မျောလွင့်နေသော ပြာမှုန်များ

Chapter 48.1

Chapter 48.1

ကျန်းရွှယ်မေ့နှင့် ကျန်းယီမန့် Sမြို့ကိုရောက်သောအခါ ယီဟွေ့က ကျိုးကျင်ဟမ့်နှင့်အတူ အစာမကြေနိုင်လောက်သည့်ညစာအား စားပြီးသွားခဲ့သည်။

တံခါးဝတွင် ကားအသင့်ပြင်ထားပြီးဖြစ်သည်။ ယီဟွေ့မှာ အလျင်လိုနေပေရာ သူ မငြင်းဆန်တော့ချေ။ သူကနောက်ခုံတွင်ထိုင်ပြီး တစ်ယောက်ယောက်လာမည်ကို စောင့်နေလိုက်သည်။ သူကခေါင်းကို အပြင်ထုတ်လိုက်ရာ ကျိုးကျင်ဟမ့်မှ ဒရိုင်ဘာအား တစ်စုံတစ်ခုရှင်းပြနေသည်ကို တွေ့လိုက်ရသည်။ ပြီးနောက် သူကယီဟွေ့ဘက်လှည့်ကာ ပြောလိုက်၏။

"ကိုယ် လုပ်စရာရှိသေးလို့ မင်းနဲ့အတူ အန်တီ့ကို လိုက်မကြိုပေးနိုင်တော့ဘူး"

ယီဟွေ့သည်လည်း သူနှင့်အတူ မသွားချင်သော်ငြား ကျိုးကျင်ဟမ့်မှ ယင်းကို တမင်စီစဉ်ခဲ့သည်မှာ ထင်ရှား၏။ ညရောက်ပါက သူ့အတွက် မည်သည့်တာဝန်တို့က စောင့်ကြိုနေလိမ့်မည်နည်း။

ကားက လမ်းမထက်ကို တဖြည်းဖြည်း မောင်းသွားပြီး ယာဥ်ကြောထဲကို ဝင်ရောက်သွား၏။ ယီဟွေ့ ပြတင်းပေါက်အပြင်ဘက်ကို ကြည့်လိုက်သည်။ ကျိုးကျင်ဟမ့်က နေရာတွင်ရပ်ကာ သူထွက်လာရာဘက်သို့ ကြည့်နေဆဲပင်။ သူ့ပုံရိပ်က ရှည်လျားပြီးဖြောင့်မတ်၍နေ၏။ သို့ပေသိ ညအမှောင်ထဲတွင် သူက အထီးကျန်ဆန်ပြီး တည်ငြိမ်၍နေလေသည်။

လမ်းတွင် ယီဟွေ့က တစ်ခါတစ်လေ မျက်လုံးကိုဖွင့်ထားကာ တစ်ခါတစ်လေမှာတော့ ပိတ်၍ထားသည်။ ဖန်ကွက်တို့မှ အလင်းရောင်နှင့်အရိပ်တို့က သူ့ရှေ့တွင်ဖရိုဖရဲမြောလွင့်နေလေရာ အနှီစားသောက်ဆိုင်သို့ သူနောက်ဆုံးအကြိမ် လျှောက်ဝင်သွားခဲ့ချိန်အား တွေးတောမိစေသည်။ ကျိုးကျင်ဟမ့်နှင့်အတူပင် ဖြစ်ချေ၏။

ထိုအချိန်က သူက ၂၃နှစ်ရှိပြီဖြစ်ကာ ကျိုးကျင်ဟမ့်မှာမူ ၁၉နှစ်သာရှိသေး၏။ သူတို့၏ဆက်ဆံရေးကို ဘုန်းတော်ကြီးရှေ့တွင် အတည်ပြုပြီးကာစ၌ဖြစ်သည်။