بعد ألخذلان

٢٣

يزن ..

شفت يونس بهت من عرف سكرها نازل واحتمال يشكل وياها تراجع وكعد ع واحد من المقاعد الموجوده بالممر

سالت الدكتور

..دكتور يعني الي عدها هبوط عادي لو حاله مزمنه
مفهمت شنو نسوي حته ميستمر وياها شنو العلاج وشلون نتصرف نسيطر اذا بعده بالبداية؟

..ماكو داعي للقلق هوه حاله عرضيه لازمها غذاء وعنايه خلي تعوض بعصائر طبيعيه خليها تاكل باليوم اقل شي اربع قطع حلاه بين ميستعدل اني خليتلها مغذي حلوو ومالح هسه
وخل تراجع طبيبه نسائيه راح تطلب منها عدة تحاليل للسكر التراكمي او المخفي
وتجيك وضعها الي فهمته البنت متعرف لازمها بهالأشهر فيتامينات فولك اسد كالسيوم
اكدر اكتبهم الها لكن طبيبة اختصاص افضل تشوف حالتها وربي يعافيها لتخافون شويه وتصير احسن بس يخلص المغذي

سكتت وعيني ع يونس وعمي اريد استوعب الي صار عقلي اتشتت حامل وتعبانه واحتمال يشكل وياها سكر واني وين عن كل هذا شلون الهسه ماتعرف حملها شلون ماحسيت بيها
لحظات وحسيت قلبي دكاته اختلفن فرحه احس حركت حته معدتي مو بس قلبي فرحان اعضائي كلها ايامي وحامل وحيصيرلي طفل منها ..اتذكرت السويته بيها وطولة لسانها وياي اتلاشت البسمه يعني هيه جانت مريضه وتعبها خارج سيطرتها بسبب حملها بس معرفت توصل تعبها ولاعرفت شلون تشرح مشكلتها حجتها بامر وبنبرة تسلط وهالشي مااقبل بي ابد يمكن لان من الصغر امي عاملتني معاملة رجال دائما عدها كلشي بالتفاهم وتكلي انت رجال البيت وكلمتك تمشي عليه بس اني هم مااستغليت هالنقطه وطغيت عليهم بالعكس صرت صديق الها والزينه ابد مايوم صاحت عليه ولاامرتني ولا قللت من قيمتي وكبرت زينه ونفس الحاله بحياتي كلها ماكو وحده صايحه بوجهي لو قللت من قيمتي بس هيه فوكاها ياريت لو بس صوت كلامها بي تجاوز واستخدمت وياي طرق متليق بيها ولا بيه
مع هذا الي سويته غلط شلون اضربها وهيه تشوفني الامان الها بعد زواجها گالتلي حسيت وياك.بالامان اكثر حته من بيت اهلي جنت خايفه من المشاكل ومن كلشي.. خوش امان اطلعت
مسحت وجهي بقهر تنهدت ..كلشي سهل هسه وكلشي ينحل بس خل ترجعلها عافيتها

شفت عمتي ام حسام.طلعت من يمها توجهتلها

..شلونج عمه ..شلون صارت ايام

..هلاو عمه شلونك ..الحمدلله صحت هسه وزينه شويه وتطلع

..يعني زينه هيه كعدت حاجتج لو لا ..مااكدر افوتلها ممنوع الدخول بس اوقات الزياره يكلون

..اي عمه ممنوع لأن للنساء ومنتهي وقت الزياره هسه احنه مباقين نطلع
شفت عمي قريب يمي حاجه عمتي

..ام.حسام شلونها ايام بعدهي فاقده لو صحت

..الحمدلله حجي لتخاف عليها والله مابيها شي زينه صحت وفرحت بحملها..دير بالك على صحتك انت شصار بيك قبل شويه يكبرون ونفس اللهفه بينه الهم من يتمرضون نتمنى احنه نتمرض ولاهمه