لن أحبك

شخصية آسر 💔

ناس كتير كان في خلاف حصل بينا بسبب موت آسر في الرواية وأغلب الكومنتس كان حزينة بسبب موته... وناس كتير من الي قرأوا الرواية معجبهومش إن آسر مات...💔😭

أولًا أنا كمان قبل ما أكون كاتبة أنا قارئة ومبحبش الأبطال اللي بيموتوا في الروايات وفعلًا يمكن أكتر جزء حزين في الرواية هو موت آسر..

آسر بطل ثانوي ليه دور مهم جدًا في نفس الوقت هو في الرواية مثال للتضحية آسر لما مات مفكرش في نفسه كان بيفكر في فريدة ولمياء كان خوفه عليهم، كان دايمًا همه هو البنات أخواته اللي شايف نفسه مسئول عنهم ولازم يسيبهم مع اللي يستاهلهم..

آسر عمومًا من الشخصيات اللي كنت بفكر فيها طول الوقت ومحتارة هكتب المشهد ده أزاي.. كانت حيرتي في أني أخليه عايش وأدهم يخبيه ويظهر في الأخر بس ساعتها كانت هتبقى حاجة تقلديه يمكن أتعملت قبل كدا وكمان هيحصل مشاكل مع لمياء وأدهم لما تعرف إن أدهم خباه ووجع قلبها عليه... كنت بفكر إني أخليه يمسك إيد لمياء وأدهم بعد ما أخد الرصاصتين ويوصيهم على بعض والا فريدة ولمياء وهنا حسيتها أجمل لما يكون بين أكتر أتنين بيحبهم...

ثانيًا موته كان مهم جدًا لقلب الأحداث لمياء خدت خطوة إيجابية وأتحركت ونزلت المقال، فريدة شخصيتها أتغيرت والحزن خلاها تقرب من عيلتها، أدهم ولمياء بقى في مشاعر بينهم وأهمها السند.. لما آسر ضاع منها لاقت أدهم السند بتاعها بقى على طول جنبها ومعاها..

ثالثًا مش معنى إن الشخص اللي بحبه مات حياتي تقف صحيح هي هتقف لفترة كبيرة بس كان لازم نكمل زي ما فريدة كملت بعد موت آسر وقابلت فارس وأتجوزته...

آسر ما ماتش جواهم بالعكس فضل عايش بعد مرور السنين وكمان أدهم ولمياء سموا أبنهم آسر لإن اللي بيموت صعب ننساه الذكرى بتاعته بتفضل في حياتنا...

أخيرًا بقى الرواية دي مش خيالية أحداثها ممكن تحصل في الواقع احنا مبنكونش مُهيئين إننا نفقد حد قريب منا بس ده بيكون عمر وللأسف عمر آسر كان أنتهى..

أسفة لو طولت عليكوا بس كان لازم أوضح وجهة نظري علشان أنا حرفيًا بقيت بتهزق بسبب آسر.. 😭😂 🙏🏻