ماطلبت عذرك أنا نفسي عزيزة

Part : 39

سعود ماحصل رد من سياف وذا اللي زاد توتره يتلفت حوالينه يدور سيارته
بس من زود   المطر وكثره مايخليه يشوف بوضوح خذ نفس وصارخ بصوت عالي: مااافيييي حددددد هنااا ؟؟؟ ماحصل رد سعود وذا اللي جننه يشوف سياف اخوه ساكن بحضنه وماله اي رد والطريق فاضي ومافيه حد وظلام الليل مغطي نص المكان زاد توتر سعود وهو يدور بعيونه على الطريق ويردد : ياارررب ياااارب يارررب
ماهي ثواني حتى بدا يخف المطر شويه ويبان الطريق ركض سعود بسرعه وهو شايل سياف يدور  اي مستشفى قريبًا ، ومن حسن حظه حصل مستشفى قريبًا منه دخل للمستشفى بسرعه وهو يصارخ وينادي الدكاتره،
الناس تجمعو بخوف يشوفون وش السالفه ، ومذهوليين من هول المنظر  ومن الشخص اللي  شايل اخوه على ظهره ويصارخ بخوف، جاو الدكاتره والممرضين بسرعه ياخذون سياف عن سعود ، ويسالون سعود عن معلومات المريض " الدكتور وهو يناظر بسعود اللي كان واضح الخوف عليه: ان شاءالله مافيه حاجه لا تخاف ( وراح بسرعه الدكتور يلحق الممرضيين اللي سحبو سياف معهم )

(في بيت عائلة الجد عبدالله )

ام سعود جالسه بالحوش تنتظر عيالها لإثنين بخوفً وتوتر وهي تدعي انهم يكونون بخير
ام هتان : هدي ياهيلة اكيد انهم راحو الدوانيه ولا طلعو مع رجال
ام سعود: يامنال قلبي ماهوب متطمن هو احساس الام انا داريه
جا من وراهم الجد عبدالله وقال : الصقر الجارح ماعليه خوف يابنيتي وإنا متأكد انه بخير لا تخافين ولا تشغلين بالش الصباح ان شاء الله بيكونون هنا طلعم مع خالد والرجاجيل يباتون فالفندق عند ناصر وفيصل اخويا سياف وسعود
ام سعود بعدم اقتناع : بس محد فيهم علمني ؟
الجد عبدالله : ماعادم بزارين يعلموننا بكل حاجه بحياتهم يلا يابنيتي روحي استريحي من صباح وانتي تكرفين مع هالعرس ،
ام هتان : صدق ياهيلة الصباح رباح
تنهدت ام سعود وهي تقوم من مكانها: تصبحون على خير
الجد عبدالله ببتسامة: وانتي من اهل الخير يابنيتي ،
دخلت ام سعود للبيت مع انها ماكانت متطمنه على عيالها حتى بعد كلام
الجد عبدالله  اللي كان يحاول يطمنها فيه ،
ام هتان : يبه سياف وسعود وينهم ؟ متى كلمك خالد انا ماشفت حد
من العيال بعد زفه رائد
الجد عبدالله : والله مدري يابنيتي اخوانش حسن ومشعل طلعم يدورونهم ماهم محصلينهم بس ماحبيت اشغل حرمه اخوش هالضعيفه من صباحتكرف وقلبها مكسور على وليدها
ام هتان بتنهيده: لا حول ولا قوه الا بالله وينهم الحين فيه يعني يبه
الجد عبدالله : ما ادري والله يابنيتي بالي مشغول مع سياف
تنهدت ام هتان وهي تجلس قرب ابوها : يبه سياف مآله ضعيف لهالدرجة
اكيد بيتعب فتره وبيتضايق بس الله بيعوضه
وقف الجد عبدالله من شاف ابو متعب وابو سعود يدخلون للبيت )
الجد عبدالله : ها بشروني وينهم ؟
ابو متعب : والله  يبه كل العيال مختفيين ماحصلنا ولا حد منهم ولا حتى
من عيال الديره الواضح كلهم مع بعض
خذ نفس الجد عبدالله براحه : دام كذا لحمدلله لمهم انهم بخير ومع بعضهم
ابو سعود وهو يدخل للبيت : يلا تصبحون على خير
الجد عبدالله : وانت من اهل الخير