ست الحسن ( الجزء التانى )

الفصل الثانى عشر

كلنا فينا الخير والشر،  وزى ما ربنا وزع لنا ارزاقنا كمان جعل لنا عقل نفكر بيه ونميز بين الكويس والوحش ، واحنا اللى بنختار الطريق اللى نمشى فيه بأرادتنا ، ان كان خير او شر ، لكن تظل نفوسنا ضعيفة قدام الإغراءات اللى بتقابلنا .

نزلت " نجلاء " من الدور الثاني لقت والدتها و"ياسين" وولادها التلاته بيفطروا عالسفره ..
- صباح الخير يا عليكم .. انتو بيتفطروا !
نورا بهزار
- لا بنلعب ههههه
كشرت لها نجلاء وهى بتتقدم وتقعد على كرسى جمبهم
- ياختى خفه.. فيشتك عايمه انتى عالصبح .
ضحكوا كلهم حتى ياسين .. فخبطها وائل على جبهتها بخفه.
- مش تحترمى والدتك بابنت انتى .
صرخت التانيه
- اه .. لم نفسك ياوائل
رد التانى عليها بضحك .
- وان مااحترمتش هاتعمليلى ايه بقى .
زعق ياسين بصوت عالى
- يووه ياولاد... اعملوا احترام للوكل جدامكم .
صباح كمان
- على رايك يابوى .. ما ينفعش كده تناجروا فى بعض ..حتى عالوكل .
مصمصت نجلاء بشفايفها وهى سانده بايدها عالطرابيزه .
- خلف تكسف .. جاتكوا نيله انتوا الاتنين .
رد الولد الصغير ميدو
- بس انا مؤدب ياماما عشان باكل وانا ساكت .
- طبعاً ياروح ماما انت .
قالتها نجلاء وهى بتضحكله وبتلعب فى شعره
فكلمتها والدتها
- سيبى يابتى شعر والدك وافطرى.. مش وجت دلع دلوك .
اللتفت لها نجلاء تجاوبها
- ما انا فطرت ياماما الصبح بدرى مع سامح قبل مايخرج .
وائل مندهش
- بابا بدرى طب ليه ؟.. هو لحق يرتاح من السفر .
صباح
- صح يابتى .. دا انا مرضيتش انده عليكى واصحكيى عشان خاطره هو .
ياسين وهو مستغرب
- طب مجالكيش رايح فين ؟
مطت شفايفها قبل ماتتكلم
- قالى انه هايقابل واحد من اصحابه.
عقد ياسين حواجبه بدهشه اكبر .
- اصحاب مين ؟ هو جوزك ليه اصحاب اساساً فى البلد اللى سيبها بجالوا سنين طويله !
نورا بسعاده .
- يمكن ليه ياجدى وانت ماتعرفوش .. اهم انه هايخلينا نقعد فى البلد كام يوم تانى . دا انا فرحانه اوى !
..........................