ماطلبت عذرك أنا نفسي عزيزة

Part : 18

الجد عبدالله : محد منكم اتصل لسياف وسعود ومتعب ليوم؟
خالد : لا والله  الصباح كنا نشتغل في العزبه وبعدها  وصلنا الحريم لعند تنوف وخذينا ترف للبقاله ورجعنا الحريم معنا و جالسين معكم ماصارت لنا فرصه نتطمن عليهم
ابو سعود بشويه عصبيه: وشلون ماتتطمنون عليهم؟ يمكن صاير بهم شي؟؟
الجد عبدالله : هدي يا حسن خالد رائد اتصلو لسياف وسعود شوفو وينهم
رائد طلع جواله من مخباه وهو يقول :حاضر
اتصل لسعود بس ماكان فيه رد ورجع اتصل لسياف بس مارد
رائد وهو ينزل جواله من اذنه: محد رد
الجد عبدالله بقلق: شوفو متعب وينه
رائد رجع مسك جواله وجرب يتصل لمتعب

متعب كان منسدح وهو مغمض عيونه وشاغل باله التفكير سمع صوت جواله يرن وتجاهله بعدها تنهد ورجع مسكه يشوف من المتصل ابتسم بخفه من شاف اسم رائد
رائد:  هلا متعب شحالك
متعب : لحمدلله بخير
رائد استغرب الجديه اللي كان بصوت متعب تكلم بقلق: الا وش فيك
متعب وهو ماحب يشغل بال رائد : ابد بس كنت نايم وازعجتني بتصالك
رائد بضحكه وهو مب بمقتنع بكذبه متعب: الا وين سياف وسعود اتصل لهم مايدرون
متعب بتردد: ااااءءاااءاا شسمه ايه تصدق ؟ رحت لهم حصلتهم نايمين حتى مساكين ناصر و فيصل جلسو معي يسولفون
رائد : اها
متعب بتصريف : يلا بغيت حاجه بكمل نومي يالمزعج
رائد :  نوم العافيه ياحيوان
متعب بضحكه:  تفووو مع السلامه
رائد :  مردوده لك انقلع بس
خالد : وش قال؟
رائد : نايمين وهو بخير بعد وبيكمل نوم
ابو سعود تنهد براحه : لحمدلله
الجد عبدالله  : تطمنو عليهم دوم لا تخلونهم وحدهم ياعيالي
خالد : ابد يبه لا توصي سياف وسعود ومتعب فس عيوننا
الجد عبدالله : الله يدوم  المحبه بين قلوبكم ياعيالي
ابو سعود ببتسامة : تطمن يبه خالد و رائد وسياف ومتعب و سعود قلوبهم على بعض وعلى خواتهم  وحتى خالد احيان احسه اخوهم مب بخوي
ضحك خالد ورد الجد عبدالله : الله يجعلهم دوم كذا وانا ابوك ياحسن نتطمن لو رحنا عنهم عمهم خالد كانه اخوهم يشيلهم بين عيونه وسياف وسعود مايقصرون
رائد همس لخالد: جلسه شيبان وش مجلسنا نحن؟
خالد بهمس: اسكت لا تنكبنا
جت وديان وهي تقول العشى جاهز
والكل قام يتعشى
نروح لبيت تنوف
جالسه على سريرها وتحس بملل اتصلت
لا اعتام تتطمن عليها
اعتام : تنوفييي الحقي الحقي يابنت
تنوف : يمه شصاير؟ قولي قولي بسرعه
اعتام : اظفري ياتنوف اظفري
تنوف: تكفيين لا تقولي انكسر؟
اعتام:  ياليتتت
تنوف : شصار عليه عسى ماتوفى؟
اعتام : لا ابد بس نسيت ابريه من الاطراف
تنوف : اشوى احسب توفى
اعتام : بعيد شر عن اظفري يابنتي
تنوف بضحكه: وش تسوين
اعتام: جالسه اهتم في اظافري وانتي ؟
تنوف : ملانننههه
اعتام : ماعندكم فعاليات؟
تنوف : جو بنات عمي صباح جلسنا سوا بعدها مر لهم خالد و رائد خذوهم ومن وقتها وانا طفشانه
اعتام : اها الا سياف وذاك الغبي اخوه مارجعو
تنوف بضحكه: شفيك على سعود والله انه طيب وينحب
اعتام وهي تقلد تنوف بصوت يضحك: والله انه طيب وينحب تحبك حيه وجع وش ينحب فيه بالله
تنوف انفجرت ضحك من تقليد اعتام
(نروح عند سياف وسعود)
راكبين السياره وملابسهم بعدها مويه
وقف سياف السياره وناظر لا سعود: ننزل نشرب ولا ناخذه معنا؟
سعود : ناخذهم معنا بموت برد يارجال
سياف ضحك وقال: تمام ( طلب سياف اثنين هت شوكلت وحطهم في السياره)
سحب سعود ألهت شوكلت وشربها بسرعه واحترق
لسانه وصار يكح : حار حار الله ينكبك
سياف بضحكه: قلنا بردان بس شدعوه شفطته
سعود ناظر سياف بطرف عين : لساني احترق ياحيوان
سياف ناظر للمرتبه اللي ورا وحصل مويه وعطاها بسرعه لا سعود اللي شربها ولسانه محترق من الهت شوكلت
سياف : اشرب المويه بشويش
سعود : لساني احترق وانت تقول بشويش
سياف بضحك : من القافه الي بك حد يشرب شي ساخن كذا
سعود لف على سياف بطرف عين : انا عندك مانع سيد سياف
سياف : لا ماعندي مانع اسفين سيد سعود
سعود ضحك على هبال اخوه وما انتبه غير لما انكب عليه مويه بارده
سياف ضحك وقال  : علشان ابرد عليك
سعود : الله يقلع بليسك ملابسي لحالها تنقط مويه تجي تكب زياده 
سياف : مو تقول لسانك يحترق قلت اطفي الحريقه
سعود ضحك
و سياف ابتسم لضحكت اخوه : وين تبي نروح الحين
سعود : الفندق ولا شكلك ناوي ترجعنا الفجر؟
سياف بتافف : طيب بدري نرجع الفندق
سعود مد يده يطلع جواله : وين جوالي ؟
سياف استغرب وجا بيطلع جواله بس ماحصله: وجوالي بعد وينه؟
سعود وهو يتذكر: يالخبل نحن طلعنا بدون جوالاتنا
سياف : امحق اكيد رائد وخالد اتصلو لنا يتطمنون  وش الدبره؟
سعود : ارجع الفندق
سياف : تمام ( حرك سياف سيارته متجهه للفندق )
وصلو للفندق وطلعو لغرفتهم حصلو جوالاتهم بعدها على سرير سعود مد جواله وهو يشوف اتصال من رائد ناظر لسياف وقال: رائد متصل قبل اربع ساعات بتصل له
سياف ماسك جواله وقال بهدوء: لا تتصل متعب قال له اننا نايمين
سعود ناظر سياف بستغراب : وشلون عرفت؟
سياف : متعب مرسل لي واتس
سعود : اها طيب تبي تتروش قبلي ولا؟
سياف بضحكه: لا ادخل تروش انت من تخلص ناديلي
سعود ناظر في سياف وهو يناظر من فوق لتحت في ملابسه : ثوبك كله مويه بتمرض لو بتضل كذا
اكتفى سياف ببتسامة وقال: اذلف تروش ولا تخاف
سعود عارف عناد سياف وقال بتنهيده : طيب بس طف المكيف وبدل ملابسك عل اقل حتى يجي دورك
سياف : أن شاءالله
دخل سعود يتروش وهو قلقان ان سياف ينسى يبدل ويضل في ملابسه اللي بعدها مانشفت من المويه
سياف ابتسم وفتح باب الغرفه وطلع من الفندق وهو يتمشى  في الشارع
تنوف قفلت من اعتام وهي ودها تنام بس كانت تفكر في سياف ابتسمت وارسلت بسرعه لا هتان تطلب رقم سياف
وهتان عطتها ترددت شوي تنوف انها تتصل من جوالها عشان كذا قررت تستخدم الجوال الارضي
سياف كان يتامل القمر وهو شارد ويدعي ربه يهون على قلب اخوه حس بجواله يرن وطلعه من مخباه
شاف رقم غريب والواضح انه جوال ارضي
رد وحط الجوال على اذنه وهو يقول هلا؟
تنوف كانت ساكته وهي تسمع صوته
سياف بستغراب: هلا من معي؟
تنوف كانت ساكته بعد
سياف: بغيت شي يالخوي؟
تنوف قفلت المكالمه وهي تتنهد براحه من سمعت صوته بس كانت تحس بالحزن بصوته
ماكانت عارفه سبب الحزن اللي سمعتها في نبرت صوته
تنهدت ورجعت لغرفتها انسدحت وهي تحضن مخدتها
وكل تفكيرها في سياف والحزن اللي كان واضح في صوته الرجولي
سياف استغرب من تقفلت المكالمه تنهد و ما اعطى لموضوع اهميه رجع جواله رن وتنرفز هالمره رد وهو يقول: ياليل وش وضعك ياخي
سعود بستغراب : هد هد وش فيك ؟
سياف ناظر للاسم وانتبه ان سعود اللي متصل له قال بحراج: ابد بس كان في كم بزر اتوقع يتصلون لي ومايتكلمون
سعود بضحكه: اها طيب وين رحت؟
سياف : اتمشى ليه؟
سعود : تمام ارجع تروش وخلنا ننام بندخل ساعه ادعش
سياف ناظر ساعته وقال: جايك
سعود : تمام
قفل سياف الخط ورجع الفندق
سعود طلع من الحمام واستغرب يوم ماشاف سياف لبس  ملابسه واتصل له
بعدها جلس ينتظره شويات يفتح الباب ودخل سياف الغرفه سعود قام من مكانه وهو يناظر ملابس سياف
تنهد سعود بضيق : ماقلت لك تبدلهم؟
سياف بضحكه: لا تشيل هم مناعتي ماهي بضعيفه ترا
سعود : ادخل تروش
سياف : ان شاءالله
دخل سياف يتروش وسعود جا يطلع له بيجاما تكون دافيه يخاف اخوه يمرض حط البيجاما له على سرير
وسحب جواله وهو يتصل في بيتز هت عشانهم ماتعشو
طلع سياف بعد ما تروش وشاف البيجاما لبسها  واستغرب يوم ماشاف سعود
سعود دخل الغرفه وبيده البيتزا
سياف : وين رحت؟
سعود ناظر سياف بطرف عين وقال: ماتشوف اللي بيدي ؟ رحت  افتح الباب
سياف بضحكه: عاد تصدق جوعان بالحيل
ابتسم سعود وحط البيتزا على الطاوله : يلا ناكل ونلحق ننام مابننام اليوم غير  خمس ساعات
سياف ضحك وابتدو ياكلون بعدها  غسلو يدهم وراحو ينامون
_______________________________________
(ثاني يوم )
صحت هتان وهي مكسلة راحت تتروش وتغسل وجها
طلعت من الحمام وبدلت ملابسها لبست هودي احمر وبنطال اسود وراحت  غرفه  البنات تصحيهم حصلت الهنوف و وديان نايمين بعمق
ابتدت تصحيهم وحست عليها الهنوف وهي تقوم بتعب
هتان : صباح الخيييررر
الهنوف : صباح النور
هتان : قومي تروشي  انا بصحي الغبيه ذي
الهنوف : طيب
راحت الهنوف تتروش وهتان تحاول تصحي وديان
ترف حست على هتان وهي تصحي وديان وجلست تناظر في هتان وهي تفرك عيونها بنعس
هتان انتبهت لترف وراحت تحضنها: يازينووو زيناه ياناس ياقلبوسي انا اللي صحى
ترف جلست تضحك من هتان اللي كانت تدغدغها
وديان وهي تفتح عيونها بنزعاج: ابغى اعرف انام انتي وهي وجعاه
هتان ناظرت في وديان بطرف عين: احلفي احلفي بس؟ من سنه اصحيك ولا صحيتي ولحين عشان ضحكه هالكتكوته ذي انزعجتي ؟
وديان : ايه اذلفي انتي وكتكوتك لبرا ابغى انام
هتان : وديان اصحي ترا بنصلح الفطور
وديان بتافف قامت من سرير وبذاك الوقت كانت الهنوف طالعه من الحمام
الهنوف : صح نومش
وديان : صح بدنش
الهنوف : تبغين تتروشين؟
وديان : ايه بلحقكم للمطبخ من اخلص
الهنوف : زين
هتان : اجل يلا
نزلو الهنوف و هتان للمطبخ يحضرون الفطور
وبعدها بشويات وديان لحقتهم وكانت ام سعود وام هتان جالسين يصلحون الفطور
ابو سعود كان يسقى الزرع
والجد عبدالله ماسك القران وجالس يقراء خلص وبعد القران عنه وهو يقول اذكار الصباح وبعدها الحوقلة : لا حول ولا قوه الا بالله العلي العظيم
ترف جت بذاك الوقت وهي تركض لجدها بفرحه
الجد عبدالله ابتسم من شاف ترف وحضنها
ترف : صباح الخير
الجد عبدالله ببتسامة كلها حب: صباح النور يابنيتي
ترف جالسه بحضن الجد عبدالله ناظرت ابوها وقالت في براءة: باباا
ابو سعود ابتسم من شاف ترف : ياعيون بابا هلا ببنيتي لحلوه
ترف : جوعانه
ابو سعود بضحكه: يخسي جوع وانا ابوش
الجد عبدالله : الا وين الرجاجيل ؟
ابو سعود : بروح اشوفهم لحينه
الجد عبدالله : زين ياوليدي
راح ابو سعود يشوف رائد و خالد وحصلهم نايمين
سحب العصى اللي يمشى فيها وهبدهم وقال بعصبيه: اصحى انت وهو لا بارك الله فيكم لمتى هالنومه؟
خالد و رائد فزو برعب وقالو: صحينا صحينا
ابو سعود: بروح للحوش شويات ويجهز الفطور لو تاخرتم انت وهو يويلكم مني
رائد : ان شاءالله يبه
طلع ابو سعود من الغرفه و خالد ناظر في رائد عالطول
ماقلت لك تحط منبهه يصحينا؟
رائد : حطيت يوم رجعنا من صلاه الفجر
خالد : اجل وشلون مارن؟
رائد : شكلنا ماسمعناه
خالد وهو يقوم من مكانه : بذلف اتروش تروش بغرفتك لحينه لا تنتظرني خلنا نخلص بسرعه لا ننجلد مره ثانيه
رائد : تمام
طلع رائد لغرفته اللي كان بابها في وجهه غرفه خالد وبالطرف الثاني غرفه سعود وسياف اللي كانت ابوابهم بعد بوجيهه بعض كان بيت عيال ابو سعود صغير ومن طابق واحد عكس بيت عائلة الجد عبدالله اللي فيه دورين الدور الاول المطبخ والمجلس والغرفه الصغيره اللي يجلسون فيها الحريم والطابق الثاني كانت غرفه لا وديان والهنوف وترف وثاني غرفه لهتان والثالثه لا ابو سعود وام سعود والرابعه لا ام هتان واخر غرفه كانت للجد عبدالله وحمام يستخدمونه كلهم
اما بيت عيال ابو سعود كانت من اربع غرف غرفه لرائد اللي كانت بوجهه غرفه خالد وغرفه لا سعود اللي كانت بعد بوجهه غرفه سياف ومجلس صغير يقدرون يجلسون فيه كان تصميم البيت الخاص في عيال ابو سعود عشان لو تزوجو الاخوان يكون لهم غرف خاصه مع  ذالك محد يستخدم منهم غرفهم وكلهم ينامون في غرفه خالد)
( نروح للسطبل في الرياض )
العيال جالسين يدربون
ومن خلصو تدريب جا ناصر وهو يسال في تردد
ناصر : ااااشسمه من بيروح ملكه ندى؟
فيصل قرص ناصر انه يسكت
سياف ناظر في سعود وهو ينتظر جوابه
سعود تكلم بضيق حاول يخفيه : كلنا بنروح ان شاء الله مابنخلي صديقتنا واختنا لوحدها
فيصل  اكتفى في ابتسامه وهو يدري وش صعوبه اليوم عليه
جا متعب من بعيد وهو يصارخ: سللللااااااام عليكممممم
سياف : جا وجهه المصايب
متعب بمزح وهو يحاول يغير جو سعود: سيافي شف اليوم بعديها لك لاني قررت احب سعودي بدالك
ناصر  بمزح : تم وانا باخذ سياف
متعب  بمزح : الاثنين لي لا تحاول
سياف : ماشاءالله تتعازم انت وهو  عشى هو ونحن ماندري؟
فيصل: انا قايل لكم هالاثنين امورهم مب بتمام
ناصر: نمزح يالنفسيه انت ووجهك المربع
فيصل ناظر ناصر بطرف عين ومارد
سعود ضحك وقال: يلا انت وهو خل عنكم  لازم  نبدل ملابسنا ونروح المسجد نصلي الظهر وبعدها نتغداء ونستعد لملكه ندى
فيصل : اجل يلا
متعب بتافف: ترا عندنا وقت طويل
سياف : امش قدامي وانت ساكت
متعب: طيب احبك
سياف : للمره الالف تكفى لا تحبني مانيب بمحتاج حبك اكفيني حبك ياشيخ
متعب: ترا الف وحده تتمنى اني احبها مع ذالك احبك انت  صح نوصير قول له بس عن معجبيني
ناصر: صح  انا اشهد له في المعجبين تراه محور الكون
متعب : اكيد انا محور الكون فديتني
سياف مسك متعب من اذونه : انت شكلك ودك تنسحب سحب للسياره جاي بسيارتك ولا؟
متعب بالم: بسيارتي
سياف: حلو اجل يلا
ضحك سعود وفيصل على سياف اللي ماشي وماسك اذن متعب  المتالم ويسحبه معه
اما ناصر كان يحمد ربه انه مسك لسانه ولا كان ضحيه مع متعب
ركب سياف  السياره وسعود اللي كان يسوق هالمره
وناصر وفيصل راكبين في سياره فيصل
ومتعب بسيارته يسوق
تحركو للفندق وبدلو ملابسهم وبعدها
راحو يصلون الظهر  اللي اذن توه
( في العزبه بذاك الوقت)
كان عمر ورائد وحمد و خالد وعبد المحسن
جالسين يشتغلون في العزبه والجد عبدالله وابو سعود وابو تنوف جالسين يسولفون
عمر  وهو يمسك ظهره في الم : اهخخ ياظهري
عبدالمحسن بمزح: انتبه لا يصير لك حاجه ونبتلش
عمر بطرف عين: شقصدك
حمد بضحكه: مايقصد شي بس خايف عليك يوم عرسك تكون منصاب ومايمدي نفرح فيك
خالد : عمر لا تصدق حمد عبدالمحسن يقصد انك بلشه وماودنا نبتلش فيك صح رائد ؟
رائد : صح صح ابصم لك في العشره
حمد بحلق عيونه في رائد وخالد: انتم ماتصدقون تخربونها؟
عبدالمحسن :  شياطين تمشى على الارض
رائد : افا ياعمر يقول عنك وعننا شياطين يرضيك؟
عمر : يقصدكم انتم مايقصدني معكم
خالد : ماهقيتك غبي ياعمر  تراه يقصدك معنا
رائد : ويقصد انك اولنا
عمر ناظر في عبدالمحسن  وهو ينتظر جواب
عبدالمحسن : لا تصدقهم ياعمر
حمد بضحكه: خل عنكم الظهر بياذن خلونا نروح نتوضى
ردو الباقي في تمام (راحو العيال ومعاهم الجد عبدالله وابو سعود وابو تنوف  للمسجد يصلون لظهر)
( نروح عند تنوف )
جالسه وبيدها كوب قهوة تناظر من لشباك وهي تحس بنشاط كبير  طلعت جوالها وهي تتصل لهتان
هتان : هلا تنوف
تنوف : بكرا دوام
هتان :  اما صدق
تنوف : ايه مجهزه نفسك؟
هتان : مجهزه من قبل اجي ديره اغراضي وانتي؟
تنوف : زيك
هتان : وش تسوين؟
تنوف : حاليا جالسه اتقهوى ليه؟
هتان : اسال لو ودك تجي
تنوف : من يجي يبه بقول له يجيبني
هتان : طيب ننتظرك لا تتاخرين
تنوف : ان شاءالله ياقلبي يلا استاذنك
هتان : اذنك معك يقلبي
قفلت تنوف الخط وراحت تتروش وتبدل ملابسها
لبست هودي برتقالي مع بنطاله وحطت عنايتها
في بشرتها وحطت مسكرا وروج  وشويات ووصل
ابوها نزلت له وهي مبتسمه
ابو تنوف من شافها ابتسم: هلا بحبيبه ابوها
تنوف حضنت ابوها وقالت: يبه
ابو تنوف : عيون ابوك؟
تنوف : بخاطري اروح بيت عمي حسن
ابو تنوف : اصلا جاي اخذكم معي جاهزين وانا ابوك؟
طلعت ام تنوف وهي لابسه عبايتها: انا جاهزه يا ابو تنوف
تنوف ببتسامة: بلبس عباتي وبجيلكم
ابو تنوف بضحكه: زين وانا ابوك لا تتاخرين
تنوف : ان شاءالله يبه
( نروح عند هتان والبنات)
جالسين ينظفون الحوش الخلفي
رائد تقدم وهو يشوف الهنوف تكنس الغبار استغرب وقال بخوف : وش تسوين يالهنوف؟
الهنوف ببتسامة: انظف وانا اختك
رائد عقد حواجبه وهو يقول: ماقلت لش امس استريحي؟ تراش لسى تعبانه 
الهنوف : انا بخير لحينه
رائد بتنهيده:  سوي اللي يريحش بس لو حسيتي بتعب خلي المخبولتين ذيلا يكملون عنش
وديان وهتان ناظرو رائد بطرف عين
وديان : ها ها ها ها ظريف مره
هتان : مالمخبول الا انت والله
رائد : من كلمش انتي  ياملسونه؟
هتان : ماشاءالله يقصدني ومايبيني ارد عليه؟
رائد: عاد ذي مشكلتش
هتان انغاضت من رائد وشالت المكنسه اللي بيدها ورمتها عليه بس صدها بحركه سريعه
رائد : ناويه تقتليني؟
هتان بنرفزه : لو مت احسن برتاح منك
رائد بضحكه: الصدق بتكونين اول من يشتاق لي 
هتان بنرفزه: مابكون ولا بشتاق اذلف من هنا غبي حيوان
رائد كتم ضحكته وراح يجلس مع جده والباقي
هتان : اخوكم حيواااان حرفيااااا حيواااااننننن
تنوف كانت توها جايه وقالت بدهشه: منهو الحيوان اللي تسبينه؟
هتان لفت لتنوف وهي تقول: من غيره رائد التبن
وديان : هي حدش على اخوي
هتان : من زين اخوك عاد
وديان بضحكه: يازيناه زيناه  نص حريم الديره خاقين عليه
هتان ناظرت لها وعقدت حاجبها وحست بشي يحرق قلبها من درت ان اغلب بنات الديره يبونه
تنوف ابتسمت من شافت تعابير وجهه هتان
هتان وهي تحاول تخفي غيرتها: من زينه عاد وش لاقين فيه؟
وديان ابتسمت وهي تشوف الغيره بعيون هتان
الهنوف بضحكه :مدري وانتي وش لاقيه فيه؟
هتان توترت وحاولت تغير لموضوع : الا ماخلصنا تنظيف؟
الهنوف : الا خلصنا
هتان : اجل تعالو نطلع لغرفتي
البنات ردو بتمام وطلعو كلهم لغرفه هتان
_________________________
< تقديم الاحداث بعد صلاه العشاء >
       ( في الرياض ملكه ندى)
_________________________