وقفة صغنونة ؛
زي ما بقولو السحر بنقلب علي الساحر ،، وما بني علي باطل فهو باطل ،، لكن كمان باب التوبة مفتوحة ،، والله غفور رحيم،،
ﻭﺍلرسول صل ﺍﻟﻠﻪ ﻋﻠﻴﻪ ﻭﺳﻠﻢ قال ﻻ ﻳﺮﺩ ﺍﻟﻘﺪﺭ ﺇﻻ ﺑﺎﻟﺪﻋﺎﺀ..
نواصل
جيت ناس امي وما خليت ليهم شي ما جبتو ليهم تفاح ، عنب ، شمام ، بطيخ ، جداد ، سجوك ، لحمة وكلو ،، ما خلاص القروش جرت في يدي وضقت النعمة بقيت مبزرة لي ابعد حد ،، عادي بطلب من وضاح مليون بديني ،، دا غير فتح لي حساب في البنك وبقي مبحبحا علي ،، والدهب دا يا يمه ماشة واكشكش ،، قلت لي امي يا ماما ( طبعا ما بقيت راحات لازم اغير كلمة يمه وامي دي)
شنو يا بتي
عايني من بكرا انا بتفق ليكم علي زول يجي يعمل البيت كلو سراميك ،، ويصينو ويعمل ليه ديكور ويبلط الحوش ،، والعفش دا كلو تجدعيه حا اجيب واحد جديد غيرو ،،
اجي يابتي دا كلام شنو البتقولي فيه دا ،،
مالك يا ماما من حقي افرش البيت مش بيتي وبعدين كان جيت للولادة يعني دايرة نسابتي يعملوني مضحكة يشوفو بيتنا بالطريقة دي ،،
قالت لي ياهو بيتك الاتربيتي وقمتي فيه مالك ومال الناس ،،
ماما انا قلت ليك عايزة اقطع لسانهم الطويل دا ،،
قالت لي راجل واحد بنعمل بقروشو مافي ،، ابوك حي الدنيا هدا ولا يوم ما رضي ينتكل علي راجل ، بخدم بضراعو دي لي الليلة ،،
يا ماما دي قروشي العايزة اعمل بيها دي ومن حقي ونصيبي ،، وانا قلت كلامي من بكرا بتفق مع العمال يجو يبدو الشغل ،، يلا انا ماشة قبل وضاح يجي ،، مع السلامة ،، طلعت زهجانة ،، انا وقت عايزة ارفعكم من العيشة الفقر دي مالكم بترفضو في النعمة اوووف ..
دايرة اركب العربية
لينا لينا اشي اشي والله لقيتيها واللقي احبابو نسي اصحابو ،،
شادية هااااي وحشتيني وكنتي في بالي بس عارفة ما لقيت طريقة ،،
اموووح امووواح بوسة بي هنا وبوسة بي هناك اتسالمنا ،،
يا بت وقعتي وبقيتي راحات عاد لكن خليتيني في البشتنة واللهلهة ،، ريحتك المتريحة بيها مبالغة لكن ،،
ههههه البارفان دا جابو لي وضاح مخصوص من فرنسا ،،
يابت رهيييبة العباية دي ما تديني ليها شدة يوم اتنين اقشر بيهم عند نسابتي ،،
لالا الا دي ،، وضاح جابها لي مخصوص من تركيا هدية ومعاها حاجات تانية بقول ليك عليهم لكن ما هسي وضاح زمنو جاي لازم اصل قبلو متعود ياكل من يدي ،، وبعدها معزومين بره طبعا ما بقدر يطلع براه الا اكون معاه عارفة وكدا ،،
لكن ما لقيتك يا بت شنو الافترا دا ،، اتخترتي واتبطرتي ،،
قعدت اضحك ،، كان باريتيني ما كان قعدتي في الهم الفيه هسي دا ، برا فايز معاك ،
القسمة يا حبيبتي اعمل شنو
خلاص اشوفك يلا باي ،، ركبت العربية وجيت البيت ،
داخلة علي العمارة كدا ،، لقيت ليك اخوات وضاح ومعاهم ريل ووضاح برضو طالعين من الشقة تحت واخر ونسة وضحك ،، كأنو مافي حاجة ،، من شافني بي كل برود انتي جيتي والله فاتتك سماحة كنافة ،،
عاينت ليهم بي استغراب كدا وما كنت مطمنة للمة دي نهائي ،،
يلا باي بنات ،، باي يا بيبي ما تنسي موضوعي القلت ليك عليه ها حا ازعل لو نسيتو ،، وفوو جات ماشة جمبي طبعا لا اتسالمنا لا اتكلمنا مع بعض ،،
صريت وشي ودخلته جا لاحقني مالك قلبتي وش في شنو ؟
اها والله بكل بساطة كدا في شنو يعني ما عارف ،،
لا ما عارف وريني يا هانم،،
يا هانم يعني اول مرة تتكلم معاي بالاسلوب دا ..
عايزاني اتكلم كيف مثلا وانتي كل يوم جارية لي بيتكم وتصرفي زي ما عايزة وداخلة ونازلة ،،
صدمني الكلام القالو وضاح دا ما اتوقعتو منو ،،
انت قصدك شنو يا وضاح بكلامك دا؟
ما قصدي اي شي وقام طلع من الغرفة ،،
تمام ما مشكلة يا وضاح بعديها ليك ،، عايز تلعب بي وراي انت وريل مش ،، شكلك كدا حنيت ليها ،، بس بعرف اوريك الحنية دي كويس ،،،
نمته وتاني يوم لما صحيت لقيت وضاح طلع بدون يصحيني حتي ،، ولا تلفون ولا غيرو ما جاني منو ،، بتصل بيه تلفونو ما برد وبعملو فيني مشغول وما برجع لي ،،
الله في شنو الموضوع ما مطمن ،، اتلبست سريع وركبت عربيتي وجيت الشركة علي طول اشوف الحاصل ،،
جيت داخلة مكتبي فاضي ،، اتكيفت طبعا معقول وضاح لي هسي مخلي مكاني فاضي للدرجة دي بحبني ما هان عليه يشغل خد غيري ،،
بعد دايرة ارجع خلاص ،،
لالا احسن اعملا ليه مفاجاة وادخل اعتزر ليه انا امس كنت جافة معاه وزعلتو شديد مني ،،
وداخلة مبتسمة ومبسوووطة اراضيه ،، كرب فتحت الباب بقيت مجمدة في مكاني واقفة بعاين ،،
وضاح
لينا الجابك شنو هسي
عشان اشوف المسخرة الحاصلة من وراي دي الله جابني ،،
بتخوني عينك عينك يا وضاح كمان ومع منو مع اكتر واحدة بتكرهني وعايزة تفرقنا ،،
اقيفي اقيفي يا عسولة افتكر انتي عارفة منو البدا يفرق اول ،، ومن الاساس وضاح كان لي ولا شنو يا بيبي ،،
بقي ساكت ساي ولا اتكلم كلمة ،،
يلا تكلمها انت ولا اديها المفاجاة دي انا ،،
قلت ليهم مفاجاة شنو؟
هزت لي راسها وقالت لي معليش يا بيبي حا تتصدمي جامد ،، مبروووك جاياك ضرة حلوة زيي كدا ،، وشالت شنطتها وطلعت ،، اها وحابة اقول ليك شي تاني انا استوليت علي مكانك او بالاصح هو مكاني اولا سكرتيرة حبيبي وزوجي البستحقني انا ما حشرة زيك صحي المثل البقول الما بتشوفو في بيت ابوك بخلعك ...
يلا جاو ،،
بيبي انا منتظراك اليوم تتمم الخطوبة ومستعجلة علي العرس اوك ...
بقيت ما عارفة الطم ولا اصرخ ولا اعمل شنو ،، وشايفة وضاح ساكت ولا كلمة قالا،، عاينت ليه ،، انت ساكت لي الكلام القالتو دا صاح،،
لينا الشرع حلل للراجل اربعة مفروض تستوعبي الكلام دا وانا عندي هسي شغل نتكلم بعد ارجع ،،
قعدت اكورك نتكلم في شنو انت جنيت عايز تعرس فيني ،، شرع شنو انا ما بعرف حاجة زي دي ،، عايز تعرس فيني قبل اتم خمسة شهور يعني انا لسه عروس داير تشمت فيني الناس يقولو راجلا عرس فيها مالو ،، وبقيت جايطة ،، مصدومة ومخلوعة ما مصدقة البحصل ،،
بدي يتفعل وقال لي لينا لا اله الا الله احسن ترجعي البيت ولا ما بحصل ليك كويس ،،
اكتر من كدا بحصل شنو يا وضاح؟
ما عاجبك يا بت الناس زي ما دخلنا بالمعروف نطلع بالمعروف ..
الجملة دي شلتني كلو كلو وخلتني اطلع من سكات وراسي دايش من الحصل هسي...
جيت طالعة ،،
جاني كلامها زي السم
البلعب بالنار بتحرقو ..
وهووووف نفخت علي القلم الشايلاه وقعدت تضحك ...
يتبع🌷
فاطمة قسم الله✏
