الحاجة الوحيدة الكنت بحبها اكتر من عيوني الاعراس 😀 وما اي عرس ،، الاعراس البتكون حفلاتها رااابة ديك ،، وعندي غرام مع حاجة اسمها رقيص بالذات رقيص العروس برقص احسن منها 😀 ،، انا وصاحبتي شادية ما خلينا لينا عرس ما حضرناه ،،المصيبة ما هنا ،،المصيبة انو الاصغر مننا حضرنا حفلاتهم ،، وهسي الحمدلله عندهم شافعين شافعين ،،
كو كو كو رو
اتخلعته دا منو البضرب في الباب كدا تقول طالبنا غبينة ..
جيت زعلانة والليلة الله يحلك مني يا البتدق في الباب كدا..
كو كوكوكو كو
ياخ ما جايه اها فتحت الباب وعايزة اكورك شنو م...
شادية دي انتي ،،مالك بتضربي في الباب كدا مغالطنك فيه ..
توووش دخلت لا سلام لا كلام مادة طرومتها سبعة امتار ،،ارح البسي ليك توب تعالي معاي البيت ،،
ما جاية بيتنا دا بقرصوك فيه كل ما تجيني ارح بيتنا ..
اها خلاص بتقدري تشغلي المسجل ونولع لينا بخور ونقعد بي راحتنا ،، ولا اخوك العارض دا بجي ناطي لينا يكورك ،،
عاينت ليها كدا خلاص استني بي كعكاتي دي لبست لي توب وطلعته معاها ..
في الشارع بنتونس
مالك الليلة قالبة وش
ياخ زهجانة يا لينا عايزة اعرس والله
قاااااه بقيت بضحك لما دموعي جرو علي عايزة اعرس دي .. وااااي انا يا بطني احييي
والله بتكلم جادة يا لينا الكلام دا ما بنفع بنقعد كدا لما نسوس ونقطع اصلا بنكون قربنا ،،
خوفتني بي كلامها البت محبطة هي لكزتها اتكلمي عن نفسك براك انا لسه ،،
والله لسه تعالي نحسبها الدورة جاتنا من نحن في سنة سابعة يعني تقريبا 13 سنة ،، يلا احسبي هسي المفروض نكون اتخرجنا لو تمينا جامعتنا ،، عمرنا يعني واحد اتنين ....
خلاص اسكتي اسكتي عمار جايي علينا بتفضحينا ما ناقصين يعرف اعمارنا ،،،
وقفنا سلم علينا علي وين ماشين ...
ناس شادية
ومالكم اتقطعتو مننا الايام دي ...
اها ساي مشغولين بس وبعدين التانيات ما مقصرات ،،اها عرس اخوك حددوه بتين ،،
والله لسه لكن قريب ان شاء الله عقبالكم ..
قلناها انا وشادية بي تحت نخرتنا من كترت ما كرهنا الكلمة دي ..
شفتي يا شادية انا من اليوم داك مسكني هبوط قصي قصي يخطب غيري ،،
قالت لي قالو سمحة لكن وصيدلانية
سمحت شنو انا قالو لي شينة شنات العدو
بت ارحكي نشوفا يوم
قولي والله
النشوف العجبو فيها شنو من دون بنات الفريق ديل
امشي امشي قدامي ما تزكريني تجيبي لي مصران كمان ،،
دخلنا ناس شادية وبيتهم فاضي كالعادة امها طاشة وحبوبتها مرا عجوز علي طول نايمة ،، هي ابوها متوفي وياها بت واحدة زيي عندها قرابة معانا .. طالعين داخلين سوا ..
دخلنا اوضتها طلعنا المسجل ،، مسافة عملت القهوة ولعنا البخور للمزاج كييييف ،،وقفلنا الباب وهاك يا طلع طلع قعدنا بالقنيلات ساي ،،
بعد عدلنا مزاجنا بي فنجان قهوة واكلنا لينا لبانات كل واحدة ربطت ليها طرحة في نصها وهاك يا رقيص وصفقة وغنا
ﻳﺎ ﺍﻻﻭﻟﻴﺎ ﺍﻟﺼﻼﺡ ﺳﻮﻭ ﻟﻲ ﺣﺠﺎﺏ
ﺷﻮﻓﻮ ﻟﻲ ﻋﻼﺝ ﺑﺎﻟﻤﺤﺎﻳﺎ ﺷﺮﺍﺏ
ﻗﻠﺒﻲ ﻣﻦ ﺍﻟﺮﻳﺪ ﻻ ﻋﻘﻞ ﻻ ﺗﺎﺏ
ﺍﻟﺮﻳﺪﻩ ﻓﻲ ﺟﻮﺍﻱ ﻋﺰﺑﺘﻨﻲ ﻋﺰﺍﺏ
جيبو ليا الشيخ يقرا لي اوراد
ووووووب بي يدينا كمان
رقصنا رقيص لما نصنا دا وجعنا وقعنا هلكانين في السرير ..
عارفة يا لينا ارح نمشي لينا لي شيخ للعرس البنات ديل كلهن بقن كدا ..
جنيتي انتي يابت شيخ شنو البنمشي ليه ..
والله انتي مش عايزة واحد من اولاد جيرانكم وانا عايزة فايز بتعرفيه مش..
قمته اتعدلت ليها ورقدت علي بطني وطق طق بطق في اللبانة يعني ما لقيتي الا فايز المتزوج دا الجابرك شنو تعرسي راجل مرا ،،
انتي عارفاني بريدو من زمان وكنا في علاقة بس عارفة انها هند كتبتو دي بتاعت شيوخ عايزة تقنعيني انو عرسها بي مزاجو دي اكبر منو وهسي سمعت انهم بتعالجو عند دكتور واحتمال يزرعو ،، من تحت تحت سمعت انو امو ضاغطه عليه يعرس تاني ،،
وانتي ياالهبلة عايزاه برضو هو كان راجل ما كان خلاك عشانها ..
يا لينا الفات فات اربعة سنوات هسي ما ولد منها ..
انتي متواصلة معاه ..
ا ا انا
شادية انا عارفاك عبيطة رجعتي ليه مش واوعي تقولي لي رجع لي قلت ادبو ديك تخليه يهبشك ويعصرك ويبوسك ...
قامت سريع من جمبي خلينا نشغل اغنية تانية علي بالي نرقص اكتر ..
شادية قلتها ليها بي نهرة كدا ..
عايني يا لينا حياتي وانا حرة فيها فيها شنو يعني ما هو بحبني وانا بحبو كان ما لبيت ليه طلباتو بشوف غيري ،،
وما يشوف غيرك الحب قالو كدا دا واحد حيوان تفكيرو كلو تحت الحزام وبس ،، انت عايزة حياتك تبقي لي هنا وبس ،،
اي يا لينا انا عايزة كدا وبعدين هو صارحني قال انو بطلق هند هي مختونة فرعوني وانو ما قاعد يرتاح معاها ...
قولي والله هي بلاي هند مختونة فرعوني طيب طولت اللسان ليها شنو تاني ،،
بري ما عارفة شايفة نفسها تتجدع بي جسما العاجبا دا ..
خليها تاني التتجدع عشان اقطع ليها لسانها الطويل دا بي كلمة ،،،
هييي اوعي تساليها والله معروفة جنها شيوخ تعمل ليك بلوة ولا حاجة ابعدي منها بعيد مالك ومالا ،،
خلاص يعني انتي الحا تخلي ليك راجلا..
عشان كدا قلت ليك ارح معاي لي شيخ ..
كويس خليني اشوف ولا اقول ليك النمش يا زولة خسرانين شنو ..
زاااابط يا صاحبتي وطقينا يدينا في يدين بعض ،،
والله يستر ...
ارح ارح شغلي لينا انا عايز اعرس البت دي ،، خلينا ننجم شوية من العلينا ،، اها اها اها
تابعوني🌷
فاطمة قسم الله✏
