Marry Me In A Tulip Field

Chapter(2)

ခြောက်လအတွင်း ထိုအိမ်ကို လှပပြီးမက်မောဖွယ်ကောင်းအောင်ပြုပြင်ဖန်တီးပေးရမည်ဖြစ်၏။

ထို့အတူ နောက်ထပ်တွေးမိတာက ထိုအိမ်အပြင် ကျွန်မရဲ့ဘဝကိုလည်းအဲ့ဒီကောင်မလေးကိုအပိုင်ပေးဖို့ ကျွန်မကိုယ်တိုင်တိတ်ဆိတ်စွာဖန်တီးရလိမ့်မည်ဖြစ်သည်။

အိမ်ရဲ့ဆေးအရောင်ကို သူမစိတ်တိုင်းကျ အနက်၊အဖြူ၊ခဲရောင်သုံးမျိုးပါအောင်အသုံးပြုပေးခဲ့သည်။

အိမ်ကိုပြုပြင်ရာတွင် သူမစိတ်ကြိုက်ညွှန်ကြားဖို့ တစ်နေ့တစ်ခေါက် သူမ ရောက်လာတတ်သည်။တစ်ခါတစ်ရံ သူမတစ်ယောက်ထဲလာ၏။တစ်ခါတစ်ရံတွင် ကိုသက်ထူးဇော်နှင့်လာ၏။တစ်ခါတစ်ရံတွင် သူမရဲ့သူငယ်ချင်းနှင့်လာ၏။

သူမကိုမချစ်မိဖို့ တတ်နိုင်သမျှထိန်းချုပ်နေခဲ့၏။သို့သော် သူမကို မချစ်ပဲ ကျွန်မ မနေနိုင်ခဲ့ပါ။တစ်နေ့တစ်ခြား ပိုတိုး၍သာ သူမကိုချစ်မြတ်နိုးစုံမက်လာမိတော့၏။

သူမနှင့်နေ့တိုင်းစကားတွေအများကြီးပြောဖြစ်ကြ၏။တစ်ခါတစ်ရံ အိမ်အလှဆင်ခြင်းနှင့်ပတ်သက်၍ပြောဖြစ်ကြ၏။တစ်ခါတစ်ရံတွင် သူနှစ်သက်တာတွေ ကျွန်မကိုပြောပြတတ်၏။သူဆွေးနွေး၏။လိုချင်တာတွေ တောင်းဆို၏။

များသောအားဖြင့် အရာရာတိုင်းတွင် သူနှင့်ကျွန်မ အကြိုက်ချင်းထပ်တူကျနေတတ်ပါ၏။

တစ်နေ့တွင် သူ့ကိုကျွန်မ မေးမြန်မိသည်။

“မင်းအကြိုက်ဆုံးပန်းက ဘာလဲ သစ်ရွက်ငယ်”

“ကျူးလစ်တွေ....ဆွတ်ဆွတ်ဖြူနေတဲ့ကျူးလစ်ပန်းတွေကို သိပ်သဘောကျတယ် ယွဏ်း”

“ဟုတ်လား....ကိုယ်ကတော့ နှင်းဆီတွေကိုပဲ သဘောကျတယ်။သူတို့ကြွေကျသွားရင်တောင် ပွင့်ဖတ်တွေကိုအခြောက်ခံသိမ်းဆည်းထားမိတဲ့အထိ သဘောကျတာ”

သစ်ရွက်ငယ်ရဲ့မျက်နှာလေး အုံ့မှိုင်းသွားခဲ့၏။တစ်ခုခုကို နာကျင်ခံစားရဟန်ဖြင့်လည်း တိတ်ဆိတ်ငြိမ်သက်သွား၏။အတန်ကြာသောအခါမှ သူကျွန်မကိုခပ်တိုးတိုးစကားဆိုသည်။

“နှင်းဆီတွေကို သိပ်ကြိုက်ခဲ့ဖူးတယ်”

“ဘယ်လို......”