الروح المصرية (الجيل الجديد من الفراعنة)

الحلقة الثانية عشر

جامعة القاهرة...

تجلس (ولاء) مع صديقاتها بعد إنتهاء المحاضرة على المدرج..

يثرثرن في مختلف الأمور..هاتفها يصدر رنة الاشعارات المعتادة..

تنظر له بروتينية..
لكن ما إن رأت ذلك الاشعار حتى إنقبض قلبها..

إختفت ابتسامتها..وقالت بسرعة:
-طب..أشوفكوا بعدين يا بنات..ورايا مشوار..

ذهبت بسرعة قبل أن تسمع اعتراضاتهن..

أنفاسها تضيق وهي تقرأ تلك الرسالة..

"الوقت بيعدي..وانتي مقولتيش رأيك..متلوميش غير نفسك يا قمر 😘"

تغرق عيناها بالدموع و تتمتم بإنهيار:
-يا ربي أعمل ايه دلوقتي...؟!

*********************************

القاهرة الجديدة...عمارة المعادي...
منزل السيد (رشوان)..

يجتمع (نادي) مع والديه على موعد الغداء..
كان يأكل بنهم فهذه وجبته المفضلة اللازانيا..

تحدث والده:
-إنت صحيح كلمت (نديم)؟

-آه..بيسلم عليكم

-الله يسلمه..

أضاف:
-على فكرة أنا خدت إجازة..و ممكن نروح المصيف نقضي يومين..

(نادي) بسعادة:
-أخيرا!

(سميحة) بإبتسامة:
-خبر حلو أوي..إمتى يا (رشوان)؟

-الاسبوع إللي جاي إن شاء الله

التفتت (سميحة) ل(نادي) وقالت بابتسامة:
-أهو..يومين حلوين وحجة علشان متروحش المدرسة...

ابتسم بخفة وهو يحك رأسه وقال:
-مش عارف بصراحة!

ضحكت ضحكة قصيرة وتمتمت:
-مش بتعرف تقول ايه!

ثم التفتت لزوجها وقالت:
-و عيلة الاستاذ (بهجت) جايين برضه؟

-اه جايين..انا وهو قلنا نفصل شوية من الشغل..واهو الولاد ياخدوا نفسهم من المذاكرة..

لم يكن (نادي) يستمع لهم فقد كان مشغولا باللازانيا...

قام والده من على المائدة...نظرت له والدته وقالت:
-عارف هيبقى معانا مين في الاجازة؟

رد بلامبالاة وهو يمضغ الطعام:
-مين؟

-(ليندا)

نظر لها نظرة بلا معنى وتمتم وهو يكمل طعامه:
-اه..تمام...

-يعني ما فتكرتش حاجة؟

عاد يمضغ الطعام وقال بسخط:
-هفتكر ايه يعني غير انها بنت رزلة..

ضحكت وقالت:
-رزلة؟ دي رقيقة أوي وبتحبك...

-ما هي رزلة علشان كده...كل ما تشوفني تشبط فيا..وتخترع كلام من مخها الهايف علشان أسمعها...