جينا البيت ،، وامي واخوي بقو يتزكرو لي في جرستي ،، لكن الله سترني كان الجنين ممكن يحصل ليه شي ،، الدكتور قال لي الله شافك وانتي ما مفروض تلدي طبيعي نهائي ،، دي براها سلامة لي ولي ولدي ،،
نسوان الفريق اتكسرو فينا داخلين طالعين ،، واي واحدة داخلة بي نشات دخن يا حلبة ،، اشربي اشربي عشان تدري اللبن ،، حسسوني اني بقرة بس ،،
سمعت ليك الصوت من بره جابو لينا بيبي
ما مصدق شانتي كرو بقت ام ،،
عرفتو عزو المجنون ،،
قلت ليه كان عجبك وبشبهني كمان ،،
قال الا يشيلو 😂😂 ابيت ليه خفته منو يوقعو لي ،، صورو ما خلي صورة واتصور معاه ،، قال لي بقيتي حلوة كدا مالك بعد الولادة ،،
خجلني القليل ادب قلت ليه ياود اتلم ابوي وامي قاعدين ،،
قال لي بالمناسبة انا عارف ،،
قلت ليه بي خلعة كدا شنوو عارف شنو ياود؟
قال لي لقيت دفترك ومعليش انا قريتو بدون ازنك كنت عايز اتسدي حقي فيك وامسك عليك زلة ،،
عرفت انو قرا كلامي يوم اتصدمت وعرف انهم ديل ما اهلي ،،
بديت ادمع وعاينت ليه بترجي فيه انو ما يحكي لي زول ،،
لقيتو غمز لي بي عينو وقال لي سرك في بير ،،برضو بقيتي مزة ياخ لو عارف انو العرس بسمحك كدا كان عرستك ،،
قعدت اضحك وضربتو علي كتفو ،،
قعدو معانا مساااافة عزو ضحكني فيها وفرفش بي ،،
طلعو وديل مشو يقدموهم ،، تلفوني ضرب عاينت لقيت
وضاح يتصل بك ...
فرحته بس من جواي ما كان نضيف ليه ما رديت عليه ،،
رسل لي رسالة كاتب فيها عزو كلمني شايف خاتي خلفيتو في الوتساب صورتو سمعيني صوتك وصوتو ،، انا اشتقت ليكم ،،
الله يقطعك يا عزو بتين لحقت تودي الشمار وتنشر صورة ولدي ،،
تاني اتصل كسر قلبي بالرسالة دي الله يعلم بحبو ما بي يدي ،،
اتكلمت معاه شوية بارك لي فيها وقال انو بجي بكرا ان شاءالله ،، وعايز يحكي معاي في موضوع ،،
فرحت طبعا وقت امي جات داخلة حكيت ليها ومبسوطة شكلو وضاح حا يرجعني يا امي ،، ابوي سكت وما رد قال لي كلام وطلع طوالي ،،
يابتي الراجل الما بعرف يحترمك ويقدرك ويعتني بيك وانتي حامل ويحتوي المشكلة ويحترم شيبة امك وابوك دا ما منو رجا وبكرا بجدعك تاني وبفوت ،،
من قمته ما حصل ابوي اتكلم معاي بالطريقة دي اول مرة احسو انو معترض علي حاجة ،،
امي قالت لي ابوك زعلان من راجلك ساي من اليوم داك وكلامو ما كان كويس معاه ،،
شنو لي الحصل شنو وضاح قال لي ابوي شنو يا يمه وانا ما عارفة ،،
قامت قالت لي انو قال لي ابوك كتر خيري اني لميتكم انتو وبتكم الجيعانة دي ،، اخر جزاي القاها بتاعت شيوخ وضر من بيت شيخ لي بيت شيخ ،،
معليش يا امي كلو مني انا وانا غلطته من البداية ،، ربنا يهون ،،
تاني يوم عزو جانا من الصباح طيران وقال انو عايز يشوف البيبي بقي بهبش فيه زي الحاجة الما ياها ،، عزو طلع حنيين والله ما زي كنت مفتكرة ،،
مدخل تاني؛
وضاح فاتحني في موضوع الرجعة لكن انا رفضته ارجع ليه ،،عصرت علي قلبي وعلي حبي مع اني بريدو من جوه ،، بس كسرة الوالد حارة والزول اللماني ورباني زي بتو ما بخلي عينو يكسرا ليه راجل قرش ،،
الوجعني اكتر انو وضاح ظهر علي حقيقتو وقت قلت ليه ما برجع ليك خوفني انو يا ارجع ولا بشيل الولد ،،
ما لقيت زول يقيف جمبي غير عزو حكيت ليه همي والحاسة بيه كان بطمني كل يوم اكتر ،،
مدخل تالت؛
الحمدلله احمد تم ستة شهور وبدي يقعد حلات الدنيا عليه ،، حصلت حاجات كتيرة في الفترة دي ،، اهمها اني اكتشفت انو عزو بحبني من زمان بس كان ساكت وما قال لي ،، حكي لي انو كان بتعزب كل يوم لما يشوفني بحاول اتقرب لي وضاح وجارية وراه ،، وانو مات مية مرة لما عرستو ،، ما كان بقدر يتخيل ساي اني معاه ،،
الاهم من دا ان عزو اتقدم لي وابوي كان فرحان اكتر مني ،، صاح حصلت مشكلة وعزو خسر اعز صاحب ليه بسببي ،،
ما قدرت ارفض واليوم زواجي من عزو تم 😊
انت يا عزو اسمك منو صحي؟
شنو شنو شنو ما عارفة اسم راجلك منو ؟
😂😂😂 والله ما عارفة من قمنا بقولو ليك عزو الواطا دي كلها عزو عزو ،،
يا حليلي انا الرماني الرمية دي شنو ،، يا سجم الرماد اسمي عزالدين دي دايرة ليها تفكير دي ،،
لويت ليه خشمي كدا هسي ابوك دا ما لقي ليك اسم غير دا احسن اسم عزو احلا ،،
خلاص عاجبني اسمك انتي بحسسني زي الكابين فيه موية ،،
قعدت اضحك يا ثقيل اسمي احلا منك ،،
من جواي صاح ما كنت بحبك بس مع الايام بتعود عليك ومتاكدة اني حا انسي كل شي معاك ،، بقيت بعاين ليه وهو بلعب في احمد ،، ما اتوقعت اني اتزوجو في يوم كنت بشوفو زي اخوي محمد ،، ايوة ما قادرة اتقبلو بس قسمتي كدا والحمدلله عليها ،، احسن من كدا دايرة شنو ،،
هيي سرحتي ويين في سماحتي دي ولا شنو؟
ههههههههه والله منو الغشاك؟
بنات كتاااااار
حرقتني الكلمة دي ورجعت لينا لي قديما وقت نطيت عليه ،،
لينا لينا روقي ساي يا مرا انتي بقيتي متزوجة والله تدخلي النار وانا راجلك زعلان منك ،،
طبعا اتفقعت بالضحك ساعتها وقلت ليه والله انت طفل اكتر من احمد .
ما عارفة انو الراجل طفل اصلا يا احلا حبيبة في الدنيا...
#النهاية
من الكاتب :
لوموني شوية شوية ،، اختصرت احداث بسبب مرضي ودعواتكم لي ،، كان مفروص اتمها من قبل بس ما قدرت وانا ملتزمة معاكم بس ليكم العتبي حتي ترضو،،
قسمتنا ما معروفة وين ،، وفعلا ما بني علي باطل فهو باطل والبتعملو كعب في دنيتك بلاقيك بلاقيك والله ببتليك في حياتك دي ،، لكن بعد دا ربنا رحمتو وسعت كل شي والبمشي في الطريق الصاح اكيد ربنا بفتحها وبفرجها عليه وبسعدو ،،
عايزة اقول اننا نرضي بالقسمو لينا ربنا والخير في ما اختاره الله.
بتمني تكون عجبتكم يارب 🌷
واعزروني
مع كل الود
فاطمة قسم الله✏
