الشغل بقيت ما طايقاه في الشركة مع وضاح وريل ،، واستفزازهم ووشوشتهم بي تحت تحت فيني ،، خاصة بعد تمت خطوبتهم وبقت تجي داخلة توووش المكتب وانا ما بقدر اسألا نهائي ،،
بس خلاص الموضوع فاض بي والليلة كانت الحنة بتاعت شادية انا الشيخ المشت ليه دا حا امشي ليه ،،
من الشركة جيت بيتنا طوالي اجهز معاها ،،
لقيتا ليك تضحك للضروس ،،
قرصتها يا قليلة الادب بقيتي عروس بعد كدا حا تتلمي ،،
احييي انا يا لينا لكن ما حفيت عديل عشان اعرسو ،،
قعدنا نضحك ،،
رتبنا ونظمنا البيت وفرشنا الحوش بره،، وماشاءالله طلعت خطوبة حلوووة مع انها كانت بسيطة ،، مشغلين مسجل ساي لا حفلة لا فنان جاب ليها بس دبلة مع شوية هدوم ،، اتزكرت حفلة خطوبة وضاح والبزخ والبوبار الفيها ،، الفستان الكانت لابساه ريل براهو بعرس لينا عرس كامل ،،،
دا غير الكوكتيلات والتجهيزات والاضاءة والارض المفروشة ورود ،، غنو تلاتة فنانين ،، وهي بدلت فستانها تلاتة مرات ،،، وكمية الهدايا والدهب وحاجات تانية مغلفة كتيييرة كدا ،، والزينة ،، انا كنت مندهشة فيها من بدت الخطوبة لما انتهت ما مصدقة انو في ناس بعملو حاجات زي دي ،،
اها بعد حفلة خطوبة شادية انتهت والناس مشت دخلت معاها الغرفة جوه وكانت بتغني المحروووق يروووق وتضحك شكلها جنت ما مصدقة حا تعرس،، قعدنا نتونس جبت ليها سيرة وضاح وانو الصراحة عاجبني بس هو خطب ليه بت وكمان من اسرة مرطبة ومنبرش ليها انبراش يعني بالواضح ما عندو شي لي ومستحيل يعاين لي ،،
طقت لي يدها وقالت لي بس خلاص ولا يهمك شيخ فلان جاك زول تاني ورانا شنو يا بتي كلو ولا زعل صاحبتي،
والله يا شادية مع انو هو بعاملني كعب وما بحترمني بس ما عارفة في شي جواي ليه في حاجة بتجزبني ليه غصبا عني بس هو ما معبرني زاتو ،، انا قدر ما احاول اقرب ليه هو بصدني زي كأني حشرة ،، عشان ما من مستواه مش يا شادية ودموعي جرت ...
لينا ياخ ما تبكي والله ببكي معاك هسي انا كمان ..
عارفة انتي احسن منهم برضو لانهم جاريين ورا المظاهر هسي تلقاهم في بيوتهم جنهم مشاكل ،، وهي ريل دي زاتها تلقي معقدة وعندها نفسيات ،، المظاهر خداعة ما تتغشي بالهشك بشك دي ،، لبس وعربات ...
قلت ليها غايتو الله يرزقنا ويدينا ههههههه قعدت اضحك اول شي انا حا اعملو حا اشتري عربية وبيت وافرشو علي احسن مستوي واجيبك تسكني معاي ،،
اجييي وفايز اوديه وين ،،
عوجته ليها خشمي خلي يقعد عند مرتو الاولي مالك بيه نعيش حياتنا كل يوم نسافر لي بلد نتفسح ،، احييي يا شادية نفسي اعيش العيشة دي وابقي مرطبة كدا وخدامات شغالات لي ،، ولبس ودهب وفسح ،، الله لينا نحن ..
ما معروف امكن بكرا احلامنا تتحقق ونعيش الحياة دي ،،
تلفوني ضرب لقيتو عزو قال لي ارح منتظرك في البيت ،،
قبل اطلع شادية قالت لي يا بت انتي ها حا ترجعي بتين استحليتي القعده عند ناس خالك ولا شنو؟
انا عايزة ارجع بس شوية كدا بقعد معاهم ،، بعد طلعته ماشة وافكر من جواي ما عايزة اجي الحتة الربش دي فعلا بقيت شايفاها كدا ،، هناك اكل سمح وبي راحتي اطلع وادخل وبقيت شغالة وناس نضاف وبرستيج ،، ارجع هنا لشنو انا تاني ما راجعة للبيت البعمل نفسيات دا باعوض وسخانة وخدمة ونضافة وعدم موضوع..
ودعت ناس امي ورجعت بيت خالي ،،
دخلت الغرفة لقيت نينا بتتكلم في التلفون شكلو حبيبا ،، شوية وانتهت منو قالت لي كان شفتي يا لينا وااااي انا النحكي ليك ،،
في شنو مالك ؟
الكنت بتكلم معاه دا البوي فرند بتاعي..
شنو؟
البوي فرند ياخ
شنو البوي فرند دي؟
صاحبي يوووخ يا لينا ...
طيب من اول قولي لي صاحبي وخلاص..
عايني انتي لازمك كورس انجليزي من بكرا بسجل ليك في واحد ..
اها اها خليني من دا واصلي مالو بموووت في الشمارات انا النسي قديمو تاه ...
قالت لي اخوه متزوج ،، وعندو ولد من مرتو ،، يلا بت اهلهم كانت عايزاه وهو عرس غيرها ،، يلا بقو بالليل كل ما يجو ينومو في السرير مع بعض النار بتولع ليهم فيه...
وااااي شنو انتي جادة اتخلعته طبعا ...
اي اي يابت قال ليك يوم في الشغل معاهم جاتهم مرا بتشوف بالسبحة قامت عاينت ليه وجرت السبحة قالت ليه فلانة بت فلانة المن اهلكم ديك وتك تك تك وصفتها ليه ،، عاملة ليك عمل في الحتة الفلانية ،، انك لا تقرب علي مرتك لا تقدر تعاشرها ،، وفعلا قال اخوه مشاكلو بقت كتيرة مع مرتو وطاشي من البيت طوالي واها اخرها النار البقت تقوم ليهم دي ،،،
الليلة وووب اها وعملو شنو؟
قال لي مشو لي شيخ بفك العمل وكدا وزي ما وصفت ليهم المرا وصف ليهم نفس المكان ،، عارفة خاتة ليهم قدام عتبت الباب حافرة ليه ،، لقوه جوه ،، هسي قال اخوه يادوب بقي كويس وشغال في العلاج الكتبو ليه ،،،
اوووب علي انا لكن جنس شي مبالغة ..
لما خفته انا يا لينا في ناس زي ديل ..
طبعا سكته من جواي هو انتي شفتي حاجة واكعب من ديل ..
قمته اشرب موية لقيت ليك البيت مضللم ،، بتين هسي طفو الانوار يادوب 12 ،، اشوف كيف هسي انا وماشة ،، اسمع ليك صوت همهمات وضحكات جك فتحت ليك اللمبة وبقيت واقفة صنم في محلي عزو والبت الشغالة مع بعض ،،،
من شافتني طوالي مشت ،، وهو عاين لي كدا وحكه شعرو ودخل يدو في بنطلونو ومشي من قدامي ،،
انا نسيت جاية لي شنو ومن الخوف رجعت بي دربي ما مصدقة الشفتو هسي ...
يتبع🌷
فاطمة قسم الله✏
