မှော်ကုန်းမြေမှအစားအစာထောက်ပံ့သူစနစ်

Chapter 36

အပိုင်း - ၃၆ (စမ်းသပ်မှုအတွက်ထွက်ခွာခြင်း)

"မင်းဘာလိုချင်တာလဲ ငါမေးလို့ရမလား"

သူ့ဆီလာတဲ့သူကတော့ ချန်းလင်ပင်ဖြစ်၏။ ထိုအချိန်တွင် ချန်းလင်မှာ သူ့မျက်နှာတွင် အပြုံးတစ်ခုကို ချိတ်ဆွဲထားပြီး လက်ကိုပိုက်လျက်ပြောလိုက်သည်။ "လင်းချီ မင်းကိုယ်မင်း ငါ့အိမ်တံခါးရှေ့ လာပို့‌ရလောက်တဲ့အထိ မိုက်မဲလိမ့်မယ်လို့ ငါမထင်ခဲ့ဘူး!"

လင်းချီ ချက်ချင်း တွေးရခက်သွားသည်။ "မင်းဘာကိုဆိုလိုတာလဲ ငါနားမလည်ဘူး"

ချန်းလင် အနည်းငယ် အံ့သြသွားသော်လည်း အလျင်အမြန်ပင် စိတ်ကို တည်ငြိမ်အောင်လုပ်လိုက်သည်။ “မင်းကိုပြောမယ် ငါနောက်ဆုံးအခေါက်က ကိစ္စနဲ့ပတ်သတ်ပြီး ဒေါသထွက်နေတုန်းပဲ မင်း ငကြောက်တစ်ကောင်လို ဒီမှာ တစ်သက်လုံးနေရင်နေ မဟုတ်ပဲ ဒီလေနက်ခံတပ်ထဲကနေ ထွက်သွားရဲရင်တော့ ငါမင်းကို သင်ခန်းစာပေးပစ်မယ်"

“မင်းတကယ်လုပ်မယ်ဆိုတာ ငါသိပါတယ်” လင်းချီ၏ အမူအရာမှာ အေးစက်နေပြီး သူ့စကားကို လုံးဝအလေးအနက်ထားပုံမ‌ပေါ်ပေ။

သူ့တုံ့ပြန်မှုက ချန်းလင်၏ တစ်ကိုယ်လုံးကို ဒေါသကြောင့် ထူပူသွားစေခဲ့သည်။ သူ အံကြိတ်ကာ ခေါင်းကိုတဆတ်ဆတ်ငြိမ့်သည်။ "အေး မင်းကြပ်ကြပ်သတိထား‌နေ!”

ထိုစကားကို ပြောပြီးနောက် သူ့အ‌ဖော်များနှင့်အတူ တောင်ဘက်မြို့တံခါးသို့ ဦးတည်သွားလိုက်ကြသည်။

လင်းချီ၏အဖွဲ့လည်း ပစ္စည်းများကို ထုပ်ပိုးပြီးနောက် အမြန်လိုက်သွားကြသည်။

တောင်ဘက်မြို့တံခါး၌ အစောင့်အကြပ်များစွာကို ချထား၏။ မြို့အရှင်သည်လည်း ကျန်ရှိ‌သော ပြိုင်ပွဲဝင်အနည်းငယ်ကို မျက်နှာမူလျက် ဂိတ်တံခါးရှေ့တွင် ရပ်နေသည်။ "ကောင်းပြီ ကျုပ် အခု နာမည်စာရင်းကို ထပ်အတည်ပြုမယ်"

"မုန်တိုင်းမြို့‌‌တော်ရဲ့ ပြိုင်ပွဲဝင်များ - ချန်းလင်၊ ဟွမ်ထျန်၊ လင်းမုန့်ယောင် နဲ့ မိုနာ"

"လင်းလုံမြို့‌တော်ရဲ့ ပြိုင်ပွဲဝင်များ - သုန့်လင်၊ သွမ့်အော်ထျန်၊ ကျီယန် နှင့် ပိုင်ဖုန်း"