طلعت من المكتب وكنت بتنفس بي ضلوعي زعلانة زعل ،، وقفت بره واتصلت بي شادية ،، الووو شادية حا اغشاك هسي ضروري نرجع ل بيت الشيخ دا تاني انا اموري جايطة ،، الوو شادية في شنو مالك بتبكي ،،
الحقيني يا لينا انا ما بقدر اجيب اولاد انا عقيم يا لينا ،، بقيت ما فاهمة اي شي وانا بسمع فيها وهي بتبكي بحرقة ،، شادية شادية ما تبكي خلاص كل مشكلة وليها حل انتي ما تستعجلي امكن الدكتور المشيتو ليه دا ما نافع ،، امشي لي غيرو انتي فاهماني ،،
الووو شادية ردي علي ،،
الخط قفل رجعت ليها تاني لقيت التلفون مغلق وترتني طبعا اللهم اجعلو خير ،،
في حاجة قالت لي انو في حد وراي اتلفته ،،
انتي من بتين هنا ،،
مالك خفتي كدا بس جيت اديك اغراض شكلك نسيتيهم في المكتب ،، مدت لي كيس ختتو لي في راس العربيه وعملت لي بي خشمها همم ومشت ،،
يارب ما تكون سمعت شي ،، لالا ما ظن ،، عاينت للكيس دا شنو دا معقول انا نسيتهم في درج المكتب لكن ما اظن تعرفهم البخليها تعرف حاجات زي دي شنو ،، ركبت عربيتي ماشة بي دربي للشيخ براي ،، وصلت البيت ودخلته الليلة البيت كان شبه فاضي كلها كم واحدة قلت خلاص ماف داعي اديها كل مرة المرا دي الشي الفلاني عشان ادخل الننتظر وراي شنو ،، بقيت قاعدة منتظرة فجأة اسمع ليك في جوطة وكركبة وكرب كرب ،،
قمت مهجومة وقفت علي حيلي لما المرا بتاعت الشيخ بدت تسكلب الليلة وووووب الشرطة ،،
نططه عيوني ،،
الشرطة ،،
جابونا القسم وانا كنت ببكي بس وما عارفة اعمل شنو ،، بقيت خايفة والناس دي اشكالا غريبة وعجيبة والفاظ وكلام ما ياهو ،،
شالو شنطة يدي وشووو كبو الفيها كل حاجة طارة في مكان فتشوها ،،
بقيت بحنس في الضابط يخليني اتصل بي راجلي ياالله اداني التلفون ،، بعد سمعني اصطوانة كلمات زي الزفت نبز وغيرو ،،
ببكي واتصلت بي وضاح الوو وضاح الحقني انا في القسم الفلاني مقبوض علي والله بالغلط والله بالغلط ساي ما عملت شي ،،
الضابط مسك التلفون جراه خلاص كفاية الدقيقة تمت وقفل التلفون ،، ساقوني مع التانيات ودخلونا السجن ،، وسخ وقرف ونسوان تخوف ،،
(انتظروني في #البيوت_اسرار ) {بتطرق في جذء للجانب دا حكاية سجن النسوان والبحصل فيه}..
ساعة ونادو اسمي جيت طالعة وبطني قالبة وراسي دايخ وانا حامل ،، لقيت وضاح قال لي قدامي انا من سكات ،، ما عرفت عمل شنو ولا كيف طلعني لانو ما نطق ولا حرف ،،
انتبهته ليه اننا ما ماشين لي شارع شقتنا ،، وضاح انت موديني وين ،، ما جاوبني ،،
عرفت انو جايبني البيت من قربنا نصل ،، نزل من العربية ونزلت معاه دخلنا ،،
لقينا امي وابوي قال لي انتي طالق يا لينا ،، بتكم طالق ،، ومشي ،،
حيلي ما شالني وقتها بس شفت ابوي لحقو ،، وامي دي مسكتني ياالله تكلتني جوه ودمعتها في عينا ،، عملتي شنو يا بتي مش كلمتك قلت ليك ما تخربي بيتك بي يدك وهدي اخرتها عمرتي علي نفسك شنو ،،
بقيت ساكته وبهز في نفسي ودمعتي في عيني ،، منو البلغ ،،في عربية كانت متابعاني انا من الاول شكيت بس قلت لالا دا وهم ساي مني ،، دي ريل معناها سمعت كلامي وهي كانت حافرة من وراي وانا الهبلة كنت مطمنة ،، هسي بيتي اتخرب خلاص ،، وقعدت اكورك يا يمه بيتي اتخرب خلاص بتك اطلقت ،،
ابوي جا داخل قمت جارية عليه ،، يابا اها قال برجعني قلت ليه شنو ؟
سكت وقال لي لي يابتي سوينا ليك شنو في الدنيا دي عشان تزليني معاك ،، الله يستر عليك ويهديك يارب ،،
انا ماشي الجامع وشال سبحتو وطلع ،،
قعدت حكيت لي امي القصة كلها ،، يا امي انا الشيطان لعب بي عقلي ما ربيتوني انتو كدا والله عارفة اني صغرتكم شديد ،، اعفي لي يا امي اعفي لي وبقيت ببكي ،،
قومي يا بتي ما تبكي وانتي حامل ما تتعبي ،، قومي نصلي ،، والله دا ما بنساك ،،
تاني يوم وضاح جا الصباح جاب لي هدومي وحاجاتي كلها ومن الباب ما دخل نهائي ولا سلم علينا ومشي طوالي،،
اسبوعين جات ماف اخبار جديدة ولا في موضوع ،، اتصلت بي عزو سلمت عليه وسالتو من ناس البيت ،، من جواي اتصلت اتطمن علي وضاح لانو وحشني شديد وحسيت بالغربة بدونو ،،
عزو انت كيفك
الحمدلله وانتي كيفك وخالتي وعمي ومحمد
كلهم كويسين بسالو منكم والله
عزو وضاح كيف كويس هو
سكت مسافة وقال لي امس كان عرسهم هو وريل ،،
ااااه يا قلبي زي النار الولعوها جووووه فيه ،، ما عرفت انطق ولا حرف تاني نزلت التلفون من اضاني وطق قفلتو واتفقعت بالبكي ،، وجع وجع في قلبي ما عادي ،، مخنووووقة كنت وهم الدنيا كلو بقي فيني ،، يا لطيف رحمتك يارب،،
تلاتة ايام صايمة من الاكل سرحانة وعيوني مورمة من البكي ،، امي دي بالشكل معاي عشان اكل واشرب ،،
يا لينا انتي حامل كدي الدي اول وارجعي للعناد دا تاني ،، ولا كانو بتتكلم معاي ،،
الله خلي لي شادية بتجيني يومي بتخفف عني والله مع انها مصيبتا اكبر من مصيبتي ،، صحي البشوف مصيبة غيرو بتهون عليه مصيبتو ،، قالت لي انو هند زرعت وهسي شمتانة فيها وعايزة فايز يطلقها ،، حسيت بي وجعها ما وجعنا واحد ،،
ما تخافي يا شادية ربك كريم وكدي شوفي دكتور تاني ما تقيفي علي الواحد المشيتو ليه دا ،،
مدخل ؛
الايام والشهور مشت سريع لكن كانت تقيييلة علي وكل يوم بمشي انا كنت بذيد تقل زيادة وبتعب من الحمل اكتر ،، اخبار وضاح انقطعت مني الا اسمع بيه سمع من عزو لما اسألو بس عرفت انو مبسوط وعايش حياتو ،،
دخلت في التاسع وكنت بدعي انو ربنا يهون لي ويقومني بالسلامة ،، احمد الحاجة الوحيدة السمحة في حياتي حا تكون ،، سميتو كدا الاسم دا عاجبني كان من زمان وكنت متمنية اعرس لي واحد اسمو احمد ،،
صحيت ليك نص الليل اكورك حسيت بي وجع الولادة
يا امي الحقيني ،، بقت تنوم معاي من دخلت في التاسع ،،
واااااي الموت بس اتمنيتو في اللحظة ديك ،، البشوف قلة ادبي وطولت لساني ما بصدق اني جرسة كدا ،،
محمد جري جري جيرانا بي عربيتهم جابوني المستشفي 😂😂 فضحتهم وانا الشارع كلو اسكلب وانبز في وضاح الليلة وووب عملتها فيني ما عافية ليك حقي ،،
امي دي شغالة تنهر فيني ساي ،،
دخلوني الغرفة وعلي حسب كلام الدكتور اني بلد طبيعي ،، زي ما قالو وجع الدنيا دي حسيتو الساعة ديك عايزة اموت كنت وانت يا الجنين ما عايز تطلع حيلي برد خلاص وما بقت فيني مروة كلو كلو. ،
حصل لي تعسر ولادة وبقيت سامعة طشاش طشاش جفط وما جفط وما فهمت شي ،،
الدكتور بقي بقري لي في المصحف وانا بردد معاه ،،
وفجاة حاجة كدا تندفع مني ومع اول صرخة والله نسيت كل الالم الدخلت فيه ....
يتبع🌷
فاطمة قسم الله✏
