صاحب

٢٠

يشقى المرء برقة قلبه"

:ليش؟
رد بتردد، وواضح انه يبي يغيب شي
:بس..ممكن فوبيا او شي؟
:هممم،طيب وصلنا
فكيت الحزام،وهو شال اغراضة،نزلت من السيارة وانا امدد عظامي ياخي جلسة السيارة تالم
قلت بتنحيزه:جهز فلوسك يلا
:مجهزهم،اشفيك محسسني كاني حرامي؟
:اشفيك،امزح معاك،لاتاخذ كل شيء بجدية!
رد وهو مو مشتهي:طيب
دخلنا،كان المكان هادي ومشغلين موسيقى هديه،وديكورهم مسوينه بطابع قديم ،ومافيه احد مافيه الا ناس قليلة احسن شي
خذنا لنا طاوله وكرسيين بالزاوية،سالني
:وش تبي تطلب؟
:ابي قهوة فرنسية بالبندق
:اوك
وقام،دقايق بس ورجع بيده كيكة عليها شوكولا،خير ليه ماجاب لي شي معاه!
ضليت اطالع فيه،كان ياكل فيها اشوي رفع راسه يطالع فيني
:تبي؟
:ليش ماشريت لي!
:انت ماقلت تبي.
:والله!،عادي موشرط اقول
:اصلا انت تحب الحلويات؟
:لا
قال بنرفزة :اجل اشتبي مناشبني؟!
:عادي مو شرط شي حالي،ممكن كوروسان بالجبن،او شي كذا
قام وهو يتافاف:اففف،بقوم اجيب خلاص
مسكته من يده:اهجد ياولد امزح ،امزح اشفيك تتنرفز بسرعه؟
دقايق جا الرجال وحط الطلب على الطاولة،القهوة الفرنسيه قدامي،وقدامه هو سلاش
قلت باستغراب من الي طالبه:ليش ماطلبت لك قهوة؟
تنهد وقال :مانمت زين من كم يوم الارق كان صاحبي،وما ابي اشرب قهوة عشان انام
:اها،طيب خذت حبه بندول؟
:لا،ليش ؟
:اكيد راسك مصدع؟
:مب حيل
:يعني مصدع؟
:لا،اقولك مب حيل!
عصبت وقلت بصوت عالي:يعني اشلون!
سكت ونزل راسه،وقال بهمس:آسف
تنهدت،ياخي مايصلح كذا على اي شي يعتذر!
شربت اخر قطرة من القهوة وقلت:قوم
:وين؟
:قوم وانت ساكت
شال السلاش حقه وقام،طلعنا وركبنا السيارة .

مرتضى

سالني انه ليه اخاف من الصراخ؟،انا من يوم كان عمري ثمان سنوات الي هو بعدالحادث ويوم عشت مع ابوي،قمت اخاف من الصراخ والهواش،لاني كل يوم انام واجلس عليه ادري المفروض تكون عندي مناعه بس لا صار عندي خوف كبير منه لدرجة اني اتراجف اذا صار احد يصرخ علي،او يتهاوش معاي،طيب احين؟ تخيلوا اقوله انه ابوي يصبحني على ضرب وصراخ،وانه في الفترة الاخيره خف؟ لا،لا سلامات؟ ليه اقوله؟
ماقلت له تفاصيل ثانية،وصلنا وشربنا،ويوم قلت له ان فيني أرق فجأة عصب اشفيه؟ نزلت راسي وانا خايف،وش يضمن لي انه مب يضربني؟،انا هنا لحالي معاه مثل اي وقت انا بلحالي فيه،يمديه يضربني!،صرت اخاف اجلس لحالي مع اي احد كان
تنهدت قالي بلهجة غريبة
:قوم
قمت معاه،ركبنا السيارة،فتحت جوالي دقيت على زياد بالموت رد بعد
شتبي داق؟:
:ابد داق ابيك تلعب معاي بتجي؟،يعني ليه داق بالله!
وانا اشدرا امي ليه داق؟:
:هد الهذره واسمع وش بقول،راسي مصدع مر خذ فاطمة في بيت عبد الفتاح ابو سمر
وانا وش دخلني؟ انت الي موصلها!:
قلت بصوت عالي،بينت فيها بحتي:احين اقولك راسي مصدع تقولي انت الي موصلها! طيب وش فيها اذا انت اخذتها؟ فيها شي؟ تراها اختك بعد ولا متبري منها وقت الشغل؟! وتقطها على السواق الي هنا!.
والله حسيت اني مضغوط حيل والصداع بعد زايد علي
بسم الله اهجد ،اهجد خلاص باخذها انا اكلتني بقشوري!:
وسكر،صرخت على الجوال:احسن،انقلع بس
وقمت اتنفس بقوه،حاولت اهدي روحي واخذ نفس
ناظر فيني بصدمة:معصب يعني الحين؟
:اسكت لا اهبدك انت بعد
:ول ول ول شالسالفة؟،اشدعوه كل ذا عصبيه؟
:ترا والله مالي خلقك!،سوق وانت ساكت!
:إن شاء الله عمي،شرايك احب راسك بعد؟
:لا،بس لو تكرمني بسكوتك افضل!
عطاني ذيك النظره الي صج بيقتلني فيها:اكرمك بسكوتي هاه؟،كف يسنع ذا الوجه.
خفت ولفيت راسي على طول استوعب وش قلت،اشوي الا نزل البقالة
افف،بيطول ذا وانا راسي يعورني،دقايق وجا وبيده كيسه زرقا وحطها عندي
:خذ
فتحتها،شكولاته بندول
نطقت بدهشة،انه بسم الله ليش شاري لي وانا الحين متهاوش معاك؟!
:ليش؟
مارد،طولت صوتي قلت يمكن ماسمع
:ياخي خلاص لا تسال خذ وانت ساكت!
طالعت في وجهه،اما منحرج؟ ههههههه شكله يضحك
:ليش تعبت عمرك،اذا وصلت البيت اخذت مايحتاج..
قطع كلامي:اكتشفت انك تحب الشكولاته وجبت لك،وجبت معاه بندول عشان ماتصج راسنا وتقعد تحن انه راسك يعورك
طالعت فيه اشوي الا قمت اضحك،اول مره احد يكتشف اني احب شي شعور حلو،واول مره اشوف احد منحرج كذا شكله يضحك
:ليش تضحك؟
:بس،قاعد تحاول تغيب مشاعرك
:وش قاعد تخربط انت؟ شكله الصداع اثر على مخك
قمت اضحك بهستيريه اشوي الا هو قام يضحك معاي.
يتبع...