جيرانا عندهم خمسة اولاد،، بنات الفريق كلهم ساكنات سكنة في بيتهم وانا واحدة منهم 😂😂😂،، المصيبة انهم ما عندهم اخوات،، يعني بنمشي قلة ادب عينك عينك،، امهم كبيرة كدا في السن بتكون تمت ال كم وستين لكن بقينا ليها كترت بنات ننضف ونغسل ونكوي ونمسح،، البيت بقي عامل زي دار السينما،، بنات طالعة وبنات داخلة وكل واحدة تحدر للتانية،، انا كل يوم شكلتي مدورة مع امي،،
جزء من الشكلة :
شكيتك علي الله كان عايزة تقصري عمري أخر الزمن داخلة وطالعة من بيت اولاد شرطتي عيني مع نسوان الفريق قالو لي بتك قاهرة،،
النصيحة انا ما بشكر ليكم نفسي وقالو شكار نفسو ابليس 😂😂😂 انا شكااااالة وقليلة أدب ولساني متبري مني لكن طيبانة وعلي نياتي،، غايتو الله يغفر لي حق أمي دي كل يوم شاكينها لي،، ما خليت لي بت في الفريق ما دقيتها وما خليت لي مرا ما نبزتها لمن حرمن علي اولادن كان يعرسوني،،
يا بتي ما تتهدي في البيت دا وريحيني،، أمنة شنو البتعرس ليك واحد من اولادا،،
يمة انتي كان استهديتي باالله وبدل تدعي علي تدعي لي كان اتعرسته،،،
نان تعرسي كيفن وانتي عاملة لي محمد ولد كدا،، يابتي ابوك زاتو غلب حيلة فيك،، رسلك عند عمك رجعك بي دربك ما قدر عليك..
امي انا هسي شكيت ليكم انتو براكم الرافعين ضغطكم،،
ووووب انا سجم خشمي تعالي ادخلي لي جوه غسلي لي العدة بدل تغسليها لي أمنة،، هي الولدتك ولا الربتك ولا تعبت عليك سببك عليها شنو تخدميها..
ولا داولا دا يا امي لكن عندها الاولاد لو شافتني خدومة كدا بتعرس لي واحد منهم يا امي دا بدل تدقي معاي الحنك قبل اتم الكلمة دي جاني صاروخ ارض جو سفنجة طايرة وطاااااخ رو في الباب كان ما زحيت بس الله ستر ولطف،،
يلوي حنكك يابت الكلب،،
😂😂😂 طبعا قعدت اضحك هسي يا امي ابوي زنبو شنو تنبزيه كل مرة في صمت خشمو..
زنبو ابوك الجابك وما قاعد يسألك..
امشي شوفي بنات اهلك ابقري منهم ساي يتختو في الجرح يطيب اريتني لو عندي اولاد كان عرستهم ليهم،،
اجي يا امي ومحمد دا ولد جيرانا عرسي لي الكلبوظة الفضلت ليهم دي والله رغيف ساي تفلس بيه واتفقعت بالضحك .. بلاي اه خليني منهم مايصات وحنكوشات ديل اننننني يرققن في اصواتن وهي هي هي يتجالطن،، وضاربات بهية شي اصفر وشي اخدر،، دا شنو دا العاجبك فيهن شنو...
قالت لي الله يهديك يا لينا ويجيب ليك المدلول من عندو بس كبرتي بي جهلك،، خسارة الاسم السمح..
ما عجبني الكلام وبعد كنت عايزة اطلع رجعت تاني مزاجي اتعكر،، دخلت ورقدت في السرير بقيت بفكر في كلام امي،، كبرتي بي جهلك 😖 هو الصراحة لكن بعد مياصتهم دي عرسو وانا عملت شنو ياني هدي مرزوعة جمب اهلي لا تميت قرايتي ولا عرس لا خطوبة ولا سجم رماد،،
كدي خليني من كلام امي دي ياربي قصي قاعد يعمل في شنو انا من اشوفو ساي بقعد برجف احييي انا دا مكسر بنات الفريق كلهن وفوق لي دا صيدلي وعندو عربية..
النصيحة حاجة امنة دي ولدت وربت اولادا كلهم ما شاءالله عندها الدكتور والمهندس وبالميت كدا الما قري ليها كويس شغال في مدرسة استاذ وعامل الماجستير.. عشان كدا البنات بجوهم جاريات بإعتبارهم عرسان لقطة فريق زاتو نحس تقول بنات الخرطوم كلهم ما عرفو يلدوهم الا فيه ولا بايرات كلنا ،، بس امهم دي بتزكرني بي فيفي عبده قادرة كدا ومتسلطة لكن نعمل شنو ولي النعمة هي مع انها فقر،، لكن كدي النضمن لي واحد فيهم بوريها النجوم نص النهار كان اخلص حقي كلو منها...
يوم كنت مع امي شغالين نكنس في الحوش بره سمعت زغاريد،، جدعت المقشاشة امي مش دي جاية من بيت ناس حاجة امنة ولا انا بسمع غلط.. قالت لي اي والله جاية منهم،،
اجي عندهم شنو اتخلعته ونططه عيوني وجري لفحت التوب وجيت طالعة،، لقيت الحوش دا مليان للشارع بنات واحدات يبكن وواحدات متكلنهم،، واااي في شنو،، واحدة قالت لي قصي وتبكي،،
سجمي دقيت صدري بي يدي مالو؟
قالت لي خطب زميلتو معاه في الصيدلية وجينا نشوف الشمار...
ما باقي لي الا اقعد في نص الحوش واعزي واكورك بي طول حسي واكشح التراب في راسي الليلة وووب ووووب انا يا حليلي وحليل شبابي الضاع مع قصي..
جيت البيت نفسياتي في الواطا طبعا صمته يومين من الاكل لكن بقيت بشوفو طشاش طشاش في الشارع بلاقيني بسلم ما بسلم عليه وفي سري،، المفتري الجبان شاحدة ربي تغشك تاكل قروشك وتفكك عكس الهوي.... بقيتني يا قصي حايمة في البيت وبكلم في روحي ،، ختيت كراع في كراع وملفلفة شعراتي اربعة كعكات وبقيت ممحنة وشغالة بي يدي بكلم في روحي السمعتو من بنات الفريق انهم مشو شافوها قالو خدرا ومعصعصة وشينة ،، كتبتو وحات الله كتبتو انا متاكدة يعني حا يعجبو فيها شنو وهي كلها عصبات ،، هم زاتو مافي بنات مفتحات غير العصعوصات ديل هن البعرسن سريع ،،حقو اصاحب لي واحدة اتنين منهم ،،
اجي يا بتي بتتكلمي براك مالك ..
يا امي كتبتو البت دي ..
قالو المجانين في نعيم كتابة شنو ،،
قمت من مكاني ما رديت وقفت اشرب وبعاين جهة الباب ما مشكلة يا لينا لسه عندو اربعة اخوان بكرا بعلق لي واحد منهم زاتو هو قصي دا قصير وعندو كرش الحمدلله ما اتقدم لي شكلو نهائي ما استايل،،
( كالعادة دا حنك البنات لما الواحد ما يعبرها بتطلع فيه عيوب الدنيا كلها 😂)...
