Dress and Bones ✔ (Zodiac Predators Series #1) [PUBLISHED UNDER POP-FICTION]

Chapter 25

Hindi mapigilan ni Isabella na maluha para kay Darwin na humihikbing nakatingin sa bangkay ng ama.

Ang ina naman ni Darwin ay nakayakap sa bangkay, umiiling at tinatanggi ang realidad na patay na ang asawa niya.

Katulad ng mga natagpuang mga bangkay ilang buwan na ang nakakaraan, lasog ang mga buto nito sa magkabilang balikat pababa sa kamay, gayundin sa hita hanggang talampakan. May mga linya rin sa pagitan ng pisngi nito at palibot sa leeg at mga braso.

Kalahating oras ang dumaan nang hilahin ni Isabella si Darwin papunta sa kainan na pinaka-malapit sa morgue. Nag-uusap kasi sila ni Darwin noong hapon nang matanggap nila ang balita. Pasado alas nuwebe na at hindi pa sila nakakakain ng hapunan.

Isang malalim na buntong-hininga ang pinakawalan ni Isabella nang itulak ni Darwin ang wanton mami palayo.

"Bago tayo pumunta ng morgue, sabi mo gutom ka na," puna ni Isabella.

"Sinong hindi mawawalan ng gana sa nakita natin?"

Mula sa pag tanaw sa labas ng bintana napayuko si Darwin.

"Ni hindi ako nakaamin na bakla ako."

"Hindi naman natin inaasahan."

"Masyado akong naging kumportable sa dalawang dekada na pagsisilbi ni papa sa pulisya. Hindi man lang pumasok sa isip ko itong posibilidad."

Pinunasan ni Darwin ang sariling mga luha. "Kagabi pa siya hindi umuuwi. Laking pagtataka namin ni mama na wala pa siya nang hapunan."

Inilapit na ni Isabella ang baso ng tubig sa harap ng kaibigan.

"Hindi ko naisip na baka nasa isang parte siya ng barangay, nag aagaw-buhay, habang ako, iyon, chill lang na kumakain ng paborito niyang ulam." Napaubo na si Darwin. "Iniisip ko pa lang ay bumabaliktad na ang sikmura ko."

Naputol ang pag-iyak ni Darwin nang tumunog ang cellphone ni Isabella. Nang kunin ito ng dalaga at makita ang mensahe ng kanyang ina, dali-dali siyang bumaling muli kay Darwin.

"Gusto mo bang sainyo ako matulog?" tanong ni Isabella.

"Gaga. Ano namang gagawin mo sa bahay?"

"Makipag-kuwentuhan sa iyo," sagot ni Isabella, "Noong namatay si Dove ay ginawa rin naman natin iyon."

Natawa ng bahagya si Darwin, "Shih tzu si Dove. Alam kong bulldog ang tatay ko pero ama ko yong pinatay Isabella. Hello."

"Hindi ko naman sinasabing kapag natulog ako sa inyo ay mawawala ang sakit. Magpapakuwento lang ako sa iyo."

"Low key ka ring chismosa e." Namumula ang mga mata ni Darwin."But, yes please, sa tingin ko kailangan ko nga ng ka-kuwentuhan. Paniguradong magdu-duet kami ni mama kakaiyak kapag mag-isa lang ako."

"Sino pala maghahatid sakanya pauwi?"

"Babalikan natin sa morgue malamang. Baka nandoon na si Curie" tukoy ni Darwin sa bunsong kapatid na medtech sa Makati, "kasama 'yong anak niya."