لكل عراقي قصته

الثـالـث والاربـعيـن |

لـ : بُـن الريـامي
                   ____________________

ومَكثتُ حين لقائها مُتسائلًا
هل يقدرُ الشعراءُ وصف كمالها؟
فَتَبَسّمَتْ بخجلةٍ من نظرتي
فكانت البسمات لي كجوابها
ببسمةٍ قد أثبتت ليَّ عجزهُم
فكيفَ باستِحضارِ كلّ خصالها
سُبحان من سوّى الجَمال بوجهِهَا
وتقاسم الباقون ثُلثَ جمالِها
_______________________________________

لتين/
من استوعب نفسه شايلها .. عدل شيلتها رفعها علي وشمها حيل
مُعتز :روحه روحه 
فتحت الباب بسرعة وعطت من الفرحة وهو فز فزة
مُعتز :لا يا چلبة اجيت اشمر البنية على كيفج
لتين :ولك حبيبي طالع تخبل
مُعتز :هاج اخذيها لا توكع
لتين :ماعليها شي والله ماتوكع ، اوگف خلي اخذلكم صورة
جبت الموبايل واخذتلهم صورة وهو فرحان
مُعتز :شايلها صح مو؟
لتين :غير عبالك خبرة
مُعتز :طبعاً خبرة شكد شلتج
وغمز
لتين :الله ايام ، هسه كبرنا بعد
مُعتز :اني بعدني اشتغل ، تحبين تجربين
لتين :البنية بحظنك  ، ماتستحي شلون اب انتَ
مُعتز :لا عمي هي بربوك طالعة عليج
لتين :لا والله طالعة عليك ، اني حبابة
مُعتز :دهاج اخذي بتج خلي انطمر
لتين : عود ردت ادزها للبنات  ، بس اغار عليك ، طالع اتخبل انوب مالابس تيشيرت وطالعات العضلات ، عضلات عضلات چا ليش قبلت بيك غير علمود العضلات ، تغري تغري ، وغمزتله
ضحك حيل وصاح :يابه وابو طالب بربوك ، دتعاي اخذيها
لتين :والله ياحبيبي بعدني ممكملة سبح اني بنية احب اعتني بنفسي  ، عوفوني
مُعتز :هاج عالاقل بس خليها ع الفراش
لتين:خليها انتَ
مُعتز:توكع
لتين:ما عليها شي
كام وشايلها بطريقة حاظنها حظن من جميع الجهات ، هي صغيرة وهو ايده جبيرة حرفيـاً ضايعة بين ايده ، هي صافنة على ابوها وعيونها تتنقل عليّ
لتين :حياتي شوف شلون تباوع عليك
مُعتز :عوفيني لتلهيني لا اوكعها
عينه ع الكاع وحاظنها حيل اول مرة اشوف مُعتز هيجي متوتر
طكيتها بضحكة :ادري شنو تسوق
اتمدد وخلاها بحظنه
مُعتز :طفي الضوة وسدي الباب وراج
لتين :ها ، هيجي تفضّل بنتك عليه
مُعتز :روح مُعتز هاي
لتين :بسيطة ، لوما الشامبو بعده بشعري چانت عرفت شسويت
مُعتز :خاف انام ومادري بيها واگلب عليها  ، عود شيليها مني
عفته وطلعت 

ذوالفقار /
طاير من الفَرح ، رجعت للبيت تلكاني امير بوجه خايف
امير :ها شراد منك
گابلته واهز چتف واطك اصبع :وافق وافق
امير :منو
ذوالفقار :لاتصير مطي صديقي ، كُميل وافق على زواجنا
امير :ها
ذوالفقار :وداعة اموري الورد
اجه حظنّي وباركلي ويضحك
كعدنا اني وياه نسولف ، وخابر عليّه مُعتز
ذوالفقار :ميّة هلا سيدي
مُعتز :انطم ، صدُك السمعته؟
ذوالفقار :ياهو الكالك
مُعتز :مرتي
ذوالفقار :صح الصح
مُعتز :دريت بكُميل ينطيها الك ، بس صدكني مو علمودك ، علمودها هي شافها شلون اتلوعت علمودك خاف يخسر اخته بسببه ، مااريد اخرّب فرحتك ، بس حظر نفسك بس ارجع تتعالج ، اوديك للطبيب الجاي تروحله لتين خوش طبيب
ذوالفقار :ليش تحسسوني خبل ، مااروح اطباء ، يمي امير ويشوف حالتي
مُعتز :لاتخليني انعل والديك انتَ وامير ، قشمر حيوان تأذي البنية بتصرفاتك الرعنة ، مو زين والرجال قبل يزوجك
ذوالفقار :الو الو عويّز ماسمعك زين
مُعتز :يي مو اذنك تارسها خ** دخلي انزل واني اعلمك
سديته وباوعت لامير الي يباوعلي بنظرة جديّة
امير :كلامه صحيح ذوالفقار ، لازم تتعالج تره مابيها شي اعتبرها هديّة واهديها لهديل