هدى بصراخ:« انت بتهزر عيشتني في رعب اليومين اللي فاتوا دول وفي الآخر تطلع انت اللي خاطفني انت بتستهبل يا فهد.»
فهد بضحك:« في إيه بس يا أستاذة إيه اللي مزعلك دلوقتي مش دا كان اتفاقنا؟»
هدى بحدة:« نعم يا أخويا اتفاقنا انت بتستهبل هو انت كنت واخد كلامي جد انت عارف كويسإاني كنت بهزر.»
فهد:«بس أنا ما كنتش بهزر يا ست البنات وكلامي معاكي كان جد وبعدين أنا عملتلك كل اللي طلبتيه ما خلتش تفصيلة انتى قولتي عليها إلا وعملتها.»
هدى:«يا فهد بطل هزار وتعالى يلا روحني أنا أهلي زمانهم قلقانين عليا.»
فهد:« تروحي إزاي يا قطة قلبي الصعيدي هو دخول الحمام زي خروجه.»
هدى:«قصدك إيه؟»
فهد:« قصدي إني بحبك وعاوز أتجوزك يا ست البنات.»
هدى بصدمة:«نعم بتحبني وعاوز تتجوزني انت أكيد بتهزر وهزارك سخيف على فكرة.»
فهد بثقة:« بس أنا مش بهزر أنا بتكلم جد وبحبك ومتأكد كمان إنك بتحبيني.»
هدى بحدة:«وإيه إن شاء الله اللي مخليك متأكد إني بحبك شوفت مني إيه أو عملت إيه يخليك تفتكر إني بحبك وبعدين بالعقل كده لو أنا بحبك هتخطب لغيرك؟»
فهد:«معلش يا ست البنات دي غلطتي لأني اتأخرت في إني أبوح بمشاعري ليكي ويمكن ده سبب في إنك تقبلي الخطوبة دي بس ملحوقة وأديني أهو اعترفتلك بحبي ورغبتي في إني اتجوزك.»
هدى في محاولة منها للهدوء:« أولا يا فهد أنا عمري ما كان في قلبي أي مشاعر من ناحيتك وأظن إن أنا ما عملتش حاجة أو حتى إديتك إيحاء إني بحبك نفسي أعرف بقا انت إزاي وصلك إحساس إني بحبك؟»
فهد بهيام:«كل كلمة كانت بتطلع منك ليا كل ضحكة كانت بتدخل قلبي وتلمسه من جوه وبعدين أنا الوحيد اللي كنت بتكلميه وتتناقشي معاه في رواياتك.»
هدى بصراحه:«هو أنا عشان اتعاملت معاك بطبيعتي وما كنتش متصنعة يبقى كده بحبك وبعدين أنا بتناقش مع ناس كتير مش انت بس وطالما أنا بتكلم مع الناس في حدود الأدب وهم كمان بيتعاملوا معايا بالأدب فإيه المشكلة، وهو يا فهد كل واحد هتناقش معاه هحبه وهتجوزه؟»
فهد:«بس أنا غير أي حد يا ست البنات ومينفعش أتقارن مع أي حد تاني وبعدين يا قطة أنا عارف إنك بتتناقشي مع القراء بس مفيش حد فيهم بتحكيله على مشاكلك وإيه اللي بيفرحك وإيه اللي بيضايقك.»
هدى بندم:« لأنى اعتبرتك صديق شوفت فيك الأخ اللي مش عندي حبيت تشجيعك ليا وإيمانك بيا ثقتك فيا إني هنجح وأحقق حلمي اتعاملت معاك بثقة ويمكن دا عيبي إني بيبقى عندي ثقة زايدة في الناس هو أنا غلطت لما عملت كده غلطت لما اتعاملت معاك كأخ وصديق؟»
YOU ARE READING
الكاتبة والفتوة
General Fictionكانت تحلم دائما كأنها إحدى بطلات الروايات التي يخطفها الفارس على الحصان الأبيض، فيقوم بطل الرواية بتعذيبها قليلا، ثم يقع في حبها ويتزوجها كعادة الكثير من الروايات لم تكن تعلم أنه سيأتي يوما ويتم خطفها بالفعل، ولكن هل سيكون خاطفها هو فارسها؟ هيا بنا...
