تاني يوم الصباح طلعنا الشركة وكنا ساكتين ماف زول اتكلم فينا ،، عقلي كان شغال بي جوه ،، زي الساعة 12 اتصلت بي شادية عشان نمشي عند الشيخ ،، طبعا فكرت في عزو بعد كدا مسكت عليه زلة ،، جيتو المكتب قلت ليه عزو انا طالعة مشوار لي صاحبتي ضروري وصاحبك الثقيل دا كان مشيت ليه مابديني اذن ،، كلمو لي ،، قربت ارقص ليه اقول ليه بتددددقاااا ،، حسيتو اكلها ساي ،، انتظرتو غايتو بره وجا قال لي امشي لكن ما تتأخري ،، اتكيفته طبعا ،،، اها لاقيت شادية وجينا بيت الشيخ قلت ليها انا لازم اقابلو الليلة من اول عصرت للمرا 100 جنيه خليتها تتكشم براها طوالي دخلتنا ،، قعدته ليه واني عايزة فلان الفلاني وحكيت ليه موضوعي،، قال لي بس خلاص اعتبري زولك دا ليك ليك ،، بس لازم اجيب ليه منو قطعة من هدومو تشيرت او قميص المهم هدوم ليه،،
طلعت زهجانة هسي دي اجيبها كيف يا شادية ،،
قالت لي ياخ فكري ما بتغلبك تلقي ليك طريقة،،
طبعا الكلام في خشمي ما بتبلا نهائي حكيت ليك ل شادية الشفتو بالليل ،، وحصل وحصل ،، المهم اتفقنا ليك علي خطة نعملا واتفارقنا ،، رجعت الشركة دخلت المكتب لي عزو قلت ليه عايزة خدمة منك ،،
ايوااا شايف طلباتك بتدت تكتر ،،
ايون اذا طلبات الخدامة مجابة وانا بت خالتك ركز في بت خالتك دي ...
تممم سكت ساي ما رد لي ..
اها قولي عايزة شنو؟
عايزة اعمل مقلب في صدام اتسدي حقي وقلة ادبو معاي وانت عارفني انا ما بحب زول يحقر بي بعد مية سنة باخد حقي منو ..
يا زولة انتي جادة في الموضوع دا انتي عارفة لو عرفني اني معاك دي نهاية صداقتنا ووضاح دا ما بحب الهزل وجادي بطبعوو..
كلامي واضح قلت شنووو ولا ...
خلاص من دون تهديد شنو موافق عايزة تعملي شنو؟
تعزمو البيت وبأي طريقة تخليه يقعد معاك يوم يبيت يعني وانا بعمل فيه المقلب تاني بوريك ...
خييير الله يستر ..
ما عارفة قدر يقنعو كيف لكن جا قعد معانا ،، بقيت في الطريقة البتخليني ادخل غرفتهم واشيل هدومو كيفو..
بس البت الشغالة مشيت هرشتها ليك وقلت ليها لو ما عملتي القلت ليك عليه اعتبري روحك مفضوحة وبطردوك الليلة دي ،،
المهم مشت ليهم علي اساس تعمل ليهم قعدة قهوة حبشية بره وحركات وكدا ،،
طلعو بي جاي وجري دخلته الغرفة لقيت التشيرت بتاعو لفحتو وجيت طايرة الغرفة دسيتو جوه شنطتي ،،
مالك يابت جاية مخلوعة كدا ودا شنو الدخلتيه دا ،،
خليك في حالك يا نينا ولا شي ،، هي شايفة بره ديل قاعدين في قعدة قهوة ارح نمشي ليهم ،، زوغتها من الموضوع وجينا طالعين ،، بس قبلها شلت لي ملح وشطة في ورقة وجينا قعدنا ،،
قلت لي البت خليها انا بتمها خبرة في القهوة ،، وضاح عينو جات في عيني بس ما اشتغل بي عمل روحو شايل تلفونو بعاين فيه ،،
كبيت الكبابي وفي كبايتو كبيت الملح والشطة ومن جواي يلا يا اخ استحمل ...
يلا من اول بقه وشووو كباها ليك بره دا شنو دااا يااااع وقام يجقلب ليك وين الموية الباردة نينا جيبي لي موية باردة وجري الماسورة غسل خشمو،،،
في شنو وديل قعدو يضحكو وانا اتفقعت ليك بالضحك لما قعدت في الارض ،،
بعد شرب حسيت ليك عيونو محمرات وقال لي عزو احسن تلم بت اهلك دي انا لعب وحركات شفع ما بتنفع معاي ،،
قعدت اصفر بي خشمي زي ما هاميني وشمتانة فيه ،،
عزو زاتو بقي ماسك الضحكة وخايف منو ،،
قام مشي معصب ودخل جوه ،،
بس دخل كده وفكينا ليك الضحكة كلنا زي المجانين ،،
بعد قعدنا نشرب في القهوة بقت بايخة ما عارفة زعلت لشنو لانو مافي ،، حتي لو ما كان بتكلم معاي بس كنت كل شوية بعاين ليه بسرعة وبزح عيوني ،،
تاني يوم الصباح اتصلت بي شادية نمشي لي الشيخ ومن محلي طلعت لي بيتو طوالي بدري ما مشيت الشركة ،، اديتو التشيرت ،، غايتو ولع فيه بخور كدا ورش فيه موية وكان بقول ليه في كلام ما مفهوم ،، واني ارجعو تاني يلبسو بس ما يغسلو ،، لازم يلبسو اول ،،
و اداني حاجة في فتيل صغير كدا كان زيت وكان موية ما عرفتها ،، قال لي افضيها في ريحة ولازم يتريح بيها ،، وقطع لي الشك انو قبل اتم شهر الزول دا بتقدم لي ..
النصيحة اديتو قريب المليون شالها مني ،،
طلعنا ،، هسي يا لينا ح تعملي شنو تاني..
قلت ليها امشي امشي واتعلمي من صاحبتك ...
يتبع🌷
فاطمة قسم الله✏
