك الليل كُله هي تقرالك وتدعيلك ولازمة سبحتها وتباوعلك
كُميل : لاتاخذ ذنب البنية لا اكوملك ، حيوان امانة الحجية يمها والبنية خافت ، حتى مابيناتنا حجي
مُعتز :چا الله يرحمچ بيبي ما وصيتي وحدة من خلق الله عليه حتى اذا گح** عادي
كُميل :چا انتَ عايز گح** يومية بحظن وحدة
راد يحجي ودخل دكتور صباح ودخلت وراه لقاء
صباح:يابه بالسلامة ابو عون خوفتنا عليك
من گال ابو عون باوع لقاء باوعت لابوها متعجبة ورجعت باوعت علي
كُميل :الله يسلمك دكتور
صباح :اريدك تصحصح هسه وترتاح حتى باچر اطلعك من المُستشفى.. مابيك شي ان شاء الله
كُميل :دكتور فدوة مااتحمل المُستشفى طلعني هسه
مُعتز :معليك بي دكتور شنو الاحسن اله سوي
صباح: عادي اذا يريد يطلع هسه ماكو مشكلة.. بس كون يدير باله ع نفسه.. متضوّج نفسك بعد
كُميل :الله كريم دكتور
صباح:بالسلامة باباتي.. وبابا مُعتز تعال وقع ع اوراق خروجه.. وانتِ لقاء بابا حتى نرجع سوه للبيت
لِقاء هزت راسها وطلعت كدامنا
كُميل :تعبناك دكتور ممنونين منك
صباح :اذا مانخدم ابو عون منو نخدم.. واجبنا باباتي
كُميل :الله يسلمك
لقاء/ خابرت وقار حتى اتأكد شكو ماكو
لقاء:ها يمامة
وقار:ها لقلق ، بشري
لقاء:لا حيطلع زين ان شاء الله ، انتِ ويَن شدتسوين
وقار :والله هُدهُد ونوسة نايمين وبيبي ضغطها ارتفع سويتلها نومي ، وكاعدين اني وياها  ، داريد انظف البيت لان الكاع بيها دم
لقاء:ها ، اجي وياج؟
وقار :تعالي ، مو عمو وخالة بالمُستشفى 
لقاء:يي خفر ، ماما دتداوم بالاهليّة هسه
وقار :لعد تعالي ، اني اعزم لبيت الناس بكيفي
لقاء:ههههه يي هم نزل وهم يدبچ ع السطح ، خلي اشوف بابا لعد
وقار :تمّام
رحت لـ بابا ، وعادي ماعنده اي اشكال لان يعرف بيبي حسنة ، وهو ماما حيل يحبوها واستغربت يعرفون كُميل وهمات يعزوه حيل ويحترموه  ، طلبلي بابا تكسي ورحت لبيت هديل ، دخلت البيت لگيته يخبل نظيف ويلمع.. وريحة بخور بي مثل ماچان قبل الحادث بالضبط.. خليت العشة بالمطبخ ورحت اشوف البنات.. شفت وقار سابحة ومبدلة
لقاء :هلاو يمامي 
وقار فزت وشهكت
وقار :هاي شوكت اجيتي مسمعتج.. هلوات
لقاء:البيت يجنن ، شبسرعة
وقار :بسرعة بسرعة كملته ، كُميل شلونه زين ؟
لقاء :الحمدلله جاي بالطريق
وقار :تعاي اسبحي وبدلي ملابسج كُلها دم
لقاء :هههههههههه لج احس البيت بيتنا بكيفنا نفتر.. شكد مريح ماشاءالله
وقار :هههههههههه لج لعد لو تشوفيني ادور على اغراض التنظيف انوب ع البخور.. عبالك بيتي صار سنين.. انوب مااستحي
لقاء : ههههههه ديلا هم حبابين يقبلولنا
وقار:دروحي اسبحي لتطولين يلا..
لقاء :تمام.. باوعي يمام جبت اكل من برا معلاك ومشويات ع مود كُميل ومُعتز وبيبي وجبتلنا صاج.. خليهم بالفرن فدوة قبل ليبردون
وقار :عاشت ايدج
لقاء :اكُلج هاي هُدهُد خاف ماعدها ملابس عريضة واستحي امشي بيها خاف كُميل يريد شي ، اقيس ضغطه شي!
وقار :لالا عدها.. تتذكرين من كُميل چان يسافر چانت نورسة تجي يمها فنور تعرفيها تحب شكو شي واسع حتى تاخذ راحتها لذلك جابت هُدهُد الخبلة جابت ع كدنا كومة روحي اختاري اليعجبج.. حتى دشاديش اكو
لقاء :هههههههههههه فدوة
سبحت وكملت ورحنا كعدنا يم بيبي بغرفتها بعدما اتأكدنا من نور وهديل نايمين ، كعدت تسولف على كُميل وشلون متعذب بحياته بس كُلما تحجي حجاية متكملها تگول مايقبل  ، ولفت انتباهي حجاية بيبي انُ كُميل ميثق بـ الناس ابـد
لقاء:بس بيبي شلون يكمل حياته اذا لهالدرجة ميثق
حسنة:والله يبيبي حقه الشافه مو شويّ ، انوب الحن عليّ خاطر يتزوج ومايرضى يبيبي ، انوب احاجي عويّز الاغم اكله لح علي هذا هم مايرضى واثنينهم مشيبيني وذاك يم البرابيك الهناك بتركيا ، اكله ولك يمة دتعال بحدي لا اموتن وماشوفك يكضيها عليّ تحشيش وضحك
لقاء :شنو بيبي اخو كُميل
حسنة:لا بيبي ابن خاله ، ابن ابني ، وكُميل يصير ابن بتي
وقار :ميخالف يابيبي غير عنده شغُل ، اسمعه اربعة وعشرين ساعة يحجي ويه عزوز ودائماً عزوز يگول مشغول هناك
قاطع كلامنا صوت رجال يصيح بصوت عالي
مُعتز :حسون الايجة
لقاء:عزا هذا منو
وقار گلبت عيونها وهزت ايدها :عزوز افندي ، ماعنده شي اسمه عيب ابد
حسنة :اجه الاغم امشنّا يبنيات
__________________________________
ها ويلكااااام  ، اليّوم شويّة طوّلت البارت  ، يلا يلا اتفاعلو بدت الاحداث تقوّى اريد حَماسكُم 🔥🔥✨
تتوقعون ليّش كُميل ميثق بالنـاس  ، اكيد وراه سبب ، ومنـو الي ديحاجي نَور! وليّش دتبجي وخايفة  ؟؟
لتنسوّن تتابعوني ع الانستگـرام ♥️