မနက်ဖြန်ရုံးချိန်းအတွက် ရုံးခန်းမှလိုအပ်တဲ့ ဖိုင်တစ်ချို့ကိုဝင်ယူပြီး ရုံးခန်းတံခါးကို သော့ခတ်လိုက်သည်။ အကူဝန်ထမ်းတစ်ယောက်သာရှိသည့်ရုံးခန်းသည် ကျယ်လွန်းသည်တော့မဟုတ်။ အထောက်အထားတချို့ကိုသိမ်းထားသည်လွဲ၍ အမြဲမပြတ် အပြင်သွားလာနေရသလို၊ အိမ်မှာသာအချိန်ကုန်ဖြစ်သည့်သူက ရုံးခန်းသို့ဆယ်ခေါက်တစ်ခေါက်တောင်မရောက်ဖြစ်။
"အစ်ကိုရယ် ရုံးခန်းငှားခကို အလကားပေးနေရမှာပေါ့" ဟု အကူကောင်လေးက ညည်းလာသည့်အခါ သူခပ်ပြုံးပြုံးသာ တုံ့ပြန်ဖြစ်သည်။ ထိုရုံးခန်းသည် ချစ်လှစွာသောဖခင်က ပေးထားသောနေရာဖြစ်သည်။ ဒီထက်ကောင်းတဲ့နေရာတစ်ခုကိုစီစဉ်ပေးပါသော်လည်း သူမလိုချင်။ ရှေ့နေရုံးခန်းထက် ရှေ့နေကပိုပြီးကြည့်ကောင်းနေတာပဲ။ ဘာလိုအုန်းမလဲ။
steeringကို ဘယ်ဘက်ဝိုက်ချရင်း မြေအောက်ကားပါကင်၌ ကားကိုနေရာချလိုက်သည်။ ပြီးမှ ထိုနေရာရှိ ဓာတ်လှေကားဖြင့်သာ တိုက်ခန်းသို့ တက်ရသည်။ ရုံးခန်းအစ ကားအဆုံး ဖခမည်းတော်ကစီစဉ်ပေးထားသော်လည်း ဒီကွန်ဒိုတိုက်ခန်းလေးကတော့ သူလစာဖြင့်ဝယ်ထားသောနေရာလေးပင်။
Passwordဖြင့်ဖွင့်ရသော တိုက်ခန်းတံခါးလေးဖွင့်လိုက်သည်နှင့် ဖိနပ်ချွတ်သည့်ဆင်ဝင်တွင် လူရှိသည်ကြောင့် မီးကအော်တိုလင်းသွားသည်။ ဖိနပ်ချွတ်ပြီးဧည့်ခန်းထဲဖြတ်လျှောက်လာမှသာ ဆင်ဝင်မီးကပြန်ပိတ်သွားသည်။ ညစာလည်းအပြင်မှာစားခဲ့ပြီးပြီမို့ အိပ်ခန်းဆီသို့တန်း၍ဦးတည်လိုက်သည်။
နံရံကပ်မီးခလုတ်ကိုနှိပ်ဖွင့်လိုက်ချိန် အဝါရောင်ခပ်ဖျော့ဖျော့မီးရောင်လေး လင်းလာသည်။ အိပ်ခန်းတွင် စူးနေအောင်တောက်သည့်အလင်းရောင်မျိုးကိုမကြိုက်သည်မို့ စိတ်ကြိုက်ဝယ်လဲထားခြင်းပင်။ ဖိုင်တချို့ပါသည့်လက်ဆွဲအိတ်ကို ခုတင်ပေါ်ပစ်တင်လိုက်ရင်း ခုတင်ဘေးမှ ကိုယ်လုံးပေါ်မှန်ရှေ့ရပ်လိုက်မိသည်။ အင်္ကျီလဲရန် ကုတ်ကိုဆွဲချိတ်လိုက်ချိန် နှလုံးသားတည့်တည့်နေရာမှ ရွှေရောင်badgeလေးကို သတိထားမိသွားသည်။
