خلصت تسعة مساء عزو جاني ،، قال لي تتعشي معاي ،، من جواي كنت جيعاااانة بس في نفس الوقت كنت شاماه للنهاية ،،
هيي انتي ما سمعتيني قلت ليك تطلعي تتعشي معاي ،،
قلت ليه بتعشي لكن صاحبك الثقيل دا ما يكون معانا ،،
حسيتو اتضايق وقال لي اوك
جابني مكان راااقي كدا ،، شكلو متعود يجيه لانو علي طول جابو ليه ورقة(قصدها المنيو) اداني ليها قال لي اختاري ،،
قلت ليه اختار شنو؟
عايزة تاكلي شنو؟
عاينت في الورقة ما فهمت شي كل الكلام مكتوب بالانجليزي واسماء غريبة اول مرة اسمع بيها ( من جواي انا اعمل شنو في البيت حدي كسرة وملاح ولو بالغنا جداد بنعملو برانا )
دفرتها ليه البتطلبو انا باكل معاك فيه ..
جراها وطلب كم اسم كدا ما قعدنا كتير جابوهم ،، مديت يدي اكل ..
قال لي قدامك شوكة وسكين ..
اتحرجته بي كلامو دا من جواي ما حبيتو ،،
مع اني تعبته وانا باكل بيهم بس مشيت حالي ،،
جينا البيت وكنا ساكتين في الطريق ،، عارفة انو متضايق مني صحي الجاب لي جاب شنو ،، هو ود راحات ومتعلم وانيق وراقي ،، وانا زولة عادية ابوي قومني في بيت بسيط بس قنوعة بالفيه كنت ،،
دخلته ويالله غيرت ووقعت نمته علي طول لاني كنت هلكاااانة من الشغل ،،
صحيت الصباح بدري مسافة عدلت مكوة هدوم امس ولبست سريع الحق عزو ما يجوط فيني ،،
جيت طالعة عزو عزو انا جاهزة
عاين لي كدا لالا انتي الليلة ما حا تمشي
؟؟؟ ختيت كم علامة استفهام شنو؟
انا كلمت نينا تاخدك تشتري ليك هدوم ما بنفع تجي بي لبسة واحدة كل يوم وبرضو اتزكرت حا تشتري ليك عطور وكريمات فا ياريت ما تعترضي علي حاجة يلا باي..
ما اداني فرصة زاتي اتكلم معاه لانو طلع طوالي ..
قلت ليه مغرور
اووووف
ياالله اتزكرت شادية عملت شنو امس مشت ولا لا ،، شلت تلفوني واتصلت بيها ،، بس ما بترد امكن لسه نايمة الوقت بدري ،،
11 جات طلعنا انا ونينا مشينا كم مول اشترت لي حاجات كتيييرة وكل ما اعترض علي اللبس او اجوط في حاجة بتقرصني وتقول لي فضحتيني الله يفضحك اسكتي بطلي تخلف وخليك راقية ..
لما زهجت من راقية خليك راقية كل شوية ..
رجعنا الساعة اتنين رجولي حارقاتني من كترت اللف ،،
اكلنا وقبل ارقد جاتني الدبة دي ..
قومي قومي يلا جربي خليني اشوفك عاملة كيف حا تكوني ..
شنووو لا والله شايفاني عارضة ازياء يابت غوري من قدامي ..
ما عملتي البقول ليك عليه بكلم عزو
كلميه حا يعمل لي شنو يعني ؟
حا يكلم وضاح ،،
لما جابت سيرتو قلبي عمل شححح
خلاص خلاص
عدينا ساعة وانا البس واغير وامشي قدام وارجع ورا واتلفت يمين وشمال ،،
اخيرا خلتني وقدرت البس بجامة وارقد،، ياربي لي شادية ما رجعت لي انا من قبيل متصلة بيها ،، تاني رنيت عليها في جرس لما قطع وما ردت علي ،، اتصلت تلاتة مرات ماف رد ،
اتصلت بي امي وسلمت عليها وسالتها من ابوي ،، واذا شادية قشتها ولا لا ،، قالت لي ما شافتها ،،
ما مشكلة بتكون زعلانة مني ، بعد عزو يجي بخليه يسوقني البيت وبمشي ليها اشوفها ،،
بقيت منتظرة العصر لما جا ،، بحنس فيه نص ساعة حتي الثقيل رضي يسوقني ،،لبست عباية وجيت بيتنا ،، سلمت عليهم سريع وجري طلعت يا امي ماشة ل شادية ما بتاخر..
عزو كورك لي خمسة دقايق انا ما فاضي ليك ،
اصلك ثقيل بس الصبر
جيت بيتهم الباب فاتح دخلت طوالي لقيتهم قاعدين يشربو في الشاي ،، سلاما كان باااارد معاي ،، وطوالي قامت دخلت ،،
لحقتها وقلت ليها شادية انتي مالك بين يوم وليلة قلبتي علي ،،
انا القلبته ولا انتي خلاص شفتي نفسك وبقيتي بت راحات ،،
شنو انا امس اعتزرت ليك ووريتك الحصل معاي هسي في داعي للكلام الكعب دا ،،
عايزة مني شنو هسي جاياني اصلو نحن ما قدر المقام نجيب ليك موية صافية مقفولة ،،
شادية انا ما عايزة هبل وعوارة عارفاني ما بحب الحركات دي ، عارفاك زعلانة من الحصل امس وجيت اراضيك ،،
قالت لي كتر خيرك عرفت اتصرف براي وهانت ...
خير يا شادية انا ماشة مع السلامة..
ولا قدمتني طلعت زعلانة منها ما اتوقعت كلامها يكون معاي كدا او تتغير علي ،، بتكون هسي زعلانة عارفاها يومين وبنتصالح زي كل مرة ...
الايام مشت سريع عدت اسبوعين بديت اعرف الشغل كويس مع انو كان متعب شديد ،، ولا وضاح كان بقصد يهلكني ويجيب حبيبتو كل شوية ناطة ليه في المكتب لا وبتجي داخلة تووووش بتعاين ليه وبتدخل زي شايفاني بواب في عمارة ياها شبهو شايفة نفسها ،،
مرة فاضت بي خلاص ،، جات عايزة تدخل طقيت ليها يدي ،، لو سمحتي ممنوع تدخلي ليه عندك موعد ولا حاجة ؟
عاينت لي كدا من فوق لي تحت وقالت لي بي مياصة ودلع وتكبر رافعة نخرتها فوق انا ما محتاجة لي موعد مع واحد يومين ويكون راجلي ،،
وجعني كلامها شديد ..
لو سمحتي يا انسة عندهم اجتماع وانتي ما مسجلة موعد معاه اتفضلي مكتبك ،،
بعدها رفعت صوتها انتي ما عارفة انا بت منو تتكلمي معاي بالاسلوب دا وانتي سكرتيرة ..
ان شاءالله بت الرئيس زاتو انا ما خايفة منك وطولت ليك بالي اطلعي بره من مكتبي وتاني الدخول بي موعد كلامي واضح ليك ..
ما اشتغلت بي ومشت عايزة تفتح الباب تدخل ..
لحقتها ليك طوالي وجريتها ودفرتها ،،
انتي يا البت اتسببي وجرررر فكت الصرخة ووقعت في الارض ومسكت يدها وقعدت تبكي ،،
الباب كرب اتفتح في شنو ريل مالك الحاصل شنو وجري عليها قومها ...
ا ا انا دي السكرتيرة ضربتني وبقت تبكي وتتوجع ..
هيي انتي كضابة ا...
كورك فيني انتي حيوانة وكمان تردي شوفي هنا ما تفتكري حا اعدي ليك العملتيه دا بسهولة ،، امشي جيبي تلج بسرعة وجيبي عصير ويكون بارد ...
شفته الشماته في عيونا لما عاينت لي ...
جبت الحاجات وجيت داخلة طوالي فتحت الباب ..
قبل ادخل كويس طق طق لي بي يدو واشر لي بي اصبعو جهة الباب .....
تابعوني🌷
فاطمة قسم الله✏
