لقيتك من بعد كل الخساير ربحي الأعظم عوض قلبي وبسماته وزهر عمري و نواويره

Part 29

بالمستشفى وصل سيف و توجه للغرفه ناظر عبير و عبدالرحمن و ابو وليد جالسين و تقدم يسلم :السلام عليكم
ناظره عبدالرحمن: وش جابك
رفع سيف الاكياس : عوض طلبني اجيب لهم اكل
ابو وليد اشر على الغرفه : ذي غرفتهم
ناظرته عبير : سيف
سيف : عارف انها ماتبي تشوفك عارف و ناداني عوض علشان اجيب الاكل و اغير جوها شوي مدري من قالهم اني مهرج
ضحك بخفه عبدالرحمن: كلنا ثقيلين مانعرف نمزح مثلك
ابو وليد بضحك : عسى الاكل وصل كامل
ضحك سيف و تقدم عند الباب تلثم و نطق: كامل كامل
فتح باب الغرفه و التفتوا عليه شوق و عوض دخل و بدا يغني و يرقص و يهز اكتافه :

عطشانة لشوف عيونه
ضايع العقل من دونه
امانة ان شفت شويقي
من عيونه تبوسونه
شلونه شلونه شلونه يا يمه
شلونه شلونه

ناظره عوض و ضحك : شوفي الخبل ذا
ضحك شوق بقوه ضحكه طالعه من كل قلبها ناظر ضحكتها و تقدم يقبل يدها : عساها دايمه
نزل سيف الاكياس و اخذ المسباح من جيبه و بدا يدبك :

ادبج حيل وشد بساع
يا محلا الدبج ع القاع
مريض بطقم اللماع
يا محلا القلابيه

ضحكوا و نطق عوض : سيف و اغانيه الهابطه طالعي كيف يدبك
ضحك و مسحت دموعها من الضحك و قف سيف و نطق : استراحه محارب اكمل شوي
نزل اللثمه و تقدم لهم بالاكياس : عاد اذا لقيتي البانكيك شويه اعرفي انه مسروق
شوق : بالعافيه ولا يهمك
اخذ عوض البانكيك و بدا يفتحه لها و حط لها الطاوله و تقدم يجلس جنبها و نطق : جبت العصير
فتح سيف الكيس الثاني : جبت و جبت فطاير لك و لي
اخذ عوض العصير و فتحه لها و بدات تاكل من البانكيك : قول لنودي اني اشكرها
قرب منها العصير و شربت من يده و نطق : ان شاء الله
نطق سيف : بسرعه قرر حلوم ولا فلافل ، راح اخذ الفلافل ف اخذ الحلوم
مد يده عوض : اي شي عادي
عطاه سيف الفطيره و كان واقف جنبهم و نطق : ما قلت لكم وش صار
شوق : وش صار
سيف بحماس : صارت هوشه بالجامعه بين اخت عمر و ذولاك
ضحكت شوق بخفه : قالت لي
هز راسه سيف و هو ياكل : اقولها مره ثانيه مره تضحك
عوض اللي كان ياكل : قول
التفتت عليه شوق و ناظرت الفطيره : ابي شوي
قدم لها الفطير و اكلها بيده ناظرهم سيف و نزل راسه و ابتسم اكلت من الفطيره و نطق عوض : تبينها
هزت راسها بالنفي : لا بس كنت ابي شوي بكمل البانكيك ما عجبتني حامض
عوض : اللي يعجبك ، كمل وش صار بالهوشة
سيف بحماس : اي يالله ، طبعاً ذولاك بدوا يقولون كلام من تحت الطاوله و البنت ما تحملت
ضحك و نزل فطيرته و بدا يقلدها و رفع اكمام ثوبه و نطق : وقفت و رفعت اكمام اللابكوت و ربطت شعرها
و تهجمت لهم
ضحك شوق : ما قالتلي كذا كمل
تقدم سيف لعوض : راح امثل الهوشه عليك
ناظرها عوض و كيف متغير مودها و جوها و صارت احسن و تضحك : والله اذا بشوف الضحكه ذي راضي ، مثل مثل
ابتسمت له وهي تاكل و مسك سيف شعر عوض و نطق : مسكت شعرها و بدات تضربها البنت ذي ما عندها غير شد الشعر
كمل و هو يقلدها : شكلج تبين تنطقين جسمج يحكج
ترك شعر عوض و كمل طبيعي : و بدات تضرب فيها و تضرب و تخيلوا اعتلتها و بدات تضرب و هذيك تحط يدها على وجهها و تصرخ
عوض عقد حواجبه : اي وحده
ناظرته و نطقت بسرعه : وش عليك اي وحده خلاص سحبوا الماده لايكون عاجبتك و تبي سنابها بعد ذا الناقص بعد تسأل اي وحده ، اسمع الهوشه بدون لا تعرف اي وحده و ليش خايف عليها من الضرب مثلا و لا وش
ضحك عوض بخفه و نزل راسه سيف يضحك و نطق عوض : ما تهمني بس بعرف اي وحده تكفخت فضول
شوق و هي جالسه تاكل : خلي فضولك ذا يندفن علشان لا افجر فيك قدام سيف
ضحك بخفه و همس لها : افا تفجرين بحبيبك
سيف كان يمثل انه مشغول بالاكل و نطقت بنفس الهمس : تخسي تكون حبيبي ، حبيبي ما يهتم للبنات ولا يبتسمون له البنات و لا ينبسط اذا البنات يبتسمون له
ضحك عوض : حبيبك ينبسط اذا البنات ابتسموا له لانه وقتها يشوف غيرتك اللي يعشقها
شوق : سكر الموضوع و شربني عصير خلص
ضحك بخفه و قدم لها العصير : طيب
ناظر عوض سيف اللي يمثل الانشغال و ضحك : كمل
سيف : يالله نكمل بعد هوشتكم ذي يالبيه يا هوشه المحبين حلوه
ناظر عوض شوق اللي جالسه تاكل و ابتسم و كمل سيف و هو يمثل دخول عمر : طبعاً دخل عمر و حاول يكون عصبي بس هو بصوب و العصبيه بصوب و جاء حاول يفك بينهم
ضحك و كمل : تذكرون هذيك اللي كانت تناديني سيوفي
ضحك عوض : اي اي
قلدت شوق طريقه نطق وعد : سيوفي
ضحكوا و التفت لها عوض بحده و همس : خير تدلعينه
ناظرته : اسكت بس اسكت قال ايش خير تدلعينه كيفي مثل ما انت تسأل عن الحيوانات انا بدلع سيف
سيف حط يده على راسه : استهدوا بالله وش الحب ذا اللي كله غيره و هواش
شوق : كمل كمل ما عليك منه ذا يغار من ظله
عوض و بفمه الاكل : كيفي اغار اي و اموت من الغيره بعد
عضت شفتها بخجل و ناظرت البانكيك و نطق سيف : خلصوني خلوني اقول السالفه
عوض : كمل
سيف : طبعا ذيك بدات تغلط على الجوهره و تقول
قلد طريقه كلام وعد : ججججج يع يا اللهجه
و كمل : طبعاً تسكت لها لا طبعا صرخت على عمر وقالت جالسه تغلط على لهجتنا تبيني اسكت و تقدمت تتهاوش معها
ضحكت شوق : يمه البنت ذي معرف وش غيرها
عوض : ما يبينون انهم اخوان ابدا
سيف كمل لهم وش صار و بدات شوق تضحك بقوه : اخخخ يا عمري هي
ناظر ضحكتها و ابتسم و نطق : قول لنا نكته سيف
ناظرته و فتحت فمها : عصير
تقدم لها بالعصير و نطق سيف : يالله عاد انا ابو النكت
يقولك في دكاتره اثنين يحبون بعض
ناظرها عوض و ابتسم تقدم يمسك يدها اللي كانت ملفوفه و نطق سيف : خليني اقول النكته بعدين تغزل
ضحك بخفه : كمل كمل
سيف : المهم قالت له حبيبته تحسب نفسك مضاد حيوي ترد علي بعد ٨ ساعات
شوق : طيب هو وش قال لها
سيف ضحك و مسك بطنه : و انتي تحسبيني طوارئ فاضي لك ٢٤
عوض : ماش ذي النكته ما تضحك
ناظرته شوق : خلصت اكل
ناظر اكلها :بالعافيه
تقدم يبعد الطاوله و نطقت شوق : خايسه توقعت عندك شي يضحك
سيف بدا يفكر و نطق : يالله يالله ذي تضحك
تقدم عوض يجلس جنبها و نطق سيف : في بيضه تشك بزوجها تتوقعون ليش
شوق و عوض بنفس الوقت : ليش
ضحك سيف : لانها شكشوكه
ضحكوا بقوه و همس لها : عسى مشارق ضحكتك مالها غروب
ناظرته و هي تضحك و بنفس الهمس : ما تغرب وانت حواليني
ابتسم لها و التفت لسيف اللي كان صاد و يبتسم : كمل
سيف رفع راسه : اي يالله في مصنع قهوه انفجر ..... ماقدر يكمل و ضحك بقوه ضحكوا على ضحكته و مسحت دموعها : ضحكتك تضحك
عوض بضحك : كمل كمل
سيف بضحكه : قال بن
ضحكوا  و جلس سيف يقول لهم نكت و غير جوهم و بداوا يضحكون و يسولفون