بعد الحصل لي مع صدام وريل ،، رجعت البيت مهمومة ومتضايقة وحتي فكرت اسيب الشغل ،، بس تلفون شادية الجاني خلاني افكر اواصل فيه ،،
الووو بفرحة كدا شادية كيفك..
باركي لي يا لينا باركي لي ايووووي
ههههههه يابت انتي جنيتي بتزغرتي براك مالك وفرحانة كدا فرحيني معاك ..
فايز خلاص حا يتقدم لي حا اعرس يا لينا انا بقيت عروس وايوووي تزغرت..
وااااي انا ما تقولي لي مفعول الشيخ جاب نتيجة ..
ااااااي شفتي كيف ما خسارة القروش الدفعتها يا بتي انا لبستو خاتم بعد دا لحظة ما بقدر يغيب عني وقعدت تضحك..
اقيفي اقيفي انا لي منك اسبوعين وحاجة ما عارفة التفاصيل شنو ما انتي شاكلتيني ،،
والله والله شوفي البدا منو اول واتنكر ،،
اها خلاص خلاص خلينا من المناقرة ووريني عملتي شنو يوم ما جيت معاك ..
اي اي وكانت مبسوووطة وهي بتحكي لي ،، يا زولة انا مشيت ليك جيت طوالي بيت الشيخ وزي ما المرا وعدتني دخلتني طوالي بس بعد جمركت مني 50 تاني ،،
قلت ليها اجيي المرا الطماعة دي استحلت النقاطة كل مرة ،،
اي لكن مجبورة شفتي كمية الخلق دي كيف والله شهر ما ادخل معاهم ..
اها اي واصلي لي للشمار وقعدت ليك في نص السرير كراع تحت كراع تقول ممتحنة رياضيات ،،،
دخلتني وحكيت لي الشيخ الموضوع كلو من وقت كان خاطبني واتفركشت داك وعرس واحدة تانية ،، بس قال لي الزول دا معمول ليه عمل وانتي عارفة طلعت منو العاملاه ليه؟
اها منو؟
يابت هند العرستو دي يا بت دي ملوثاه ومنتهية منو كانت بس ما علي انا ..
قلت ليها الليلة وووووب سجم خشمنا عاملة شنو الكريهة دي ،،،
قالت لي اسكتي بس دي مخلياه كان لا يسمع لا يشوف غيرا ،، قال لي ساقياه ومأكلاه الشغلانية دي جوه بطنو ،،
شووووفي البت عليك الله،،
اي اي قام اداني ورق كدا زي بخرات ومعاه بخور ،، وقزازة كدا فيها موية لونا بني بني كدا ،، قال لي لازم الموية دي يشربا ،، والبخور والبخرات دي يشم ريحتها لمدة اسبوع ورا بعض العلاج فيهم هم ،،
بس قطع قلبي شال مني قروش كتيرة خلاص لكن جات بي نتيجة ،، وانا عروس عروس بقيت يا لينا ،،
هههههههه ضخكته علي جنها وقلت ليها اها واصلي لي وعملتي شنو تاني ؟
بس قالت لي ما بتغلبني دي ،، اتصلت بيه يجي البيت زي الضهر كدا انتي عارفة الفريق بكون صااااني ،، شربتو ليك عصير وكبيت ليك فيه الموية البنية ،، قدر ما يقول لي عصيركم دا مالو فيه طعم ،، بقول ليه عصير مستورد ما سوداني ،، طبعا ضحكتني ضحك في دي ،،
اها يا الشقية والبخرات ،،
اقيفي اتم ليك عملت ليه القهوة وولعت ليك البخور ورميت البخرة قلت ليه عشان احصنك من عيون الناس دا كمون بي اية الكرسي ،، لما زولك اتكيف زاتو وقعدت تضحك ...
وااااي يا شادية قلبك قوي لكن ما بسألك بس عافية منك كيتن لي هند التموت مغصة لكن اعملي حسابك منها برضو ما بتخليك ما هينة دي ،،،
ياختي يمين كان ما جننتها ما ابقي شادية اصبري لي ليها بس هند شنو كمان ،، بعد دا تاني بأدبها ليك ..
اجش اجش بقي يتخاف منك يا شادية خوفتيني اوعي تأدبيني انا زاتي معاها ،،
قعدت تضحك ..
اخدتنا الونسة كتييير ،، ما خلينا لينا شمار ما قلناه ،، ودعتها وقفلت التلفون ،، والله حنيت لي عيشتي ديك بدل هنا ما مرتاحة اي شي مشقلب ،، بس اتزكرت الشركة والناس هنا كيف والعالم ،، انا صاح الموضوع بدا يجزبني ويعجبني لكن صعب بالنسبة لي اي شي غريب غريب ،،
جاني صوت ريل كلها يومين ووضاح يكون زوجي ،،
حسيت بي خنقة كدا وطق ضربت روحي ،،
لينا هيي اصحي وضاح شنو الممكن يعاين ليك انتي ،، دا حتي ما بطيقك ومعتبرك بت شارع ساي ،،
جاتني فكرة بس لالا مستحيل لالا ...
تابعوني🌷
فاطمة قسم الله✏
