الروح المصرية (الجيل الجديد من الفراعنة)

الحلقة السابعة عشر

المدينة المخفية...أحد صحاري مصر...
في القصر الملكي حيث يجتمع الملك مع مستشارته ومعلمته أنيسة والتي كانت تقول له:

-تركيبة المجتمع المصري اختلفت..التطرف في الاراء والافكار بقى ظاهرة..صحيح المجتمع رفض الارهاب والارهابيين بس نقدر نقول إنه إتعدى من حالة التطرف إللي كانت موجودة...غير ان بعض الجماعات المتشددة الحالية مازالت ليها ثقل ووجود..وخطورتها ان تطرفها موصلش للارهاب...وفيه شريحة متقبلة أفكارها ووجودها...

كانت تدعم كلامها بإحصائيات أمام الملك..وكان موسى يستمع بإهتمام شديد..

أضافت:
-الازمة الاكبر هي ازمة اجتماعية وثقافية واللي بتتأثر وبتكبر بالأزمة الاقتصادية...
والازمتين بيأثروا في بعض..
وكنتيجة لده الطبقة الوسطى بتتآكل..ومعاها كل حاجة وسطية بتختفي..
بشكل عام المجتمع لسة محافظ على وضع الأسرة التقليدي...بس فيه أماكن فيها بعض التحولات الثقافية المحدودة...

موسى بإهتمام:
-دي معلومات أنا فعلا محتاجها...

شرد قليلا.... فقالت له:
-بتفكر في ايه يا موسى؟

-في نظرة الشعب لرئيسهم...السن والحالة الإجتماعية ممكن يكونوا حاجز قدامي...

-مجتمع (أ)* في نظرته للحاكم او الرئيس زي مجتمعنا بيبص للحاكم إنه أب وده ميراث مصري قديم...بس عادي زي ما قدرت أقنع مجلس السبعة بإختيارك...نقدر نعمل ده في المجتمع (أ) عن طريق الدعاية...وده أسهل...هناك الشباب بيمثلوا ٦٠٪ من الشعب ومحتاجين حد يعبر عنهم فده في صالحك...وموضوع الحالة الاجتماعية..فده أسهل....لازم تتجوز...

رد ببساطة:
-دي حاجة أنا مخططلها وواخد بالي منها كويس..بس مش من هنا...جوازي من المجتمع (أ) هيكون أفضل..وهيأثر على الدمج بالإيجاب...

-ومين إللي هتختارها؟ انت ليك علاقات كتيير من المجتمع (أ) بس مش لدرجة إنك تطلب إيد بنت من بناتهم...

-مش دلوقتي..الحدث هيكون أكبر بكتير لما أكون في السلطة...وكويس ان الدمج قبل الانتخابات علشان يكون فيه وقت  كفاية أختار فيه كويس..

قالت بسخرية:
-بتتكلم كأنك متأكد من فوزك في الانتخابات..

قال بسخرية مماثلة:
-وإنتي برضه هتصدقي حكاية الانتخابات
دي؟ ده إنتي اللي مربياني!
الانتخابات دي إطار صوري علشان الناس تقبلنا وميحسوش إننا مفروضين عليهم..غير ان ده القانون في مجتمعهم...وده برضه الاتفاق بيني وبينهم..السلطة مقابل مدهم بالاسرار العلمية بتاعتنا...

ضحكت وقالت:
-ديموقراطي أوي يا موسى!

موسى بجدية مصطنعة:
-طبعا..

أنيسة بجدية:
-بس في الاخر انت بتساوم ناس بلدنا يا موسى...

-ولو...لو ادينالهم الاسرار العلمية وممسكتش السلطة...عمري ما هعمل التغيير الحقيقي إللي عاوزه في مصر...