ပြန်လိုချင်တယ် (Completed) OC

Part (21) Uni/Zawgyi

ပြန်လိုချင်တယ်

အပိုင်း (21)

"အဲ့ဒီမှာ ခဏထိုင်ဦး ငါ အဝတ်အစားသွားလဲဦးမယ် အရမ်းပူလောင်နေပြီ "

ခင်သက်သည် ဆိုင်ကနေအပြန် သူမနဲ့တစ်ခါတည်းအိမ်သို့ပါလာသောယမင်းအား ဧည့်ခန်းကဆိုဖာမှာထိုင်စောင့်ဖို့ပြောပြီး သူမကအခန်းထဲသို့ခပ်သုတ်သုတ်ပြေးဝင်သွားသည်။

"လုပ်လုပ် ငါဒီမှာ ဖန်ခွက်တွေယူပြီး မုန့်တွေထည့်ထားလိုက်မယ်"

ယမင်းသည် ခင်သက်၏အိမ်သို့အခုမှရောက်ဖူးသူမဟုတ်။ ​ထို့ကြောင့်ကိုယ့်အိမ်ကိုယ့်ရာလိုပဲ သူမတို့သောက်ဖို့စားဖို့ဝယ်လာသော ပီဇာများနှင့်ဝိုင်ပုလင်းကိုယူ၍ ထမင်းစားခန်းထဲသို့ဝင်သွားသည်။ ယမင်းက ပီဇာဘူးကိုဖွင့်ကာ ပန်းကန်တွေထားသောစင်ပေါ်ကဝိုင်ခွက်နှစ်ခွက်ကိုယူလာပြီစားပွဲပေါ်သို့တင်လိုက်သည်။ ထို့နောက်ဝိုင်နီပုလင်းအား ရေခဲသေတ္တာထဲကဖောက်တံဖြင့်ဖွင့်ဖောက်လိုက်သည်။ ပီဇာဘူးကိုအရင်ဧည့်ခန်းထဲကစားပွဲပေါ်သို့သွားထားလိုက်ပြီးမှ ဝိုင်ပုလင်းနှင့်ဝိုင်ခွက်များကိုယူလာသည်။

ယမင်းက စားစရာသောက်စရာများအဆင်သင့်လုပ်ပြီးသည်နှင့် ခင်သက်က သူမရဲ့အခန်းထဲကနေ ဆံပင်ရှည်ကြီးကိုလည်းနောက်မှာစကုပ်ဖြင့်ကုပ်တင်ထားလျှက် ပေါ့ပါးသောဘောင်းဘီတိုကလေးနှင့် အင်္ကျီဂျိုင်းပြတ်လေးကိုလဲဝတ်လာသည်။

"အမလေးလေး ပူလိုက်တာ "

ငြီးငြူလျှက် ယမင်းအနားသို့လမ်းလျှောက်လာသောခင်သက်အား ဘောင်းဘီစကပ်ပွပွနှင့်တီရှပ်အဖြူကိုလွတ်လွတ်လပ်လပ်ရှိအောင်ဝတ်ထားပြီး ဆံပင်တိုကလေးကိုနားနောက်သို့ညှပ်သွင်းထားသည့် ယမင်းက

"ဟဲ့ Air Con ဖွင့်ထားတာပဲအဲ့သလောက်လည်းမပူတော့ပါဘူး နင်ကလည်း"

"ပူတယ်ဟဲ့ ငါကဆောင်းရာသီခိုက်ခိုက်တုန်အောင်ချမ်းချင်ချမ်းပါစေ ရတယ် ပူရင်တော့လုံးဝမနေနိုင်ဘူး"

ခင်သက်က ဧည့်ခန်းထဲကအလှစားပွဲကြီးအောက်တွင်ခင်းထားသောအမွှေးပွ ကောဇောကြီးပေါ်သို့ ဒူးတစ်ဖက်ထောင်ပြီးထိုင်ချလိုက်သည်။ ယမင်းကတော့ ဆိုဖာပေါ်မှာထိုင်နေပြီးခြေပစ်လက်ပစ်ထိုင်နေသည့်ခင်သက်ကို ကြက်သားပီဇာတစ်စိပ်ယူပေးသည်။