بعد عدة أيام كانت هدى تجلس مع زميلاتها في حجرة المدرسات حينما دخل عليهم وكيل المدرسة
وكيل المدرسة( عبد الرحمن):« صباح الخير عليكم جميعا.»
الجميع:«صباح النور يا مستر عبد الرحمن.»
عبد الرحمن:« أنا كنت عاوز أبلغكم خبر كويس وهو إن الحمد لله الأستاذ أيمن بدأ يسترد صحته والنهاردة بعض الزملاء هيروحوا يزوروه وبكرا بقية الزملاء هتروح، فشوفوا حابين تروحوا النهاردة ولا بكرا عشان بكتب قائمة بأسماء الناس اللي هتروح النهاردة واللي هيروحوا بكرا.»
سلوى:«وهنروح إزاي يا مستر عبد الرحمن مواصلات؟»
عبد الرحمن:«لا طبعا يا مس سلوى الزملاء اللي معاهم عربيات هياخدوا زمايلهم معاهم عشان ميبقاش في بهدلة ليكم وما تتأخروش على بيوتكم.»
دينا:«خلاص تمام يا مستر عبد الرحمن يبقى هنروح معاكم النهاردة.»
عبد الرحمن:« وانتي يا هدى هتيجي ولا لا؟»
هدى:« أكيد طبعاً يا مستر عبد الرحمن مهما حصل هو بردو زميلي وأكيد أحب أطمن عليه.»
عبد الرحمن:«جزاكى الله كل خير يا هدى دي فعلا أخلاقك الطيبة اللي اتعودت عليها. خلاص هنتجمع بعد الشغل ونروح نزوره عن اذنكم.»
بعد انتهاء اليوم الدراسي تجمعت المجموعة المتفق عليها للذهاب لزيارة أيمن وركبوا السيارات وتوجهوا إلى المستشفى التي يتعالج بها أيمن دخل الجميع وجلسوا معه واطمئنوا على حالته وبدأوا في سؤاله عن ما حدث له مع استغراب البعض منهم حيث أنه لم يكن له أي أعداء رغم معرفتهم بشدة حبه للمال والسلطة وامتلاكه صفة الغرور ولكن لم يملك أعداء يوماً، بدأ أيمن في سرد ما حدث معه.
أيمن:« كنت خارج من السنتر بعد ما خلصت الدروس وعربيتي كانت مركونة بعيد شوية عن السنتر لأن كان في تصليحات في الشارع عشان كده ما ركنتهاش قدام السنتر كالعادة، مشيت لحد ما وصلت قدام العربية ولسة بطلع المفتاح لاقيت حد ضربني على دماغي وقعت على الأرض لكن كنت واعي بصيت لاقيت قدامي ثلاث هضبات واقفين قدامي شكلهم يرعب سألتهم أنتم عاوزين مني إيه لكن محدش فيهم رضا يفهمني كل اللي كانوا بيعملوه إنهم بيضربوني ويكسروا كل حتة في جسمي وسابوني سايح في دمي ومشوا ومحستش بنفسي إلا وأنا هنا في المستشفى.»
سلوى بتهكم:«مش يمكن أذيت حد يا مستر أيمن وكان بينتقم منك مثلا.»
أيمن:« أنا عمري ما أذيت حد يا مس سلوى وعمري ما كان ليا أعداء أنا طول عمري ما بعملش حاجة غير إني بشتغل عشان أحقق طموحي مش فاضي أعمل عداوات مع حد.»
دينا بهمس:« واللي عملته مع هدى ده إيه إن شاء الله مش أذية.»
أيمن:« بتقولي حاجة يا مس دينا؟»
أنت تقرأ
الكاتبة والفتوة
General Fictionكانت تحلم دائما كأنها إحدى بطلات الروايات التي يخطفها الفارس على الحصان الأبيض، فيقوم بطل الرواية بتعذيبها قليلا، ثم يقع في حبها ويتزوجها كعادة الكثير من الروايات لم تكن تعلم أنه سيأتي يوما ويتم خطفها بالفعل، ولكن هل سيكون خاطفها هو فارسها؟ هيا بنا...
