ချည်တိုင်

27

Background music for this paragraph 🌺

'La Jeune Fille en Feu' by Para One & Arthur Simonini (from Portrait Of A Lady On Fire)
သီချင်းနားထောင်ရင်းဖတ်မယ်ဆိုရင် ဒီအပိုဒ်မဆုံးမချင်း repeat လုပ်ထားပေးပါ။ 🤎 အောက်တစ်ပိုဒ်အတွက်ကိုလဲ အဲ့အပေါ်နားမှာ ထပ်ထည့်ပေးထားပါတယ်။ သီချင်းနှစ်ပုဒ်ကို List အရင်လုပ်ထားချင်ရင်တော့ စာမဖတ်သေးပဲ ကျော်ခွပြီး သီချင်းနာမည်ကိုအရင်ကြည့်လိုက်နော် ^^

-ချည်တိုင်-

အထက်တန်းကျောင်းတက်တုန်းက အမေအိမ်ပြန်မလာတဲ့ညတွေဆို Jisoo ဟာ စာကျက်ရင်း စောင့်တတ်တယ်။ အဖေကတော့ စာလုပ်ပြီးတာနဲ့အိပ်ဖို့ဖြောင်းဖျပေမယ့် အမေက အဖေ့ကို မချစ်နိုင်ဘူးဆိုတာ Jisoo မယုံပါဘူး။ နေမကောင်းတဲ့သူငယ်ချင်းကို သွားပြုစုပြီး အချိန်တန်ရင် မိသားစုဆီပြန်လာမယ့်အမေလို့ပဲထင်နေခဲ့တယ်။ တစ်လမှာ သုံးလေးခါလောက်တော့ အမေအိမ်ပြန်လာတတ်တယ်။ နွမ်းနယ်နေတဲ့အမေဟာ သူငယ်ချင်းမကို စိတ်ပူတတ်လွန်းစွာနဲ့ အိမ်ပြန်လာလဲ ဖုန်းပြောနေတတ်တယ်။

"နေကောင်းသွားမှာပါ"
"ငါတို့အတူရှိနေတာပဲ ဘာမှထပ်မဖြစ်လာပါဘူး"
"ခက်ခဲတယ်ဆိုပေမယ့် ငါ့ကိုယုံပါ"

မီးဖိုချောင်ထဲမှာ အဖေနဲ့ Jisoo ဖို့ ညစာပြင်ပေးတဲ့အချိန် အမေပြောနေတဲ့စကားတွေကို နားထောင်ကြည့်တိုင်း အမေဟာ သူချစ်ရတဲ့သူ ဘယ်သူဆိုတာ အတိအကျ သိနေတဲ့လူတစ်ယောက်လို ယုံကြည်ချက်တွေပြည့်နေခဲ့တယ်။

ရံဖန်ရံခါ အဖေက "ငါဘာလိုအပ််ချက်တွေရှိနေသလဲ" လို့ အမေ့ကိုမေးနေတာကြားတိုင်း Jisoo ကပဲ အမေ့အစား ခေါင်းခါပြမိတယ်။ ဟင့်အင်း .. အဖေဟာ ဘာလိုအပ််ချက်မှမရှိပါဘူး။ Jisoo ကို တည်တည်ငြိမ်ငြိမ်မိန်းကလေးတစ်ယောက်ဖြစ်အောင်၊ မိသားစုကို တွယ်တာတတ်အောင်၊ မိသားစုအပေါ်သိတတ်အောင် အမြဲသွန်သင်ပေးခဲ့တဲ့အဖေ။ စာအုပ်ဆိုင်မှာ ဘောင်းဘီတွေအရောင်နွမ်းတဲ့ထိ ထိုင်ရင်း ရသမျှပိုက်ဆံ Jisoo အတွက် သုံးခဲ့တဲ့အဖေ။

အမေထွက်သွားတဲ့နေ့က ပြောခဲ့တဲ့စကားကိုမှတ်မိသေးတယ်။
"ရွေးချယ်စရာတွေရှိတဲ့ဘဝမို့လို့ ရွေးခွင့်ရနေတုန်းမှာ ကျွန်မသူ့ကိုရွေးချယ်ချင်တယ်" တဲ့။ အရွေးချယ်ခံဘဝမျိုးမရခဲ့တဲ့အဖေဟာ အမေ့ကို တားတယ်။ Jisoo က အမေ့ကို ထွက်သွားဆိုပြီး နှင်ထုတ်ရင်း ကိုယ်တိုင်ကပဲ ဦးအောင်ထွက်လာသူဖြစ်ခဲ့တယ်။ Chanel မှာ အလုပ်မရခင်တုန်းက ရရာအလုပ်ကိုလုပ်ပြီး အဖေ့စာအုပ်ဆိုင်ကို ခဏခဏသွားတယ်။ အဖေခဏခဏသတ်သေတယ်။ ဒါပေမယ့် အဖေမသေခဲ့ပြန်ဘူး။ အဖေ့မှာ ဒီဝဋ်ကို မကြေမချင်းဆပ်ရမယ့်ကံ ပါပုံပဲ။