صاحب

٧١

ومالي أراك في كُل الوجوه؟
أغزوت عَيني أم غزتك الأماكن!
لِماذا أراك في كل شيء ؟
كأنك في الارض كل البشرِ.

جات الفجيعه الي فجعتني،كلام ليث مع أدلته المزعومه
جاني وهو يركض مفجوع:صالح!،تخيل وش سمعت
:وش؟
:مرتضى..مرتضى كان يسب في كميل ويقول انه خذاك منه وانه هو السبب،وكان معصب حيل لانك ماخذه بديل!،لدرجة سمعته..
وسكت وهو متردد،قلت بغضب:كمل؟!
همس:سب امك ودعى عليها بالموت!،وزيادة دعى على كميل بالحرق في جهنم!
تكلمت وانا متجهم:وش الدليل على صحه كلامك؟
نادى واحد كان يمشي:وليد صح سمعت مرتضى يسب ام صالح ويدعي عليها بالموت؟ويدعي على المرحوم بالحرق؟
:ايه!،وبعد ازيد يقول انه كان يستغل صالح عشان يوصل لمبتغاه!
ضيقت عيوني:وش مبتغاه؟
قال بنبرة غامضة:يلبسك تهمه،جريمة هو سواها!،كان يتكلم مع لؤي بذا الشيء!
صح وليد؟
:ايه!،كانت تهمه تح.رش او مخدرات!،شي كذا!
حط ليث يده على كتفي:انا اعزك يا صالح وخايف عليك،انتبه لنفسك
بعد الغالي كميل راح مابحتمل انك تروح انت بعد!
دخل الشك في نفسي،يمكن كلامهم صحيح وممكن لا!
من اول ماجا لؤي ومرتضى منجذب له فجأة!
يمكن لؤي وسوس له!،او ممكن..مرتضى هو راس الشر!
انا قايل هالعلاقة لازم ينحط لها حد!
ماقدرت امسك نفسي،تقرفت منه ،كان لاصق فيني كاني روحه مع ان الفترة الي تعرفنا فيها على بعض قصيرة
بس..احس صار اكثر من شخص!
صار روح!
كيف كذا هو يمثل زين؟،كيف يخوني كذا عشان يلبسني تهمه ملعونه؟!
ليه يكذب،ووش مصلحته من الكذب
فعلا الوجه البريء ينجيك من مصايبك،حيله وانطلت علي،مارح اعديها لهم!
قطعتها،كان يناظرني بنظرات مكسورة
لكن لا ياحبيبي لايلدغ المؤمن من الجحر مرتين،يخسى هو مع صاحبه يضحكون علي!
رحت وتركته كنت ناوي ان نطلع مع بعض،اسوي له جو،لان كان واضح انه متضايق،يشرد دايم،وبعض الأحيان يمسح على يده الي كانت مجبره!
وضعه كان محزن،محزن بطريقة تألم القلب
بس من بعد السالفه مابينا اي احتكاك ابدا
هو بطريق وانا بطريق،وهذي النهاية
شخص عابر وراح،شخص علمني اني ما اتعاطف مع اي احد ابدا،ولا اتخذه مكان احد اخر
شخص انخذلت منه ومن تفكيره،وبعدين اصلا هو كيف عرف ان كان كميل موجود؟
كيف عرف انه هو متوفي؟!
انا مازلت مو مصدق كيف كذب علي ويتكلم من وراي!
رحت على طول للمقبرة،جلست جنب قبرة امسح عليه،قريت الفاتحة وطلعت جوالي اقرا له كم شي واثوبه له،ترحمت عليه
وبدات سلسلة شكاوي:رحت..وراح كل شيءمعاك،انت تدري اني كنت ابتسم كثير واضحك..بس معاك!
واني ما ادخن..معاك،الان كل شيء تغير..تخيل اني شفت واحد يشبهك!
وفجأة صار انت!،لا تسال كيف،صرت اشوفك في كل مكان
لكن للاسف طلع كذاب ومصلحچي،وممثل بارع هو وصاحبه الله يسلط عليهم!
بس اوعدك اني راح انتقم!،انتقم اشد انتقام
تنهدت
:كنت اتمنى ياصاحبي تكون معاي،تشوف كيف طلع لي اخو من اللامكان فجأة،كرهت كل شي!
ابوي يقول لي لازم اعترف فيه كأخ،وانت تدري ان انت الاخ الوحيد لي،طبعا جواد معاك
لكن فقط انت،انت الاول والأخير،مضطر اني اتقبله عشان ابوي..تصدق ابوي يقول انه ماكانوا يكلموني خوفا من مايرتفع سكري واطيح عليهم
احسني صرت عاله،انت تدري اني ما احب اعبر عن مشاعري،ولا احب الدراما الزايده،شوفني من بعدك صرت اعيش في الدراما
اكره هالشي!
سكت اشوي،قلت بضعف وقلة حيله
:كميل..مارح ترجع لي؟!
تنهدت بغصه،وقمت نافض ثوبي
:استودعتك الله
فتحت جوالي على تشعر وصلني من حساب غريب

:صالح

:ابي اصرح لك بشي 😉

                             من معي؟:
:انا فاطمة
:اكتشفت ان عندي مشاعر اتجاهك

                     عفوا اختي؟😀:

مين فاطمة؟ فيه ملاين الفاطمات حول العالم :
         من اي قارة جايتني انتي؟:

فجعتني بردها

:اخت مرتضى

تخطيت كل شي الا انها تطلع اخته!،مدري ليه بعد اثنينهم من نفس البطن!
هو بامكاني اني العب عليها واذوقها الويل واخليها تموت حسرة،ويموت اخوها عليها
بس ذكرت،ان حسابي مع اخوها مو معها

والي يرضى على بنات الناس يعني يرضاها على اهله
والفئة الي تفهم بتفهم معنى كلامي
هذا اولا،وثانيا واضح انها مراهقه وماتعرف وين ارضها وسماها
واذا كبرت راح تندم على ذا الشي،ولو انها راحت لواحد ثاني شي طبيعي بيلعب فيها لعب وبيخليها تعيش في ندم وقلق طول العمر
بس ماش مافيه فايدة
الشيوخ تعبوا وهم يقولون ان هالعلاقات محرمه وفاسده!
والخلق تعبوا وهم يحذرون من الثقه بالغرباء.

دقايق ورسلت لي صورة،للعلم اني ماطلبت شي!
لو اني متعوذ من الشيطان وتركتها تولي ابرك لي!
صورتها!
قفلت بسرعه،وانا استغفر ربي من الي شفته
لحت الجوال لاخر السيارة
اعوذ بالله من النفس الأمارة بالسوء
رجعت البيت،دخلت وانا احس اني مرهق كليا
احتاج ماي دافي يدفي اطرافي من هالبرد،وبدله او بجامه وسيعه تخليني انام براحة
صادفت هشام لابس ثوب وغترة،وامي لابسه عبايتها
:يلا صالح اجهز بسرعه بنمشي
:وين؟
عارف وين بس قاعد استغبي
:بيت جدتك،بنتغدى هناك
:اف،ما ابي اروح!،مالقيتوا الا هاليوم الي نفسيتي فيه تبن؟
قالت بحزم:لا تتافف ويلا اخلص،ابوك ينتظر برا!
ياربي،كنت باستمتع وبستريح مدري ليه فجأة صار كل شي عكس!
يتبع...