သာယာရိုးရှင်းသော ဘဝ {မြန်မာဘာသာပြန်}

အချပ်ပို (၁) နှစ်သစ်ကူး || ႏွစ္သစ္ကူး

{Unicode}

ကျိုးကျင်ရှင်းသည် သူ့သားအား ပွင့်ပွင့်လင်းလင်း လွတ်လွတ်လပ်လပ် ပြောဆိုသည်ဟူသောအဓိပ္ပာယ်ရသည့် ကျိုးချန်းရန်ဟု အမည်ပေးထားသည်။

တင်းရှောင်းဝေက အလွန် ခရော်ခရွတ်နေတတ်သူဖြစ်သည်။ နေ့တိုင်း ထိုသားအဖကို တွေ့နေရသော်ငြား ကလေးအား ရန်ရန်ဟု ခေါ်သည်ကိုသာ ကြားဖူးပြီး ကလေးက ပါပါးဟု ခေါ်တတ်လာသည့်အချိန်အထိ ကလေးအမည်ကို မေးရန် တစ်ခါမှ မစဉ်းစားမိဖူးပေ။

တစ်နေ့ သူ မည်သို့စိတ်ကူးရသည်မသိ၊ ရန်ရန်၏အမည်ကို မေးလိုက်သည်။

ကျိုးကျင်ရှင်း သူ့ကို ပြောပြပြီးနောက် ဤအမည်နာမက အတော်လေး စိတ်ဝင်စားဖွယ်ကောင်းသည်ဟု ထင်မိသောကြောင့် မည်သို့အဓိပ္ပာယ်ရကြောင်း သူ ထပ်မေးလိုက်၏။

ကျိုးကျင်ရှင်းက ရန်ရန်၏ အသားတစ်တစ်လက်မောင်းကလေးများကို အင်္ကျီလက်လျှိုဝတ်ပေးနေပြီး သူ့မေးခွန်းကို ကြားသည့်အခါ ပြုံးလျက် ပြန်ဖြေသည်။
"ကျွန်တော့်တရုတ်နာမည်ကို ကျွန်တော်ကျိုးအိမ်တော်ကို ပြန်ရောက်တုန်းက အဘိုးက ပေးခဲ့တာ။ ကျွန်တော့်ရဲ့ စကားအပြောအဆို လုပ်ပုံကိုင်ပုံတွေကို သတိကြီးကြီးထားဖို့ ပြောခဲ့တယ်လေ။"

တင်းရှောင်းဝေ အတော်လေး ကျောချမ်းသွားမိသည်။ ကျိုးကျင်ရှင်းထံတွင် အမုန်းတရားမည်မျှ ရှိနေမည်ကို သူ သိချင်မိ၏။ အပြင်ပန်းတွင်တော့ သူ(ကျင်ရှင်း)က အထက်တန်းကျသည့် လူကြီးလူကောင်းတစ်ယောက်သဖွယ် အမြဲပြုမူခဲ့သော်ငြား တကယ်တော့ ရက်စက်ပြီးအသည်းမာသည့်လူစားမျိုး ဖြစ်သည်။

မစ္စတာကျိုးသာ ဤကဲ့သို့သောအမည်နာမမျိုးကို သိသွားပါက ဒေါသကြောင့် ထပ်ပြီးဆေးရုံရောက်ဦးမည်လားမသိ။

တင်းရှောင်းဝေလည်း ကျိုးကျင်ရှင်းကို ပြုံးဖြီးပြလိုက်ပြီး မည်သည့်မှတ်ချက်မျှ မပေးဘဲ တစ်ဖက်လှည့်လိုက်တော့သည်။

ကျိုးကျင်ရှင်း အံ့ဩသွား၏။
"ဘာဖြစ်လို့လဲ၊ မကောင်းဘူးလား။"

တင်းရှောင်းဝေ အသည်းအသန်ခေါင်းညိတ်ပြလိုက်သည်။
"ကောင်းပါတယ်၊ ဘာပဲဖြစ်ဖြစ် မင်းတစ်ဘဝလုံး ပေးဆပ်သွားရမှာမဟုတ်တာကတော့ တော်တော်လေး စိတ်တိုစရာကောင်းတယ်။ ကျိုးအာ ကျိုးအာ... မင်းက တော်တော်ဘဝနာတာပဲ။"