اتفقنا انا وصحبتي نمشي لي شيخ هي قالت لي عليه وصفتو ليها واحدة يمين ما تمت شهر وعرس ليها الود القالت عليه ،، اتفقنا سوا نعمل شنو اللهم الفنا لينا موضوع نقدر نطلع بيه ،،
جيت لي امي وقلت ليها انا و شادية عندنا صاحبتنا ولدت ماشين ليها الليلة سمايتها عزمتنا ،،
صاحبتكم منو دي؟
يا امي ما بتعرفيها ما ساكنة قريب بي جاي ..
وانتي عرفتي من وين ؟
بتعرف شادية شديد اتصلت بيها وقالت ليها تكلمني معاها ..
سمح امشي
اوووف اخيرا بعد تحقيق ..
اها تاني يوم زي الساعة 11 طلعنا من البيت ..
قلت ليها يا شادية مع اني قلبي قوي وما بخاف لكن هسي خايفة انتي متاكدة من زولتك دي ما تكون عايزة تودينا بيت مشبوه ولا حاجة نتمسك تبقي علينا عدم عرس و قضية اداب كمان..
قعدت تضحك ياخ ما مشبوه بيت الشيخ دا..
الليلة ووووب علينا كمان بيت ،،الله ياخدك يا فايز العايز تودينا ورا الشمس انا سببي شنو اضيع عشانك ،،
ياخ بطلي خوف يا لينا البشوفك في الفريق تشاكلي ما يشوفك هسي تتراجفي ،،
لا داك بفرق ،،نحن هسي ماشين زي الماشين نضيع روحنا برانا ،،
لينا وجعتي لي راسي يعني نرجع نخلي الموضوع وبعدين يا هبلة لو زبطتت الحكاية معاي مش امكن تعرسي انتي برضو عمار ود جيرانكم ..
لالا انا عمار ما عايزاه طويل واهبل وانا طول كراع السرير نجيب شفع كيف زاتو..
طااااخ ضربتني ليك في ضهري قربت اقع ..
انتي اصلو لسانك المتبري منك دا هو البودينا ورا الشمس وبتفكرونا بنات صايعات يا بت ما تتلمي ،،
والله اتلمي انتي اول المعدياها مع فايز ...
قاطعتني خلاص اسكتي ما عايزة اسمع نصايحك..
بقينا ساكتين بعد اتشاكلنا ركبنا المواصلات وجينا عديل لقينا لينا نسوان ماشات قمنا سالناهم وصفو لينا شكلهم هم ذاتهم جايات منو ،،
المهم جينا طوالي علي الوصف دقينا الباب جاتنا مرا كدا قلنا ليها دا بيت شيخ فلان ،، فتحت الباب وتاوقت بره ودخلتنا ،، قالت لينا طلعو جزمكم بره ادخلو حفيانين ،، عملنا القالتو ومن جينا داخلين نشوف ليك كترت خلق غايتو البفقد ليه مرا رايحة طوالي يفتشها في بيت شيخ ،، ريحة البخور دي طاقة مالية البيت بي جوه .. شي نسوان وشي بنات ،، اتكلمنا مع المرا الدخلتنا دي ندخل كيف مع الكميات دي ،، قالت لينا بتدخلو ،، بي هنا وبي جاي حنكناها غايتو وعصرنا ليها قروش بي تحت تحت ،، حتي يالله قالت لينا تجو بكرا الساعة 12 بالضبط بدخلكم،، اها جينا طالعين جريت شادية قلت ليها شادية ما تخلينا نقعد شوية نتونس نشوف لينا شمار شمارين نتاكد الزول دا كويس ولا كلام ساي قروشنا تضيع علينا ،، هسي عصرة ساي ضاعت خمسين جنيه مننا ،،
المهم قعدنا لينا جمب تلاتة نسوان كبار كدا ومعاهم بت ،، سلمنا عليهم وقطعنا لينا قصة من راسنا قلنا ليهم جينا عندنا اخوي متزوج لي واحدة اكبر منو وبي بناتا جايين نشوف الحاصل علي شنو ،، اها النسوان الشمار حرقن وبقن يسالن فينا ، اجي واخوكم دا لمت فيه وين الشقية دي ،،
اعجبكم انا في التاليف
والله يا خالتي تقولي شنو هو مسكين وفي حالو بعرف اخوها وهو قاعد عزابي عشان الشغل ما شغال في الخرطوم هنا ،،صاحبو دا بقي بعزمو يوم الجمعة يفطر معاه ،، اظنها عملت ليه شي ولا مصيبة زمان وعرستو ونحن ما كنا موافقين هسي تلفون بقي ما بتصلو،،
ردت واحدة منهم اجييي دي شديدة دي كان كدي ،، الا الشيخ دا بفك ليكم العمل دا عندنا وداهلنا جينا ليه قبل كدا وهسي طلقا ،،
قلت ليهم اها وانتو مالكم..
والله نحن جينا عشان بتي دي تمت 33 سنة والبجيها كلو بعد نتفق العرس ما يتم ،،الا عندنا نسوان اهلنا ديل ما دايراتنا تعرس ،،،
قلنا بس خلاص معناها الشيخ دا كويس ولا زاعو النسوان ديل ما كتار كدا وطلعنا ،،
شادية اتبسطط للاخر وانا زاتي معاها قلنا مشاكلنا خلاص حا تتحل ونعرس قريب ،،
لينا ارح نجهز عروكاتنا ساي ما معروف قبل نتم الشهر احسن نتنضف يا بت ،،
اي اي خلينا نشتري لينا قمح قالو عروكتو مبالغة ،،
وهاك يا ونسة في الشارع علي اساس انو ح نعرس يعني ح نعرس قريب ....
يتبع🌷
فاطمة قسم الله✏
