جيت الشركة وقبل اقول بسم الله لقيت استدعي لي ،،
اوووف حا يتفشي فيني الليلة كلها ساعة الغبتها شنو هو ،، ختيت شنطتي وطلعت التشيرت طبقتو وصلحتو كويس وجيت داخلة ليه ،،
رفع راسو عاين لي
ما بدري انتي قايلة الشركة دي بتاعتك تتأخري علي مزاجك ،، احمدي الله اني لي هسي مستحملك ،
انا اسفة بس رجعت البيت اجيب ليك دي نسيتها،،
عاين لي كدا دي كانت وين؟
الصباح وانا طالعة لاقتني البت الشغالة قالت لقتها واقعة في غرفتكم شالتها وغسلتها وانت طلعت بدري ،، كنت عايزة اديها لي عزو بس طلعت من بالي بعد وصلت الشركة رجعت جبتها تاني ،،
واشمعني يعني القومة والقعدة دي في تشيرت عندي غيرو مية ،،
قرب يغمي علي من جواي شنو عندي انت لازم تلبسو ،،
قلت ليه انا اسفة عشان الحصل امس وافتكرت اني اجيب ليك التشيرت دي مبادئ صلح بينا،،
كويس
مديتو ليه..
قال لي دي ريحة شنو الفيه..
قمته ضحكته قلت ليه انا بخرتو ليك بالبخور،، ما انت امس زعلت وما حضرت باقي القعدة كانت فيها بخور رهيييب .. وعايزة ابدا ليك في الونسة ..
بس يا فرحة ما تمت ..
اختصرني وقال لي اوك اوك خير تقدري تمشي مكتبك ..
حاضر
طلعته واتغظت منو اوك اوك قعدت احاكي فيه ،، ما مشكلة بكرا بجيبك لي ،،،
مشيت طوييل لي عزو دخلت بدون استئذان ،، بقي لما يشوفني بهم عديل 😂😂😂
المهم قلت ليه صاحبك دا زعلان شديد مني ف انت لازم تساعدني وتشتري لي ريحة راقية كدا وتديها لي بنية اعتزار مني لانو هسي مشاني وشكلو ما قبل الاعتزار ،،
قال لي ياخ ما انا من الاول كلمتك هسي استفدتي شنو جاية تعتزري تاني ،،
قلت ليه كدا ضميري انبني علي العملتو فيه امس ..
بقي بعاين لي مستغرب ،، ضميرك يا سبحان مغير الاحوال ،، وطيب ضميرك دا ما شايف البتعمليه فيني ؟
عزو قمت ليك عليه طوالي جر واطي لالا اها امري لي الله بجيبا ليك بعدين ،،
وفعلا انتظرتو المساء جاب لي ريحة رهييبة جد انا زاتي عجبتني وبخيت لي بخة منها ،،
دخلت الحمام وجبت لي حقنة ومليتها من الفتيل الاداني ليه الشيخ وفضيتها جوه الريحة ،،
جيت غلفتها جوه صندوق هدايا ،، ووديتها لي عزو وشددت عليه لازم تريحو منها اول انت فاهم ،،
قال لي يابت انتي مالك فجأة قلبتي كدا ما من عوايدك ...
ارتبكت بي كلامو دا ا انا ولا شي ما قلت ليك بس ما صاح العملتو ..
قال لي ما صاح ولا في شي تاني؟
شنو في شنو يعني ولا حاجة ولا حاجة ..
قعد يغني ويطق في اصبعو ..
يا زول انا قلبي حبااك اموووت انا تترارااا رااااا
غاظني طبعا وفووو مشيت وجاني احساس انو قعد يضحك علي بعد طلعته لكن ابيت اتلفت عليه ،،
ما بنكر والله اني بقيت هيمانة بي وضاح بنوم وبصحي بحلم بيه يكون راجلي المستقبلي بس مافي غيرو انا بقيت بحبو وما بقدر استغني عنو ،، والهبلة الاسمها ريل دي مستحيل تعرسو دا زولي انا ...
الايام مشت وعدي اسبوعين ما شايفة حصل شي 😒 صاح معاملتو اتغيرت معاي بقي في شوية احترام لكن مافي تطور ،،
اليوم داك كنت قاعدة في المكتب اتصلت بي شادية اشوف حددو العرس بتين لاني اضاني طقشت من امي انو عقدها بعد اسبوع،، اتصلت بيها يا سجم الرماد مالك قاطعة صوت وصورة مني ،،
وااااي يا لينا شغالة بشتري في الشنطة وتعبانة مووووت ...
اهاااا مش قلت ليك انك ما فيك فايدة امي كلمتني بالصدفة هسي بس جابت لي سيرتك ،،، خلاص بجي عليك بعدين يلا سلام،، قبل اتم جملتي دي سمعت صوت جوطه من وضاح جوه وتررررن الجرس بتاع المكتب عندي ضرب قمت سريع الليلة وووب في شنو مالو قام يتجنن تاني ،،
دقيت الباب ودخلت ليه نعم عايز حاجة ...
اشر لي بي اصبعو وقال لي شوفي هنا الزفت الاسمها ريل دي كان جات تدخل لي تمنعيها ،، فاهمة الكلمة دي ؟
ا اي اي
ومسك التلفون تاني وجاط ،، ما انا البتطلعي بي جو يا ريل اعتبري البينا خلص خلاص استحملت قرفك ودلعك وكبريائك الما عايزة تتنازلي عنو ،، غلطانة في حقي انا البراضيك ،، علي مزاجك تعملي الحاجة وانا اخر من يعلم ،، ما عرفت انا الراجل ولا انتي ،، تعبته انا خلاص وكل مرة بقول معليش بكرا بتتعلم بكرا بتتعلم بس ما باين نهائي ،، وطق جدع ليك التلفون دا هناك كشش كل حتة مشت براها لما نطيت انا زاتي معاه ...
المكتب بقي ليك صااااان ولا صوت ما فيه انسحبت براحة مشيت المطبخ عملت ليه ليمون بي نعناع وجيت داخلة براحة خايفة يجوط فيني وهو معصب كدا البقدر عليه منو ،، ختيتو ليه من سكات قدامو وعايزة امشي ،،
لينا ممكن نطلع نتغدا مع بعض الليلة؟....
يتبع🌷
فاطمة قسم الله✏
