Obsession 1, Owning Her (Complete) Under Editing

Chapter Twenty-six

AYAW na muna sanang pumasok ni Alexa sa kumpanya pero pinapapunta siya ng papa niya dahil nagdesisyon si Roger na magkaroon ng munting pagtitipon para klaruhin ang tungkol sa eskandalong kinasasangkutan niya. Pagkakataon na niya iyon para magsalita at depensahan ang sarili.

Sa conference room kung saan inimbitahan lahat ng opisyales ng kumpanya at ilang empleyado na bumabatikos sa nasabing eskandalo. Ang ilan ay nagrereklamo dahil nag-aalala ang mga ito para sa susunod na magiging presidente ng kumpanya. Paano raw magagampanan ng susunod na presidente ang tunkulin nito kung sarili nitong relasyon sa magiging asawa ay hindi nito napangalagaan.

Iginiit ng mga ito na hindi seryoso si Alexa sa pagpapakasal kay Franco dahil may kalaguyo siyang ibang lalaki. Daladala pa rin ng dalaga ang kahihiyan habang pilit humaharap sa mga taong bumabatikos sa kanya. Nakaupo siya sa tabi ng kanyang ama at sa kanyang kaliwa ay nakaupo si Franco.

Nakita niya si Gaizer na nakaupo sa dulo ng mahabang lamesa katabi si Kent at iba pang opisyales. Si Roger ang nagbukas ng usapin. Nakaupo ito sa kabilang dulo ng lamesa.

"Para matapos na ang isyu tungkol sa video'ng kumalat, binibigyan ko ng pagkakataong magsalita si Ms. Alexa San Diego tungkol sa eskandalong kinasangkutan niya. Marami ang nagtatanong kung sino nga ba ang lalaking kasama niya sa video. Magkalita ka, Alexa. Sabihin mo sa amin ang totoo," sabi ni Roger.

Kinakabahan si Alexa. Nakatutok sa kanya lahat ng atensiyon ng mga tao. Tumigil ang paningin niya kay Gaizer na seryosong nakatitig sa kanya. Kahit anong pagpapalakas niya sa kanyang loob ay hindi niya kayang magsalita at aminin kung sino ang lalaking kasama niya sa video.

"Magsalita ka na, anak," udyok sa kanya ng papa niya.

Nanginginig ang kamay niya. Hindi talaga niya kaya. Kumislot siya nang biglang hawakan ni Franco ang kamay niya.

"Ako na ang magsasalita. Natu-trauma na si Alexa sa nangyayari kaya huwag na natin siyang usigin," sabi nito saka ito tumayo at kinuha ang atensiyon ng lahat.

Lalo siyang kinabahan sa isiping sasabihin nito ang totoo.

"Huwag na nating palakihin ang isyu na ito. Pasensiya na dahil hindi kami nag-iingat. Ako na ang magpapaliwanag. Ako ang kasama ni Alexa sa video. Walang ibang lalaking nakakalapit sa kanya kundi ako. Kauuwi ko lang n'on mula Cebu at pinuntahan ko siya kaagad. Sobra ko siyang na-miss kaya hindi ko napigil ang sarili ko. Ang naging problema doon, mayroong pumuslit na kuhaan kami ng video. Maaring isa sa panig ng kalaban ko sa mana ang may pakana ng pagkalat ng video. Gusto nilang sirain ang kasal ko. Umaasa ako na matitigil na ang isyu dahil labis na itong nakakaepekto sa pagsasama namin ng fiancee ko. Humihingi ako ng paumanhin. Kahit ganoon ang nangyari ay matutuloy pa rin ang kasal namin sa susunod na linggo," paliwanag ni Franco sa mga tao.

Nawindang si Alexa. Hindi niya inaasahan ang hakbang na ginawa ni Franco. Umugong ang mga komento ng mga tao. Mayroong naniniwala at mayroon ding nagdududa pa rin. Hindi na iyon mahalaga. Nakahinga siya nang maluwag nang magsialisan na ang mga tao.

Nag-usap si Roger at ang papa niya. Pinayuhan siya ng mga ito na maging maingat sa susunod. Nang silang dalawa na lang ni Franco ang naiwan ay nilapitan niya ito. Papaalis na rin sana ito.

"Franco," pigil niya rito.

Hinarap naman siya nito. Hindi na ito katulad dati na magaan ang pakikitungo sa kanya.

"Bakit mo ginawa 'yon?" tanong niya.

"Ano'ng gusto mong gawin ko, ilaglag ka? Hindi ako ganoon kasama, Alexa. Kahit binigo mo ako, wala akong karapatang kamuhian ka. Nirerespeto ko ang desisyon mo. Nasa iyo pa rin nakasalalay ang kasal. Nakapagdesisyon ka na ba?" anito.