لكل عراقي قصته

التـاسـع والثـلاثـين |

لـ : بُـن الريـامي
                   ____________________

عِنده عُيون مُوش عُيون چَن دِجلة وعَليها مجلجَل الزَيتون .
_______________________________________
ذوالفقار /
اباوع لامير رفع حاجبه واتحلفلي بأيده
هديل :ها لعد تمام حبيبي خليها غير مرة
ذوالفقار :ديربالج ع نفسج
هديل :ان شاء الله
ذوالفقار :بحماية الله
امير :مو ثقة مو
ذوالفقار :اموت عليك شبيك
امير :احجيلي
ذوالفقار :احجيلك وانتَ مو دقتور وعالجني
امير :دحجي ابو الدقتور ، حياتك كلها شقة شوكت تصير جدي مادري
ذوالفقار :من يصير ابوك ابني
امير :شو دطير
ذوالفقار :لالا تعال بطلت والله
سكتت وطلعت جكارة وعيني بالكاع
ذوالفقار :باوع هديل اني مااكدر اعوفها  ،ثق مثل مااني متمسك بيها هي متمسكة بيّ اكثر ومُستحيل تعوفني ، وبالنسبة لمَرضي فـ اني طبيعي والله ومابيه شي  ، بس هم يحجون بكيفهم
امير: ها ، دطلعلي بالنظيف
دنكت راسي
ذوالفقار :مابيه شي والله ، بس اكلك كلمة وَحدة تره اني ناتج مُعاناة وحَرب نفسية وجسدية شلون ماتريدني اطلّع خَبل  ،امير  من چان عمري 5 سنوات.

رفعت راسي الـه مبتسم والعبـرة خانكتني ، مكدرت اكمل
امير :كمل ليش سكتت
ذوالفقار :عوفها امير عوفها ياخوي
امير :عفتها، باوعلي دخلكلك شي لعد ، هذا مو عذَر لمرضك ، انتَ مو اكثر من مُعتز متعذب بحياته ، وانتَ اكثر واحد شهدت على تعب عوّيز احتمال حتى اكثر مني تدري بي انتَ  ، جابها من انولد ليومك هذا هَو مامرتاح ، شنو ذنب طفل اول مامولود ابو لازمة من رجليّ ويهدد امه
بي يشمره بالميّ الحار اذا ما تنطي الي يريده ،ها؟ وشنو ذنبه اذا عُمره سنتين ، سنتين بس، ههههههه وابو راهنه لديّانة الشرب مالته
اباوع لامير يحجي بحرگة ودموعه بعيونه مايريد يطلعها 
ذوالفقار :مُعتز يدري؟
امير :يدري بكلشي يدري وصامد وصابر لهسه ، وبعد كل هذا يجي الافندي يريد يزوّج وقار لصديق ابنه الساقط
ذوالفقار :شسوه مُعتز
امير :ذاك هَو الوالد العزيز يسولف ويه طليق لتين وخوالها ، كلما يضوج مُعتز يدزله جماعة يكتلوه وهو يكعد يراقب بيّ
ذوالفقار :وانتَ شدراك بكل هذا
امير :مؤيد ولد اعرفه صديقي ويا بالدوام ويحجيلي
ذوالفقار :هههههههههه سؤال لعد ، زَين اني شلون انتقم من الاذوني؟ انتقم من ابوي اليتمني وعافني بين ذيابة؟  لو انتقم من امي الاول وحدة باعتني وراحت عاشت حياتها ومرتاحة ومدلله ومشبعة جهالها حُب وحنية ومن رادت تموت اتذكرت عدها ابن حتى مانطقت بشي خلت گلبي يأرف عليها ويتذكرها بكلمة حلوة! لو عمامي وصية المرحومة مريضة وتوصي بعمامي وهم الجرعوني المُر بعيشتي وياهم لگمة زايدة اكلها يطلعوها من خشمي من غير كلمة "ابن الزنا"  الاسمعها من چنت صغير وماچنت ادري بمعناها لحدما عرفت معناها واستهظمت حيل  ومن كبرت گامو يسموني الگ** 
سكتت وهمست : امير
امير :عيونه
ذوالفقار :امير اني بعمُر الـ 5 سنوات شفت امي بفراش ابوي الميت ت** ، لهسه متروح اللقطة من بالي ، عبالها طالع العب ويه مُعتز وكُميل يم بيت جدي واني جنت بالسطح ، نزلت من سمعت احد يدك الباب راحت تركض وهي بسيتها مال النوم دخل من الباب وكضوها طياح حظ من اولها رحت شردت بالغرفة ورة الميز وهو جابها شايلها ون*** كدامي  ، كدام عيوني ، نمت بمكاني والدموع على خدي فزيت على حركة يمي واشوفه ينزعني يريد يعتدي عليه مدري شلون فلتت منه وشردت اركض بالشارع مصلخ لبيت الحجية احجيلها وابجي وهي دموعها عشرة عشرة تنزل
امير :كل واحد بينا همّه شَكل حتى المرتاح بحياته هم ما مرتاح
ذوالفقار :زين وبعدنا بعقلنا وماتخبلنا رسمي ، بس هسه گلي شلون انتقم؟
امير :سامع بانتقام رَب العالمين؟ ربك عادل ذوالفقار يمهل ولا يهمل ، هاي نور فقدت اخوانها اثنينهم عوضها اللـه بـ ابوها الداعمها بكُل حياتها وعوضـها برجـال يسوه الف رجال ، انتقم من اخوها وصديقه ، ذاك صديقه يتعذب بالسجن واخوها بين الحياة والموت بالمُستشفى واذا عاش يروح للسجن شنو حياته؟ ، وهاي لتين  ، رسيل گالتلي انُ اتعذبت هواية بحياتها ، بس اللـه عوضها بمُعتز وچان احلى عَوض وابنها مات واجتها احلى بنوتة
ذوالفقار :وحتى خالة خدوج ، الله عوضهـا بولد عين الله عليهم ، مُعتـز الضابط الي الكُل تهابه وتحترمه ووقـار طبيبة الاسنـان الي هي قَدوة لكُل بنية بجيلها وامير الطبيب الي كاسب الكُل بإسلوبـه واخلاقـه الطيبـة
امير:يخليك اللـه ، المقصـد من كلامي لتفكـر بـ المأذيـك والمضوجـك فَكر بـ النعم العندك ، اصدقائًك مثلاً العوضوك عن الاخوان وإخوانك ولو بعدين ظَهروا بس چانو خيـر عَوض ، والحجيـة وحنانها الغطانا كلنـه وحظنها الچان مفتوح الك دائماً و.
ذوالفقار :وهديل العوضتني عن روحي الضاعت ،  رحمـة اللـه الوسعتني
امير :شفت
ذوالفقار :هديل الشي النظيف وسط التلوث الي بحياتي كُلـه
امير :من كتلك هديل مو مُناسبة الـك مچان قصدي تعوفها ذوالفقار
ذوالفقار :لعد
امير : اتخيل؟ اتخيل ذوالفقار تأذي البنية الي دزها الك الله لشفائك دزها الك رحمةً بيك
ذوالفقار: گلبي وجعني بهاي الحجاية ، شسوي فهمني
امير :اني من النـاس الي اشجعـك تحارب علمودها حتى وان كنت الوحيـد الي اشجعك ، لان هديل تستاهل تحارب علمودها ، بس اول شي اريدك تحارب نفسك علمودها ، ذاتك الـي بي شوائب وعيوب ، بحيث تروحلها وانتَ نظيف انتَ الي تحافظ على حُبك بإيدك
ذوالفقار :شلون يعني
امير :اعلمك طريقة علمتني بيها وقار ، الزم ورقة بيدك ، مو شرط ورقـة اي شي النـوت الي بالفون مالتك ! او باللابتوب اي شي يعني
ذوالفقار :يي؟
امير :واكتب الشغلات الي تحسها غلط بيك وتريد تغيّرها واكتب السبب بتركها مثلاً ليش تريد تتركها ، انطيك مثال؟ ، مثلاً اكتب اني انام متأخر وهالشي يأثر سلباً على صحتي ليش؟ لان اسهر ع الموبايل بالليل وعيوني يقل نظرهم والصبح اكعد مطفي ، او مثلاً ماكو خشوع بصلاتي ليش!لان اكو صوت قريب عليه صوت تلفزيون او موبايل او احد يحجي او مثلاً شي يلهيني ،
وانتَ تكتب المُشكلة والسبب ارجع باوعلهم من جديد ركز وتعبّ نفسك وابحث حتى تلكالهم حَل
مثلاً حل مُشكلة السَهر انُ ابعد الموبايل مني لمكان اتعاجز اكومله والزملي كتاب ثقافي او كُتب مال دراسة او الزم سبحة وابقى استغفر لحدما انام ، واذا مكدرت تنام فجرب طريقة انو تبتعد عن اي تلفزيون او موبايل او اي شي الكتروني قبل ساعتين او 3 من النوم ، اي بما معناه نومًك مثلاً بـ 11 من 9 انتَ اقفل موبايلك وخلي بعيد وهالشي مُجرب ومضمون صدكني
او مُشكلة الخَشوع بالصلاة ، حاول تصلي بمكان وحدك وصلّي بصوت عالي وانت دتصلي حاول تركز على نطق الكلمات بـ الآيـة راح تفيدك حيَل وهم استشعر كُل كلمة تكولها  مثلا (إيـاك نَعبُدُ وإيـاك نستعين) حاجي نفسك بمعنى دتتوسل بـ الله وماكو إلـه تعبده غيـر اللـه وماكو احد تستعينله غير رب العالمين  او حاول تغير السور الي بالقُرآن
وهيجي كمل بقية شغلاتك او عيوبك الي تحسها بشخصيتك تّعب نفسك لنفسـك ، لتخلي أحـد يلكى شي يحجي بي عليك دائماً
ذوالفقار :والله مااعرف شحجي احسك كُميل الثاني ، هو هم ينصحني ويدلينّي هوايّ، الله يحفظك على هذا العقل والوعي الشايلة
امير :ممنون حبيبي ، اذا تحتاج شي كول يمك اني اسوي بـ الغدة
ذوالفقار :احسك مرتي وتحبني بس تكابر
امير :وعلي موصوجك
ذوالفقار :لا صدك شوكت تجيب هديل
امير :بكيفك
ذوالفقار :هسه
امير :حاجيها على العصر اذا تريد
ذوالفقار :اوكِ