الروح المصرية (الجيل الجديد من الفراعنة)

الحلقة السادسة عشر

عمارة المعادي...شقة الساكنين الجدد...

مازالوا يصدرون الضجيج بسبب تنظيمهم للأثاث...

يدخل ذلك الشاب للمنزل...

-جبت الغدا يا (منصور)؟

ترك المفاتيح على الطاولة بتعب وقال:
-ايوة...جبته يا ماما

ثم أردف وهو ينظر لأنحاء المنزل:
-لا..بس وضبتوا البيت كويس...

والدته وهي تجلس بجانبه:
-يااه اسبوع كله تعب...

-يلا ناكل انا ميت من الجوع..ياريت تصحي (سجى) لو لسة نايمة...

-ماشي..وانت ادخل اتشطف..شكلك مترب خالص..

ذهب للحمام...وذهبت هي لتوقظ سجى...

*********************************

التفوا حول مائدة الطعام...بالتأكيد كان الطعام من احد المطاعم لأنه من الصعب الطبخ في منزل انتقلت له توا...

(سجى) تأكل وهي ناعسة تيقظها والدتها كل دقيقة...(منصور) يأكل ببطء وتعب شديد..والدتهم تسأل (منصور):
-امتى هتنزل الشغل يا (منصور)؟

-ان شاء الله الاسبوع اللي جاي..اكون رتبت اموري و موضوع جامعة (سجى)...

-كده تمام..

كادت (سجى) تنام على المائدة...قالت والدتها:
-روحي نامي يا (سجى)...شكلك فصلتي خالص..

تمتمت (سجى) بصوت ناعس:
-حاضر...

قامت من مقعدها لتنام...

عدة دقائق من الصمت...

شرد (منصور) وغمغم:
-يا ترى بابا عامل ايه؟

ردت والدته بفزع:
-انت لسه هتجيب سيرته؟!..اومال احنا طفشنا من بلدنا ليه...

رد منصور بغضب:
-هو كان عمل ايه يعني؟! وبعدين ده ابويا وهفضل احبه طول العمر...

ردت بغضب مماثل:
-مش عاوزة اسمع سيرته في البيت ده...والسكة اللي انت كنت ماشي فيها مع ابوك يا (منصور) تبعد عنها وتشوف مستقبلك..اديني بقولك أهو...

غمغم بضيق:
-خلاص يا ماما...خلاص..

نظرت له بتوعد وهي تكمل طعامها...

*********************************

احد المناطق الساحليه...أحد الشاليهات...

(سميحة) والدة (نادي) تستضيف صديقتها في الشاليه...

دخلت (غادة) و ابنتها (ليندا) للشاليه الذي كان أثاثه بسيطا وينم عن ذوق...

تبادلت الصديقتان السلام

(سميحة) بترحاب:
-اتفضلي يا (غادة)...اتفضلي يا (ليندا)...

جلسا الاثنين على مقعدهما قالت (سميحة):
-تشربوا ايه؟

-ملوش لزوم يا (سميحة)..لسة شاربين..