"මං කියන්නම් වෙච්ච දේ" පොඩී කතාවට මුල පිරුවා.
.....................................................
"තාත්තේ මේක ඇති දැන්. මට මගේ වෙඩින් එකටවත් පොඩ්ඩව ගෙනල්ලා දෙන්න" තාත්තා උදේ පාන්දර පත්තරේ බල බල ඉන්නකොට චූටි හොටෙල් එකේ ඉඳන් ඇවිල්ලා එහෙම්මම පුටුවක් ඇදන් වාඩි වෙලා කිව්වා. ලොකූත් ගිහින් එතනින් වාඩි වුනාම තාත්තා පත්තරේ අකුලලා පැත්තක තිබ්බා.
"මං කියලා තියනවනේ ඕක ගැන මේ ගෙදර කතා කරන්නෙපා කියලා." තාත්තා අහක බලාගෙන කිව්වා. මමත් ටයි එක බුරුල් කර කර එතනට ගියේ මේක අද දෙකෙන් එකක් විසඳගන්නවා කියලා හිතාගෙනමයි.
"කතා නොකර කොහොමද තාත්තේ....ඒ ඔයා වැඩියෙන්ම ආදරේ කරපු පුතා නෙමෙයිද?" ලොකූ ඇහුවේ අනුකම්පාවෙන්. "ඒ අපේ සුදූ තාත්තේ. මේ ගෙදර මිනිස්සු හැමෝම විවාදෙකින් තොරව වැඩිපුරම ආදරේ කරන්නේ ඌට. අපේ හිනාව ඌ ලඟ තාත්තේ."
මං ගිහිල්ලා තාත්තගේ කකුල් දෙක ගාවින් ඉඳගන්නකොට අම්මත් ඇවිත් එහා පැත්තේ පුටුවෙන් වාඩි වුනේ ඇස් වල කඳුලු පුරවගෙන.
"මොකද්ද තාත්තේ සුදූ කරපු වැරැද්ද? අපි හැමෝගෙන්ම හොඳටම ඉගනගත්තේ එයා. තාත්තා බලාපොරොත්තු වුන විදියටම එයා ජීවිතේ හදාගත්තා. කොල්ලෙක්ට ආදරේ කරන එක ඒ තරම් වැරැද්දක්ද තාත්තේ?" මං තාත්තගේ දණිස් දෙක උඩින් ඔලුව තියාගෙන ඇහුවා.
"දැන් විහාශිට හම්බෙන්න ඉන්න මගේ දරුවා.....එයත් එහෙම කෙනෙක් වුනොත්. එයත් කොල්ලෙක්නේ. තව කොල්ලෙක්ට ආදරේ කරොත්....තාත්තා තාත්තගේ ලොකුම මුණුපුරාව අතෑරලා දානවද?" තාත්තා කරකියාගන්න දෙයක් නැතුව ලොකූ දිහා බලන් හිටියා. කවදත් අපේ ගෙදර දේවල් වලදි ලොකූ ගත්තේ තාත්තාගේ පැත්ත.
"ඌ උගේ හිත නැවතුන තැන නැවතිච්ච එක වැරදිද තාත්තේ? යශ් ඌට කන්ෆෙස් කරන්න කලින් සුදූ මගෙන් ඇහුවා. මං එපා කියනවනම් එයාව අතාරින්නම් කිව්වා තාත්තේ. ඒ තරම් එයා ආදරෙයි කිව්වා අපිට. මං එපා කිව්වොත් අමතක කරලා ජීවිත කාලෙම තනියම ගෙවන්නම් කිව්වා. එයා ඒ තරම් අපිට ආදරෙයි. අපි මේ කරන්නේ වැරැද්දක්" ලොකූ ආයෙම තාත්තගේ අතින් අල්ලගෙන කිව්වා. මුලූ වෙලාව පුරාම තාත්තායි අම්මයි මොනවත්ම නොකියා අපිට ඇහුම්කන් දුන්නා. "අන්තිමටත් ඌට ලේ ගිහින් වැඩිවෙලා සිහිය නැතිවෙන්න ඔන්න මෙන්න තියෙද්දිත් මට කිව්වේ තාත්තව බලන්න කියලා." ලොකූ ඒක කිව්වම තාත්තගේ ඇස්වලින් කඳුලු වැටෙන්න ගත්තා.
YOU ARE READING
Drizzle
General Fictionරළු දෙඅත'තර ගැවසෙමී නුඹෙ ආලේ තරමත් දන්නෙමී මුදු වදන් දෙන්නෙමී නුඹ අහිංසක බව දන්නෙමී _කොල පාට ඇස්_ තුරුල්ලේ සඟවමී නුඹව කාටත් නොමදෙමී රැකගමී තුටු කරනෙමී නුඹ මගෙම බව සපථ කරනෙමී _රත්තරන් ඇ...
