في صباح اليوم التالي ذهبت هدى إلى المدرسة وكلها ثقة في الله سبحانه وتعالى أنه سيظهر الحقيقة دخلت هدى حجرة الشؤون القانونية وقام الممثل القانوني للمدرسة بسؤالها عدة أسئلة.
الممثل القانوني:« أستاذة هدى انتى متقدم فيكي شكوى بأنك بتستخدمي العنف مع التلاميذ في الفصل ما هي أقوالك فيما هو منسوب اليكي؟»
هدى:«ما حصلش يا فندم أنا عمري ما ضربت طالب لأن ببساطة دول أطفال محتاجين للحنان والحب عشان يقدروا يفهموا مني المعلومات وأنا أصلاً ضد العنف.»
الممثل القانوني:« بس دلوقتي في أولياء أمور للطلبه اللي انتي مارستى عليهم العنف موجودين وبيأكدوا الشكوى.»
هدى:«خلاص حضرتك تقدر تواجهني بيهم ولو أثبتوا فعلا إني عملت كده أنا مستعدة لأي عقاب.»
قام الممثل القانوني بإدخال أولياء الأمور وحينما رأوا هدى قاموا بالهجوم عليها وألقوا على مسامعها كلمات موجعة ولكنها ظلت صامتة ولم تعيرهم أي إهتمام وظلت واثقة من حالها.
إحدى الأمهات:« منك لله انتى عقدتى ابني بقا يخاف ييجي المدرسة بسببك أنا ابني هيضيع مني حرام عليكي.»
أم أخرى:« إحنا بنجيب ولادنا هنا عشان تتعلم ولا عشان تتضرب.»
هدى بهدوء:« لو سمحت حضرتك أنا عاوزة الأولاد دي تيجي هنا عشان حضرتك تتأكد إذا كنت ضربتهم ولا لا؟»
أحد الأمهات بتوتر:«ولاد إيه اللي ييجوا ما ينفعش طبعا كده نفسيتهم هتتاثر وبصراحة كفاية عليهم أوي كده، حضرتك تعملها لفت نظر وتعتذر وتوعد إنها ما تتعاملش مع الأولاد بالطريقة دي تاني.»
هدى:«لا حضرتك أنا مصرة إن الأولاد دي تيجي هنا ودلوقتي وأنا هثبتلكم إن الكلام ده ما حصلش.»
وبالفعل أحضر الممثل القانوني الأولاد ثم بدأ في سؤالهم.
الممثل القانوني:« ها يا حبايبي الحلوين كنت عاوز اسألكم شوية أسئلة صغننين بس تجاوبوا بصراحة اتفقنا.»
الأولاد:« اتفقنا.»
الممثل القانوني:« قولولي بقا هي مس هدى بتضربكم في الفصل لو محدش عمل الواجب؟»
أحد الأولاد:« لا يا مستر مس هدى طيبة وبتحبنا وما بتضربش حد فينا.»
الممثل القانوني:« بس أكيد بتزعقلكم لما تعملوا دوشة في الفصل وتضايقوها.»
ولد آخر:«مس هدى مش بتزعق لينا خالص دي دايما بتهزر معانا وتلعب معانا بالعرايس الحلوة في الفصل.»
الممثل القانوني:« بس مس هدى هتمشي خلاص وتسيب الفصل وتروح لفصل ثاني.»
بدأ الأولاد في البكاء وذهبوا باتجاه هدى واحتضنوها بشدة.
أنت تقرأ
الكاتبة والفتوة
General Fictionكانت تحلم دائما كأنها إحدى بطلات الروايات التي يخطفها الفارس على الحصان الأبيض، فيقوم بطل الرواية بتعذيبها قليلا، ثم يقع في حبها ويتزوجها كعادة الكثير من الروايات لم تكن تعلم أنه سيأتي يوما ويتم خطفها بالفعل، ولكن هل سيكون خاطفها هو فارسها؟ هيا بنا...
