The White Curse (Gazellian Series #2)

Chapter 1

Chapter 1

"Kalla, madali ka at gisingin mo na ang ating prinsesa. Dumating na ang ating mga panauhin."

"Masusunod ina,"

Hinugasan ko muna ang aking mga kamay at pinahid sa puting tuwalya para malinis ang sarili ko. Hindi gusto ng prinsesa na madumi akong papasok sa kanyang silid.

"Ina, hindi na ba ako amoy kusina? Maaaring magalit na naman sa akin ang ating prinsesa."

Lumapit si Ina sa akin at malambing niya akong inamoy.

"Mabango ka na, Kalla." Hinaplos nito ang aking pisngi.

Matamis akong ngumiti sa aking ina bago ko siya hinalikan sa kanyang pisngi.

"Sige na po hinihintay na ako ni Prinsesa Theresa."

Palabas pa lamang ako ng kusina ay nginingitian na ako ng mga tauhan ng palasyo, na siyang katulad namin.

"Mas maganda ka pa sa gabi munting Kalla, hayaan mo na lang ang prinsesa. Makukuha mo rin ang ugali niya."

Laging ito ang sinasabi sa akin ng ibang tagasunod ng palasyo dahil ikalabing-anim na akong tagasunod ng prinsesa, karamihan sa kanila ay hindi na natatagalan.

"Gagawin ko po ang aking makakaya!" masiglang sabi ko.

Ilang linggo na akong personal na tagasunod ng aming prinsesa, ngunit hanggang ngayon ay mukhang hindi pa rin niya ako nagugustuhan kahit anong gawin ko.

Siguro ay talagang iba ang tingin niya sa mga batang tagasunod na katulad ko.

Tagasilbi sa palasyo ang aking ina at isa sa pinaka pinagkakatiwalaan ng aming hari at reyna. Minsang dumalaw sa aming tahanan ang mag-asawa dahil sa sakit ng aking ama, dito nila ako nakitang pinagtitiyagaang magbasa ng isang sirang aklat.

Natuwa ang hari sa akin at inalok niya ako sa aklatan ng palasyo ngunit ang kapalit nito ay kailangan kong maging tagasilbi at kaibigan ng kanilang nag-iisang prinsesa.

Agad kong tinanggap ang alok niyang ito at hanggang ngayon ay ginagawa ko ang alam kong tama para makuha ko ang loob ng prinsesa.

Nakasalubong ko sa harap ng pintuan ng prinsesa ang bampirang taga-ayos nito. Binigyan niya ako ng matamis na ngiti nang magtama ang aming mga mata.

"Napaka-gandang bata mo talaga, Kalla." Ilang beses akong inubo nang lagyan niya ng pulbos ang mukha ko.

"Bakit may pawis ka na agad? Gabi pa lamang." Natatawang sabi nito.

"Gising na po ba siya?"

"Gising na, hinahanap ka na niya. Babalik na lang ako kapag pinatawag akong muli."

Tumango ako sa sinabi ni Corazon. Nang sandaling papasok na ako sa pintuan ay nagulat ako sa kasuotang tumama sa akin.

"Why are you late?! Mas naunahan ka pa ni Corazon!" yumuko ako.

"Paumanhin aking prinsesa, ano po ang inyong ipag-uutos?"

Nanlaki ang mata ko nang sinadya niyang basagin ang mamahaling maliit na estatwa na nakapatong sa kanyang lamesa.

"Mahal na prinsesa.."

"Pick them, pagkatapos ihanap mo ako ng damit at sapatos. Yung hindi ko pa naisusuot. Bilisan mo!"

Nagmadali na akong nagtungo sa direksyon niya, nagawa pa ako nitong banggain dahilan kaya nawalan ako ng balanse. Napadaing ako sa sakit nang mapahawak ang mga kamay ko sa mga bugbog.

Kinagat ko ang ibabang labi ko para hindi ako mapasigaw sa sakit. Nagsisimula nang magdugo ang aking mga palad.

"What?!"