جينا بيتنا وجبنا الفندك والزند ودق دق دق شغالين ندق في القمح ،،ظبطنا لينا عروكة وكلمت امي ماشة مع شادية شلناها وجينا قعدنا نتجلبط ،، ومن شدة ما سرحنا جبنا ورقة وقلم نكتب في شنطة العرس ،،
كتبناها ستة ستة قلنا مافي داعي للتكاليف والبوبار ،،
وعملنا لينا جدول بتاع حبسة عروس ،، من صلاة الصبح نشرب موية علي الريق بشرتنا تصفي ،، وناكل هبهان لزوم ريحتنا تبقي سمحة ،، ما خلينا لينا بوست في النت ما شفناه شغالين نكتب ،،
الباب دق ،، شادية مشت تفتح تاني ما جات انتظرتها تلت ساعة ما جات اتحيرت البت دي مشت وين ،،
جيت طالعة بفتش فيها ما شفتها والباب قافل البت دي غطست وين ،،وقت مشيت بالزقاق بي هناك صدمني الشفتو ورجعت علي طول ،، دخلته جوه وبقيت ساكته وزعلانة مليانة فل ،، عدت قريب ساعة حتي هي جات ،، قمت طوالي انا ماشة بيتنا ،،
جرتني شنو مالك ماشة اقعدي اتغدي معاي ،، جريت يدي منها ومن دون انتبه لي روحي ضربتها كف ،، يا تافهة انا شفتك وانتي كنتي بتعملي في شنو والله الود دا بستغلك وعايز يلعب بيك ،،
سكتت ونزلت راسها وقعدت في السرير تبكي ،،
انتي يا لينا امكن ما بتحسي بالحوجة دي لي راجل ،، لانك ما شغالة بالموضوع كتير وما فارق معاك تعرسي ولا لا ،، لكن انا محتاجة يا لينا وتعبته نفسيا خلاص ،،
سكته منها وما رديت وطلعت علي طول ،، بقيت بفكر في كلاما بس حتي ولو لشنو انتي تسلمي نفسك لي ولد عشان ترضيه ،، انا مستحيل اعمل كدا ،،
دخلته بيتنا وبقيت بتزكر في المنظر الشفتو وهو ببوس فيها من دون احس شعر جسمي قام ولقيت نفسي قايم واصبعي بمرر فيه علي شفايفي ،، قمته من سريري وبقيت بقول استغفر الله العظيم دا شنو دا وقمته اشوف لي حاجة اعملا بدل التفكير البخلي الشيطان يوديني لحتات تانية ،،
بالعصر جاتنا بت خالي متزوجة قدري كدا في العمر ،، قدمت ليهم الضيافة وكانت قاشرة اخر قشرة والدخان دا في يديها شاااايل لما مندي ،، نضيفة نضاف كانت ،، والروج والكحل والريحة ،، حسستني اني ما بت نهائي لما غرت منها ومن سماحتها ،، عاينت لي رجولي تحت لميتهم علي وجريت القميص،،
بعد مشو،، امي طاعنتني بالكلام طبعا ما قدرت ارد ،، بس حسيت انو في شي ناقص فيني لي اول مرة ،،
جاني كلام شادية تاني امكن انتي ما عندك حوجة لي راجل لانك ما شغالة بالموضوع كتير ،،
انا شغالة بس ما عارفة الخلل وين ما مهتمة بي نفسي وكمان ماف زول عبرني ولا حصل راجل ساي شاغلني وحسسني اني محتاجة ليه ،، امكن عشان ما قريت جامعة ولا شفته البنات بعملو في شنو ما اتعلمت اهتم بي نفسي ،، ولا زي ما قالت المرا صحي ممكن يكون معمول لي عمل زي بتها اني ما اعرس اي راجل بشوفني شينة ووسخانة ،،
انا الخلاني ما اتم قرايتي شنو وخليت الجامعة ،،
جيت لي امي امي انتي ما تكلمي لي خالي دا يشغلني معاه مش هو رجل اعمال وعندو شركة ..
امي بقت تعاين لي مستغربة من الانقلاب الحصل فجاة دا ..
امييي بتعايني لي مالك بكرا ولا اقول ليك هسي نمشي لسه الوقت ما اتاخر الساعة 8 ..
لفحت لي عباية وشبشب البيت وطرحة ..
يابتي اكوي عبايتك دي طيب ..
يا امي ماشين وين اصلو ناس خالي يعني مازول غريب استعجلي يلا خلينا نمشي ،،
الصراحة خالي وضعو كويس شديد كان في دبي ورجع عمل ليه شركة بي راس المال العندو ونجحت معاه بقي من رجال الاعمال المعروفين ،،
اول ما وصلنا ما شاءالله عرباتهم مرصوصة بره تلاتة ،، دقينا الجرس فتحت لينا الحبشية دخلنا لاقاني ود خالي في وشي،،
الليلة شانتي كرو جاتنا للمشاكل وقعد يضحك ..
اسمي لينا ما عايزة معاك ثقالة يا عزو
سلم علينا وجراني من يدي تعالي والله عايز اعرفك علي اصحابي ،،
جريت يدي شنو انت اهبل ياود انا اختك ما اخوك ،،
قعد يضحك زيادة وكورك يا وضاح يا وضاح تعال والله هدي جات بالسيرة بس ،،
طبعا اتغظت منو وهو بحكي بي عند اصحابو وببشع بي لانو معتبرني محمد ولد زي ما بقول وفعلا نطيت فيه وجريتو من شعرو العاجبو دا خليتو يكورك لالا والله تاني ما بقول ليك كدا ..
انا اسمي منو وبجرو من شعرو وقابضاه من اضانو..
لينا
منو ما سامعة؟
لينا والله لينا
وان شاءالله اريتني ما رفعت عيني وقمت من فوق ليه والمنظر كان فظيع خير اللهم اجعلو خير اتمنيت الارض تبلعني ،، انا شفت لي شوكولاته بتتاكل ما ولد دا ،، وااااي في سري الله ياخدك يا عزو خليت منظري بشع بشع بشع وانا مشتحة في الارض وطالعة اضرب فيك...
قال ليه شفته شفته القلتو ليك عشان تقول لي مستحيل في بت تكون كدا وانو البنات ديل كلهم كيوت ،، هدي عندك نموزج ..
طبعا عيوني رقرقو بالدموع وزعلت والوجعني سماحة الود والهدوء ونضيف ولابس سمح حسيت اني بييييش ولا حاجة ،،
لا عرفت اسلم ولا اقول شي وهو واقف مخلوع فيني ،،
جريت طوالي دخلته والحمام كان جمب الباب جوه اتحشرت فيه واتفقعت بالبكي ما عارفة مالي ...
تابعوني🌷
فاطمة قسم الله✏
