ماطلبت عذرك أنا نفسي عزيزة

Part : 13

صحى سياف بتعب والكل نايم ناظر لترف وقاس حرارتها وشافها طبيعيه ابتسم وراح يتروش بس كان في حد جالس يتروش ناظر لهم يشوف من منهم صاحي وكان سعود ابتسم وراح غرفته يتروش هناك
سعود طلع من الحمام بعد ماتروش وناظر وحصل سياف مب بموجود استغرب وراح يلبس ملابسه قرب من ترف وقاس حرارتها وتطمن عليها راح يدور سياف
وشاف باب غرفته مفتوح عرف انه يتروش ابتسم بهدوء وطلع برا البيت وقف بالحوش وهو يتامل الغيوم اللي مغطيه سماء  ام سعود كانت طالعه للحوش وشافت سعود ابتسمت بحنيه : وش مصحيك ياوليدي بذا الوقت
سعود لف ببتسامة وحب راس امه : ابد يالغاليه من رحنا المسجد وصلينا الفجر  ماجا لي نوم والواضح خذيت كفايتي من نوم
ام سعود بحنيه : بالعافيه عليك ياحبيبي
سعود : وش مصحيش يمه لحينه ساعه توها خمس
ام سعود: بنصلح العجين حتى نصلح الخبز وانا امك
سعود : وشوله يمه كل هالتعب كنتو علمونا طيب نجيب لكم خبز
ام سعود : لا ياوليدي ودنا نسويه اليوم حنا
سعود: براحتش يمه سوي اللي يريحش تبغين حاجه ناقصكم حاجه اجيبها ؟
ام سعود : لا ياحبيبي بس ياليت تعبي لنا مويه من البير
سعود ببتسامة: ابشري يالغاليه
ام سعود ببتسامة: الله يرضى عليك ياوليدي
سعود ابتسم وراح يعبي مويه من البير
طلع سياف من الحمام ولبس ثوبه دخل غرفتهم وماحصل سعود وكان شخير متعب عالي
تنهد سياف وراح يشوف ترف لو بعدها تعبانه
حس بحراره فيها  شالها وهو يدور مفتاح سيارته
خذاه وراح لسيارته بذاك الوقت كان سعود يعطي المويه لا امه وطلع راجع للحوش شاف سياف شايل ترف ولحقه بسرعه
سعود وهو ينادي : سياف سياف
سياف لف وجهه لسعود وهو يقول :  اركب بسرعه ترف مسخنه
سعود قلق على ترف وركب السياره في المعقد الامامي سياف عطى ترف لسعود ،،،، وسعود اخذ ترف بحضنه وهو يسمي بالله عليها ، سياف حرك سيارته بسرعه
تنوف كانت توها صاحيه تناظر من شباك غرفه هتان
شافت سعود وهو يتامل سماء ويوم امه جت ويوم طلع جاب المويه من البير تاملت السماء وابتسمت ،،،
تنوف : يازين صباح الشتاء وبرده
سمعت صوت سياره ناظرت وشافت سياره سياف تتحرك استغربت وش مطلعه بذا الوقت وشافت سعود يركب معه ، هتان صحت وشافت تنوف تناظر من الشباك
هتان بثاوب: صباح الخير
تنوف ببتسامة: صباح النور
هتان : كم ساعه ؟
تنوف : ما ادري ( طلعت تنوف جوالها تشوف ساعه وقالت) خمس واربع وعشرين دقيقه
هتان : وش مصحيك بدري ؟
تنوف : مدري والله وانتي ؟
هتان : معرف بعد
اعتام حست عليهم وفتحت عيونها
تنوف انتبهت لا اعتام وقالت ببتسامة: صباح الخير اعتام
اعتام فركت عيونها وقالت والنوم فيها: كم ساعه؟ وليه صاحين لحين؟
هتان : خمس وليه صاحين ماندري
وديان كانت نايمه جنب الهنوف وهي تتقلب عليها
الهنوف  بنوم : وديان بعدي رجولش عن وجهي
وديان كانت مب حاسه لانها بسابع نومه
البنات ضحكو من منظر الهنوف اللي نص صاحيه ونص نايمه وتحاول توخر وديان عنها و وديان كلشويه تحط رجولها بوجهه  الهنوف او تتقلب وتدخل يدها بفم الهنوف اللي متضايقه من نومه اختها
هتان بهمس: نصحيهم ولا نتركهم؟
اعتام : نخليهم نايمين
تنوف : جو حلو ليوم تصدقون
هتان : صدق ؟
اعتام: ودي اتمشى في ديرتكم
هتان ببتسامة: ماطلبتي شي نلبس عبايتنا ونروح البقاله
ونتمشى بعد
تنوف بحماس : يلا
لبسو البنات عباياتهم وطلعو من الحوش الخلفي بدون لا يشوفهم حد  اعتام  كانت مستانسه وهي تناظر الديره وجوها الحلو دخلو البقاله قشو الدنيا كلها وتوهقو بالحساب لانهم مطفرين
هتان بضحكه بخبث: معلوم هادا رائد؟
راعي البقاله: اي في معلوم
هتان : خلي حساب على رائد اوكي؟
راعي البقاله: اوكي صديق
تنوف بضحكه: شفيك على رائد المسكين
هتان وهي تفتح كيس الشبس اللي بيدها: مدري بس كذا حيوان يستاهل
الهنوف بضحكه: ذا وهو خايف عليكي امس ويقول قربي من نار
هتان وهي تبلع الشبس: اي خوف ذا خايف امرض وتبتلشون فيني بس
تنوف : لو شايفه الخوف والحب اللي بعيونه ماتكلمتي كذا
ردت هتان بلا شعور: ولو تلاحظين حب سياف لك وشعره اللي كله لك كان فهمتي برضو
تنوف ما استوعبت جملتها : ويش حب ويش؟
هتان انتبهت وش قالت وغيرت لموضوع : الا اعتام وشلون ديره معك؟
اعتام ببتسامة وهي فهمت ان سياف يحب تنوف وانتبهت لتغير هتان للموضوع: حلوه مره ماشاءالله
هتان : خلونا نتمشى شويه قبل نرجع البيت
اعتام : ايي تكفون
تنوف ماكانت معهم وهي للحين تفكر بكلام  هتان
هل معقوله سياف عنده شعور لي او مجرد كلمه طلعت من لسان هتان تنوف بعدت الفكره وهي تحسب ان الكلمه طلعت من هتان كذا بس زي عادتها بس كان شي بقلبها وده ان هتان تقول لها انه فعلا سياف يحبها
هتان : تنوف؟ تنوف تنووووففف
تنوف نقزت وقالت: ويش ليه تصارخين
هتان : مدري اشوف بالك مب معنا
تنوف : الا معكم
اعتام بضحكه: ايه واضح ياحظ اللي سرقك مننا
تنوف ناظرت في اعتام بضحكه وهي تدري ان اعتام فهمت وش بقلب تنوف
(نروح للمستشفى عند سعود وسياف)
كان سعود وسياف جالسين والدكتوره تفحص ترف
طلعت لهم وقالت ببتسامة تطمنو بس الجو بدا يتغير وطبيعي تمرض بوصف لكم شويه ادوياء وبتتحسن
ان شاءالله بيومين
سعود : مشكوره يادكتوره
الدكتوره: ولو ذا واجبي
طلعت الدكتوره بعد ماكتبت لهم الادوياء
وسياف حمل ترف حتى لا تتعب وسعود نزل يجيب الادوياء من الصيدليه حقت المستشفى
وبعدها ركبو بالسياره وحركو للديره بحكم ان الديره قريبه ما اخذو وقت حتى وصلو بس حصلو ثلاث بنات متغطيات يحاولون يفتحون ألباب الخلفي بس كان قاسي
نزل سعود وهو حامل ترف :  عفوا بغيتم حاجه ؟
هتان و اعتام وتنوف قمطو ام العافيه
تكلمت هتان وهي حست انهم مب عارفين انهم هم
ياوليدي انا ام عمر جايه اتطمن على امك ومعي  بنياتي
سياف بضحكه وعرف انها هتان : هتان ياقلبي يوم تكذبين اكذبي عدل وشلون ام عمر واللي معش بناتش وعمر ماعنده خوات اصلا؟
هتان عرفت انها انفضحت: سياف ماكان يمديك تعطيني على جوي ؟
سعود بضحكه: هتان الله يهديش ترا واضح صوتش
اعتام : عادي ترا لو سلكتو  لنا مابتنقص لكم يد ولا رجل
سعود : اوهوو ذي الملسونه معكم اجل الثالثه تنوف دام كذا
تنوف بضحكه: ايه
سياف كان عارف انها تنوف من البدايه لحد يسال كيف بس قلبه ما يخطى ولو كانت بين حريم الدنيا كلها يعرفها
بينهم ويميزها عنهم
سياف بستغراب: وين كنتم؟
هتان : رحنا نشتري كم حاجه من البقاله وتمشينا شويه
سعود: كان يمدي تقولون لنا نشتري لكم
اعتام: يليل يا انت ترا كلها بقاله
سعود ناظر فيها بطرف عين ومارد
سياف : لو تحسون بملل بعد صلاه الظهر بنطلعكم كوفي
تنوف بحماس : احلف احلف
سياف ابتسم من حماسها: والله
تنوف لا شعوريا : ياشيخ احبك
سياف جمد مكانه وقلبه نبض من كلمتها اللي يدري انها قالتها بدون شعور بس كانت الكلمه كبيره بقلبه
سعود ابتسم وهو يدري ان سياف حاليا ذايب ولا هو معهم واعتام وهتان ماسكين ضحكتهم تنوف انتبهت انها جابت العيد وقالت بحراج: حم خلونا ندخل قبل ننصاد
هتان اللي ماسكه ضحكتها: تمام يلا
دخلو للبيت وسياف وسعود دخلو للغرفه وحطو ترف بفراش سياف  اما اعتام وهتان من اختفو سعود وسياف عن نظرهم انفجرو ضحك
هتان بضحكه: اعتراف الاواعي
اعتام : المشاعر المكبوتة مشكله
تنوف ضربت اعتام وهتان بخفه وهي تقول اسكتي انت وهي، وطلعت بسرعه لغرفه هتان عند وديان و الهنوف اللي مازالو نايمين ،،،،،
سياف : نصحيهم ؟
سعود بخبث : واحد
سياف بخبث : اثنين
سعود : ثلاث ( ارتمو اثنينهم فوق متعب اللي فز مخروش من ثقلهم ... سياف و سعود كانو منفجرين ضحك
متعب : قم انت وهو من فوقي
سياف بمزح : نحبك ياشيخ
متعب : هاذي اول مره اقول لكم لا تحبوني كسرتوني حسبي الله
سعود ضحك واشر لسياف،،،، سياف فهم وقام من فوق متعب ابتسمو  بشر وكل واحد فيم ارتمى على حد
خالد قام مفزوع والمثل لرائد
خالد : وجع عبالي متعب ولا رائد المخبولين اتاريهم انتم؟ وش فيكم انهبلتو ارجعم عاقلين خلاص مانبيكم خبلين معنا
رائد : امحق والله كذا الواحد يصحي ؟
سياف بضحكه: لا تكفى خف علينا يالي ذابحك الحب وكليوم تصحى على كلام حلو من حرمتك
سعود : اوله سياف ماتدري ؟
سياف : لا وش ؟
سعود : ذولا عيال روميو وجولييت وحفاد قيس وليلى
سياف : اوهه صدق بس روميو وجوليت فرع ديرتنا
سعود : ايه تصدق ؟ ذولا حتى الاكل يفطرون ويتعشون ويتغدون ورد ورومنسيه
رائد شال مخدته ورماها على سعود وسياف اللي تفادونها بضحك بس جت على وجهه متعب
متعب بالم : خييير
رائد : يوو متعب حبيبي اسف ما كان قصدي
خالد : خلكم من ذا شيلو مخداتكم
رائد و متعب ناظرو بعض وضحكو وابتدو يطاردون سياف وسعود اللي كانو يهربون منهم
سياف : ياوجهه الله ذا اللي يسوي فيكم خير ويصحيكم
خالد مسك جواله وقال بنرفزه: اي خير ساعه دوبها ست
رائد وهو يراكض ورا سعود: انتم مب وجهه تسون خير
متعب : ايبالله بعد احمدو ربكم نقزو عليكم واحد واحد انا تحملت ثقلهم الاثنين
رائد وقف وناظر لمتعب وقال: ترا حبيبي انا قبلك متحمل ثقلهم ثلاثتهم
خالد : شقصدك ياحيوان؟
رائد رمى مخدته على خالد وهو يقول: قصدي واضح
سعود : اوف اوف خويلد ترضاها على نفسك؟
خالد شال مخدته وضربها على رائد
سياف : ول يارائد ماهقيتك خواف
رائد و خالد جلسو يرمون على بعضهم مخداتهم
ومتعب يحاول يفك بس جته مخده بالغلط مره ثانيه
وصار يرمي معهم وسياف وسعود متلذذين وجالسين يضحكون
ابو سعود دخل عليهم
وقمطو ام العافيه
ابو سعود : صباح الخير
العيال : صباح النور
سياف : بغيت شي يبه؟
ابو سعود : جيت اشوفكم لو صاحيين
سعود: صاحين يبه صاحين
ابو سعود : زيين نفطر ونروح العزبه ورانا شغل اليوم
سياف: أن شاءالله يبه
طلع ابو سعود من الغرفه والعيال تنهدو براحه
خالد : كنت خايف العصى تعلمنا ان الله حق
رائد : لحمدلله بس انه ماصادنا ولا كلينا تبن
متعب : شكله صادنا بس سلك لنا
سعود : لا لو صادنا كانت العصى مهجدتنا كلنا
سياف : فعلا لحمدلله ما لاحظ حاجه
خالد: بروح اتروش من يبي يتروش بعدي؟
رائد : انا
متعب : وانا بعدكم
خالد : تمام ( ودخل يتروش )
نروح للبنات
هتان والبنات تروشو وخلصو ونزلو يساعدون ام هتان وام سعود بالفطور
هتان : يمه تبون البيض مسلوق ولا  وش؟
ام هتان: لا يابنيتي نبغيه قلي
هتان :تمام( خذت البيض وبدت تكسره )
وديان كانت تقطع الخيار والطماطم
والهنوف تجهز الصحون وتحط فيهم مربى وعسل والى اخره واعتام تسوي الشاهي اما تنوف كانت تجهز السفرة برا وتحط الصحون
ام سعود وام هتان جالسين يصلحون الخبز
وابو سعود و الجد عبدالله وابو متعب جالسين بالحوش
ابو سعود يسقى الزرع والجد عبدالله يقرا قران
وابو متعب يستغفر ويذكر الله
الرجاجيل خلصو ولبسو وراحو يجلسون بالحوش
سياف الجو عاجبه بالحيل اليوم
الجد عبدالله قال بضحكه وهو يلاحظ تامل سياف للجو : شرايكم نكشت وانا جدكم؟
ابو سعود : ايوالله يا الجو يبيله تخيم وتغير جو
ابو متعب: خلوها لا بعد اسبوعين انا ومتعب ماشين بكرا
ابو سعود : وشوله يا مشعل الاستعجال ؟
متعب تكلم ببتسامة: ياعم شغلي ماعاد يتأجل اكثر
الجد عبدالله : الله يحفظكم ياوليدي من ترجعون ان شاءالله نكشت
خالد تكلم بهمس: ليه ماقلت لنا انك بتروح؟
متعب : اسف والله نسيت بس المفروض هاليومين اكون بالرياض
سعود: الله يوفقك ياقلبي
متعب ببتسامة: وياك ياقلبي وعلمني انت وسياف وش يصير معكم في المسابقه
سياف بضحكه ثقه : لا تخاف المركز لاخيره ماهي بصفي
رائد : ياليل النرجسي
ضحكو وتكلم الجد عبدالله : سياف انا مربيه وخابره زين مابيرجع لنا الا بالمركز الاول ان شاءالله
ابو سعود بضحكه: طبعا ولدي
سياف ضحك وقال: طبعا يبه طبعا ابوي عبدالله تربيتكم
رائد: ماصدق انه انمدح وكمل مدح بنفسه
الجد عبدالله : ماهو بمدح وكلنا خابرين سياف مايهزه المدح ولا يعني له شي
خالد : بذي اشهد له
جت وديان وهي تقول الفطور جهز
وقامو كلهم يفطرون بعدها لمو الحريم السفرة
وراحو الرجاجيل للعزبه
سياف كان يحلب البقر
وسعود يحط اكل للطيور والدجاج وباقي الحيوانات
ومتعب كان يسقى الخضروات ورائد يزرع الارض
وخالد يشوف الغنم
ابو سعود والجد عبدالله وابو متعب جالسين كالعاده ومعهم ابو تنوف يراقبون شغل العيال
راح متعب يجيب المويه من البير حق العزبه عشان يكمل سقى للخضروات والنبتات  بس طاحت عليه
رائد : ماتعرف تسوي حاجه بدون لا تجيب لنا المصايب ؟
متعب : مدري شسالفتي مع عزبتكم ذي
خالد بتنهيده : مشكلتك غبي
رائد ابتسم وهو يناظر في خالد ومتعب :تفكرون بالي افكر فيه؟
خالد ابتسم وهو يفهم وس يقصد
متعب بضحكه: نرد لا اخواننا الكبار حبايبنا الدين حق تصحيه اليوم
خالد ببتسامة: نعبر لهم عن حبنا شويه
رائد ببتسامة: يلا اجل نعبر لهم عن حبنا الكبير لهم
ابتسمو الثلاثه بشر وشالو المويه قربو من سياف وسعود اللي كانو يتكلمون ومب منتبهين لهم رموه عليهم وانفجرو ضحك
سعود : ياحيوان انت وياه
سياف : لا حول الله
خالد بضحكه: ذا رد لجميلكم يوم صحيتونا صباح
متعب: تدرون نحبكم يعني
رائد : نعبر عن حبنا لكم شويه
سياف وسعود ناظرو بعضهم وابتسمو
سياف : حبيبي يامتعب  وحنا بعد نحبكم
سعود ببتسامة: نموت فيكم بعد ياشيخ
متعب :لا لا ذا مب سياف وسعود حقينا يعترفون بحبهم لنا واخيرا عيوني بتدمع قلت لكم لسى في امل فيهم
خالد تكلم وهو يتراجع لوراء: متعب يالغبي ذولا ناويين علينا
رائد وهو يتراجع  لورا نفس خالد : متعب ابعد عنهم
متعب انخرش وناظر لسعود وسياف اللي يقربون لهم
رائد : اركضو
ابتدو خالد و رائد ومتعب يركضون وسياف وسعود يطاردون وراهم
خالد : قلت لي وش قلت لي حب؟ ذولا اقص يدي لو عندهم مشاعر اصلا
رائد : لا تحلم يعترفون بحبهم لنا ذا حلم ابليس بجنه
متعب : شدراني حسبت اخيرا قررو يحررون مشاعرهم المكبوته
خالد : تقراء كتب فلسفه انت ؟ لانه شكلك متاثر وناسي اننا نتكلم عن سياف وسعود ذولا لو يموتو ما اعترفو بمشاعرهم لحد
سعود: خالد حتى وانت تنحاش تحش؟
سياف : خلونا نمسكم انتو الثلاث وشوفو وش نسوي فيكم بنطلع المويه من عيونكم
متعب : حسبي الله عليك يارائد وعلى فكرتك
رائد : اسكت انت وهو تراكم شاركتم معي
خالد : اسكتو وخلونا ندور حل ذولا مابيتعبون وهم يراكضون ورانا ولو ضلينا كذا بنراكض لشهور
ابو عمر  كان مار وشافهم وهم يركضون
ركضو له رائد ومتعب وخالد بسرعه
رائد : تكفى ياعم نحن بوجهك
ابو عمر ضحك من اشكالهم وقال : وش مسوين ياوجهه المصايب ؟
خالد : ياعم الله يخليك سياف وسعود ناوين علينا الليله
ابو عمر ناظر لسعود وسياف اللي يركضون وملابسهم مغرقه مويه
سعود: تكفى ياعم ابعد عنهم
ضحك ابو عمر وقال: خلوهم ياوليدي هم بوجهي
سياف بتنهيده وهو يناظر في الثلاثه اللي متخبين ورا ابو عمر : علشانك هالمره ياعمي
ابو عمر : تسلم ياحبيبي وش صاير في ملابسكم ليه كلها مويه ؟ برد عليكم وانا عمكم
سعود : ابد ياعم مدري من رمى علينا مويه
ابو عمر ناظر لرائد وخالد ومتعب وعرف انهم سبب ضحك وقال: محد غيركم مسوي حركه بالديره تعالو بعطيكم ملابس من ملابس ولدي عمر
سياف بحراج : لا ياعم مشكور ماتقصر
ابو عمر : حلفت عليكم لا تبدلون بتمرضون كذا ( وناده على ولده عمر  بصوت عالي ) عمر عمر ياوليدي
عمر وهو يركض لا ابوه : هلابك يبه
ابو عمر ببتسامة: شف اخوياك ملابسهم مويه بعز البرد
عمر ناظر وشاف سعود وسياف ملابسهم مويه ورائد ومتعب وخالد متخبين ورا ابوه : وش صار في ملابسكم؟
سياف : كم حيوان كذا رشم علينا مويه
عمر بضحكه: اهاا وهالكم حيوان واقفين ورا ابوي ؟
خالد و رائد ومتعب ناظرو عمر بطرف عينهم
وعمر كحكح حس انهم بيهبدونه:احم  تعالم معي بعطيكم من ملابسي ولو انك وسعود معضلين شوي اكثر عني بس يجي بمقاسكم حتى انت متعب ملابسك فيها مويه
سياف ماكان قادر يرفض لانه ابو عمر حلف عليهم ومايقدر يفشله وهو شيخ الديره : زيين
راحو العيال مع عمر لبيتهم وابو عمر راح يشوف الجد عبدالله ويتكلم معه ،،،،
سياف : مشكور ياعمر
عمر ببتسامة : ولو يارجال على ويش حنا اخويه؟
سعود ابتسم هو وسياف
تكلم عمر : ايه صدق كنت جاي اشوف وينكم
سياف : عسى ماشر؟
عمر: لا  لا كل خير بس جايبين جرافه بالديره الواضح يبون  ينفضون الارض وانا عبدالمحسن وحمد  دام بذا الوقت راعيه مب موجود ودنا نعيد ايام الطفوله يوم كنا نصعد علي الحفار وواحد مننا  يتحكم بتنزيل يطلعنا وينزلنا وقلنا مابتكمل بدونكم اللعبه
خالد : اهخخ بس يا ايام الطفوله
متعب : حماسسس يلا وش منتظرين
سعود : من جدكم ولا تستهبلون
رائد : لا والله من جدنا يلا عاد
عمر : يلا
سياف همس لسعود: وش الحل معهم؟
سعود: مدري تحب نغامر معهم؟
سياف ناظر لسعود بستغراب
سعود بضحكه: ياشيخ كذا كذا مانقدر نسيطر عليهم خلنا نعيش جوهم العمر مره وحده
سياف بضحكه: اجل الليله بننخبل معهم
سعود وهو يصارخ: لحظه انتظرونا
رائد : اسرع انت وهو لا نخليكم ونروح
سياف وسعود اسرعو لهم
كان عبدالمحسن وحمد ينتظرونهم
عبدالمحسن: وش عندكم تاخرتم؟
عمر: معليش صار معنا شي واخرنا
حمد: بسرعه لحين قبل يجي صاحب الجرافه
خالد: من بيركب اول ؟
متعب : نركب ثلاث بثلاث
رائد : اول ثلاث اشخاص متعب وخالد وانا واللي بيسوق فينا حد منكم
حمد : خلونا نلعب حجر ورق مقص واللي يطلع عليه الدور هو اللي يركب بدو يلعبون حجر ورق مقص
والترتيب كان
حمد وسعود وعبدالمحسن اول ثلاث اشخاص
سياف وعمر ورائد ثاني ثلاث اشخاص
اخر شخصين خالد ومتعب اللي بيركبون وحدهم
ركب حمد وسعود وعبدالمحسن
واللي كان يرفعهم وينزلهم في الحفار سياف
بعدها ركبو الثلاث الباقين واللي يرفعهم هالمره كان عمر
ويوم جا دور خالد ومتعب ركبو بثاني دوره
سمعو صوت صاحب الحفار وهو يصارخ عليهم
رائد توتر وهو يحاول ينزلهم بسرعه نزلو وصارو يهربون من صاحب الحفار تفرقو كلهم وصار كل واحد يركض بجهه
ابو سعود بستغراب وعصبيه: وين راحو وتركو شغل العزبه؟
الجد عبدالله بضحكه: خلهم اكيد شويات ويجون
ابو عمر بضحكه: عاد اخر مره شفتهم مع ولدي عمر
ابو متعب: دامهم مع عمر نتطمن عليهم
ابو سعود قام من مكانه وقال: بروح اشوف لو خلصو شغلهم او تركوه زي ماهو وراحو
الجد عبدالله : زيين ياوليدي
(نرجع للرجال)
وقف خالد ركض وهو يلهث يناظر وراه ماحصل حد
خالد : امحق وين راحو ذيلا؟
كان نفس الشي للباقي انتبهو انهم من ركضهم كل واحد راح بتجهه مختلف
سياف مسك جواله وكان معاه عمر  واتصل لسعود
سعود رد وهو يقول: وين رحتم؟
سياف : عند الدوانيه حقتنا وينك انت؟
سعود: جايكم انا وعبدالمحسن معي
سياف : زين اتصل لرائد شوف وينه وانا بتصل لخالد
سعود: تمام
اتصل سياف لخالد ، و خالد قاله انه جاي
وسعود اتصل لا رائد ، ورائد قال جاي بس ماكان معه حد
رائد اتصل لمتعب ، ومتعب رد وقال انه بطريقه للدوانيه ومعه حمد
سياف وعمر كانو ينتظرون وجاهم سعود وعبدالمحسن وشويات ويشوفون خالد ورائد وحمد ومتعب
حمد بضحكه : وش صار كل واحد فينا راح بطريق
عبدالمحسن: اييي اناظر وراي احصل سعود يركض نناظر انا وهو ندور لكم مانشوفكم
خالد : اسكت انا وقفت ركض اناظر ماشفت ولا واحد فيكم
متعب بضحك: خرشنا صاحب الحفار الله يخرشه
سياف بضحكه: خرشنا وبس الا وقف قلبنا
رائد : عاد انا من الخرشه ماعرفت وشلون بنزل متعب وخالد من على الحفار نسيت اتحكم فيه
عمر : اييي شفتك متوتر وكويس ماطاحو من فوق
سعود: لا انا ماضحكني غير ركضه متعب كل مايركض يطيح ويقوم يركض
متعب : اسكت بالله بغى يوقف قلبي
العيال ضحكو
خالد وهو يتذكر: ياويلي من اخوي حسن
العيال ناظرو وقالو وش ؟
سياف استوعب وقال: نسينا نعلمهم اننا طلعنا
متعب : بس نحن خلصنا شغلنا
سعود : ماهي بمشكله خلصنا المشكله اننا ما خذينا الاذن
رائد : ياويلي يبه بيذبحنا اليوم
عبدالمحسن: الله يرحمكم
عمر: كنتم اشخاص طيبين
حمد: بنشتاق لكم والله
سعود ومتعب ورائد وخالد ضربوهم بخفه
خالد : اسكت انت وهو وهو
سياف بضحكه: ماهي بمشكله بكلم جدي ويبه انا
الباقي تنهدو براحه
متعب : والله اني احبك ياشيخ
سياف : خلاص تكفى قتلتني بحبك
ضحكو العيال واذن الظهر وراحو يصلون
( نروح عند الحريم )
البنات كانو يحسون بطفش وهم ينتظرون
العيال يجون ياخذونهم وينفذون وعدهم الصباح
هتان جتها فكره :  تعالو نتصل على ارقام عشوائيه ونستهبل
البنات وافقو وكلهم جلسو يمقلبون وبعد كل مكالمه يموتون ضحك
جا دور وديان واتصلت على بيتز هت رد عليها عامل هندي
وديان: اسمع ياصديق انا في حزين
العامل : ليش انته في حزين
وديان : هادا نفر كلو هبي الا انا مافي هبي اخو حق انا يهوب بنت عم مال انا واخو تاني حق انا شكلو في هوب بنت عمه مال انا وكلو نفر هوب هوب وانا هوبي مايجي
البنات كانو منفجرين ضحك عليها وماركزو بكلامها يوم تكلمت عن سياف ورائد
ابو سعود دخل عليهم وهو يبي منهم يحضرون القهوة
ابو سعود: يبنياتي وحده منكم تسوي لنا القهوة عندنا ضيوف ابو عمر وابو سلطان وابو ريفان
الهنوف : أن شاءالله يبه لحين اسويه ( نزلت الهنوف تحضر القهوة
وديان : يبههههه
ابو سعود: وجعاه وش تبغين؟
وديان : ليه فارس احلامي بعده ماجا؟
ابو سعود بستغراب: فارس  احلام وش يابنيتي ؟
وديان بتافف: يعني زوجي المستقبلي شعند امه تاخر
ابو سعود : وش زوجه توك بزر عمرش سبع طعش وش تفكرين فيه انتي  وين عصاتي
وديان عرفت انها جابت العيد : يبه امزح وربي امزح
ابو سعود: تعالي ياقليله الحيه
بذاك الوقت جا سياف حتى يعلمهم يلبسون عبايتهم
وديان ركضت لسياف وهي تتخبى ورا ظهره
وديان : سياف تكفى انا بوجهك انا بوجهك
سياف : يبه خلها هالمره بوجهي بس ويش مسويه؟
ابو سعود: تدور زوج من الحين القليله الادب
سياف ناظر وديان بحده
وديان : وربي استهبل
سياف بتنهيده: خلاها يبه انا ادبها لك
ابو سعود بعصبيه:زيين اخليها لك( وطلع من الغرفه)
تنهد سياف وناظر وديان وشد اذنها
وديان : سياف وربي استهبل
سياف : استهبلي بس مب مع يبه وبذي المواضيع
وديان : توبه توبه
سياف : الله يهديش بس وانا اخوش ( ناظر سياف للباقي الواقفين وقال) البسو عباياكم لو ودكم تطلعون
وديان بحماس: صدقق ؟
سياف : ايه صدق كلمت جدي وعمي ابو تنوف وكلهم وافقو يلا من تخلصو انزلو ننتظركم في السياره
البنات بحماس تمام

ننهى البارت لهنا التكمله في البارت14 ثواني ويكون بارت14 نازل مدلعتكم في بارتين اليوم