Dress and Bones ✔ (Zodiac Predators Series #1) [PUBLISHED UNDER POP-FICTION]

Chapter 21

1978

Tulala lamang si Gareth habang nakatingin sa tulog na animnapu't anim na taong gulang niyang ama na si Lucas, tahimik ang buong bahay at sinag ng araw mula sa bintana ng sala ang nagpapakita ng pwesto nito sa sofa.

May dalawang bote ng alak ang nakalagay sa gitnang lamesa ng sala, ang isa ay ubos at ang isa ay mayroon pang laman ngunit wala na sa kalahati, katabi nito ay walang laman na baso na halatang oras na ang tinagal bago muling nahawakan.

Mula sa gilid ng sala ay napalingon si Gareth sa kaniyang ina na si Liva Lagard na lihim lang rin na nakamasid sa natutulog na asawa.

Kita sa mukha ng mag-asawa ang agwat ng kanilang edad, ayon sa alaala at kwento ni Liva kay Gareth ay dalawampu't taon ang tanda ni Lucas kay Liva.

Inilagay ni Liva ang kaniyang mga kamay pahaplos sa balikat ni Gareth padulas sa likuran nito.

"It's his birthday," pabulong na paalala ni Liva sa nag-iisang anak. "Why don't you play a song for him?"

Dumako ang tingin ni Gareth sa grand piano na pagma-may ari ng kanilang pamilya, hindi ito kalayuan sa pwesto ng kaniyang ama. Mula noon hanggang ngayon ay laging naka pwesto ang ama ni Gareth malapit sa grand piano na tila gwardya siya nito.

"But he'll be sad..." 

Bigla namang humigpit ang pagkaka kapit ni Liva sa balikat ni Gareth sa puntong mapaghi-hiwalay na nito ang buto sa balikat ng bata mula sa braso, "He'll be more depressed if his only son doesn't prepare him a present."

Pinaharap ni Liva ang sariling anak sakaniya at ginawaran ng isang matamis na halik sa buhok si Gareth.

Napangiti na lamang ng lihim si Gareth, tila naman nagkaroon siya ng kumpiyansa sa iginawad na halik ng kaniyang ina.

Marahan siyang itinulak ni Liva papunta sa grand piano, habang naglalakad ay hindi inalis ni Gareth ang paningin sa ama.

Talaga bang matutuwa ang kaniyang ama kapag tumugtog siya?

Ngunit sabi ng kaniyang ina ay matutuwa ito, walang sinasabing mali ang kaniyang ina.

"Kukunin ko lang ang cake na binake ko," may halong kasiyahan sa boses ni Liva at iniwan na si Gareth sa harapan ng grand piano.

Pahaplos na inangat ni Gareth ang cover ng piano keys habang pabaling baling pa rin ang kaniyang tingin sa kaniyang ama, kada gagalaw o ba-balikwas si Lucas ay kasing bilis ng tupa ang pag lingon ng ulo nito.

Pinindot ni Gareth ang unang piano key, agad naman siyang lumingon muli sa ama kung nagising ito sa ka-karampot na tunog na nilikha niya.

Nang makitang hindi man lang ito natinag sa kinahi-higaan ay tuluyan nang pinagpatuloy ni Gareth ang pagtugtog.

C C D C F E

C C D C F G

Napakuyom naman ng labi ang walong taong gulang na si Gareth at lumingon muli sa ama, tila naman nag ningning ang kaniyang mga mata nang makitang nakangiti ang kaniyang ama habang nakapikit.