قعدته منتظراه من سبعة ونص ل 11 ما جاني ،، بديت اتململ واقوم واقعد ،، والداخل والطالع كلو يعاين لي زي النقطة الشاذة ،، وانا فعلا كنت كدا ،، البنات البجو داخلات ماف اي وجه شبه بيني وبينهم ،، نضيفاااااات وناعمااااات غايتو ما شفت لي واحدة خدرا فيهم ، ، شي فريمات ،، والفاكة شعرا ،، والمطلعة خصل ،، وجك جك صوت الكعوب العالية دي الواحدة ولا عارضة ازياء ، والله حسيت اني الفراشة الجابوني انضف ليهم الشركة ،،
هي انتي ..
لفتتني الكلمة دي من دون احس عاينت اتجاه الصوت ،،
انا؟
اي انتي عايزة شنو واقفة هنا؟
بقيت بعاين ليه واتربشته ( في سري دا وضاح صاحب عزو الشفتو امس هسي يعني هو ما عرفني ولا برضو زي عزو عندو وشين )
خجلته علي منظري المبهدل ما اتوقعت انو مكان الشغل حا يكون بالطريقة دي ،
رديت ليه انا بت خالتو لي عزو وسكته،
عاين لي كدا وقال لي انتي.. قبل يتم كلمتو
وضااااح هااااي يا بيبي شنو وينك ..
جات واحدة كدا وساقتو من يدو..
تعال تعال مكتبك كنت بفتش ليك عندي مفاجاة بابي جا امس من تركيا وجبت ليك هديتك يلا اوريك ليها ،،
مشي معاها ولا حتي فكر يعاين يعتزر لي او يستئذن مني ،، انا دموعي بقت قراااااب كانت عايزة تنزل ،،
وتررررن ترررن صوت تلفوني دقه خلعني معاه نطيت ، ،
اااااخ شادية انا نسيتها نهائي والليلة مواعيدنا نمشي بيت الشيخ ،،
الووو ش
قبل اتم اسمها جاني صوتها بتكورك يا معفنة يا كريهة يا ما فيك فايدة تديني ماسورة وتمشي ولا هماك زاتو توريني ،،
ياخ ما تصبري اشرح ليك انا خالي وامي ما ادوني فرصة والله ،
هسي طالعة من بيتكم انا وامك كلمتني قالت لي الايام دي حا تقعديها عند خالك ، ، عايني شوفي ليك مواصلات والحقيني سريع باقي نص ساعة بس اتاخرنا نحن مواعيدنا 12 ،،
شادية معليش والله انتي هسي عارفة انا وين وفوق لي دا ما عندي ولا جنيه شايلاه ..
حسيتها زعلت مني وقت ما ردت ،،
شادية والله ما تزعلي مني بس انا في شركة خالي وزاتي لي اربعة ساعات منتظرة ودخالي وما عارفة اعمل شنو ،،
خير يا لينا مع السلامة نتلاقي ،،
ش...
قفلت التلفون قبل تسمعني ،،
الله ياخدك يا عزو وين مشيت انت ،،
يا انسة ..
جاني صوت رقيق كدا اتلفته بتاعت الرسيبشن قالت لي اتفضلي معاي ، ، طلعنا بالاسانسير للطابق الفوق ،، دخلنا بي كم ممر كدا وفتحت الباب قالت لي ادخلي وقفلت الباب ومشت ،، غرفة كانت صغيرة كدا فيها زي خمسة كراسي وشاشة ودولاب صغير وتربيزة في الوسط ، ، بعد شوية جات بت داخلة شايلة صندوق في يدها ،،
هاااي صباح الخير ..
صباح النور وكنت مندهشة يعني من البحصل لي دا ،،
قالت لي انا مس هناء منسق الازياء في الشركة اتفضلي البسي الهدوم دي ولو عايزة اي مساعدة انا ممكن اقعد معاك ،،
ا ل انا لالا شكرا ليك ،
قالت لي ربع ساعة كويسة معاك وبرجع ليك وطلعت ،،
حسيت انو كرامتي اتجرحت ودموعي نزلت يعني بالمعني عزو شكلي ما كان عاجبو نهائي انا متاكدة انو هو الطلب يلبسوني ،،
بعد عايزة اخلي الهدوم واطلع امشي اتزكرت امي ووضع ابوي الكعب واني محتاجة بقيت للشغل دا ودي فرصة ما بتتعوض ،، العني الشيطان يا لينا ماف داعي ،، لبست الهدوم وجاتني البت تاني ،، شايلة ليها حاجات ،، كوت لي شعري وطلعت لي كم خصلة وعملت لي مكياج ،، من جواي ممغوصة ومولعة نار بس متحملة لاني مجبورة ،،
طلعنا وجابتني مكتب دخلنا كان فاضي وفي باب تاني شكلو مكتب دق دق دقت الباب ،،
اتفضل ادخل ..
دخلنا ،، اتهجمته ونططه عيوني لقيتو وضاح ومعاه عزو ،،
عايزة اصرخ يا نهار اسود ما يقولو لي دا العايزني خالو ابقي سكرتيرتو ،،
يارب اطلع غلطانة يارب ما هو ،،
اتفضلي جاني صوتو جادي ،،
زي ما بعرفوني خالص
عزو طلب لينا تلاتة قهوة
يلا خلونا نبدا وفتحي لي عقلك دا كويس يا لينا ما عايز اي استهتار انتي فاهماني ،،
رديت ليه انا ما جابراك والله ولا ضربتك علي يدك عشان تعلمني ،،
بقي بعاين لي وكلمة واحدة ما قال غيرها نحن في شركة ما في شارع ..
(من جواي شايف روحك عشان سمح وعندك قروش بس معليش استحملي يا لينا الله كاتب ليك الهم يكون دا مديرك)
انتي فاهماني؟
فاهماك قلتها بي قطامة
من 12 شغالين فيني لي اربعة طلعو روحي بالشغل لما صدعته وجاتني حمي ووجع ضهر من القعاد ،،
طلعت مع عزو من سكات قال لي ح تنزلي الساعة سبعة كورس سكرتارية من الليلة يعني ماف ليك راحة مضغوطين نحن لازم نلحقكك بأي طريقة ،،
عارفة انو كان جايب حبيبتو تكون سكرتيرة ليه بس من حظك خالك ختاك انتي يعني اي غلط حا يديك هو الكشة ويقول ما جديرة بالشغل وهو فعلا اعترض علي حاجات كتيرة فيك فهمتيني ....
سكته ما رديت بس يادوب وقع لي انو الاعترض علي هدومي منو ....
جينا البيت مسافة اكلت وارتحت شوية وساقني عزو للمعهد مع اني كنت تعبانة بس دخلت في تحدي مع الود الشايف نفسو دا .....
يتبع🌷
فاطمة قسم الله✏
