ما قعدنا كتير مع ناس خالي،،زي نص ساعة امي كلمتو بي موضوعي وهو عارف اني ما تميت جامعتي ،، قال الموضوع صعب لكن هو محتاج سكرتيرة لي موظف تمت ترقيتو في الشركة يمسك ادارة قسم ،، قال لي حا اخلي عزو يدربك لانو ماسك تدريب الموظفين في الشركة ( من جواي ولدك الاهبل دا سبحان الله ) وتانيا قال لي لازم تقري كورس سكرتارية ،، قلت ليه يا خالو بس انت عارف ظرف ابوي كيف ،، قال لي امي انتي بتك الايام دي عايزاها في البيت ،، طبعا استغربته من كلامو ،، امي قالت ليه لالا لو عايزنها شيلوها ارتاح انا زاتي من قلة ادبا ووجع الراس العاملاه لي كل يوم ،، قلت ليها كدا يا امي ياتو يوم انا عاملة ليك ازعاج وبديت في النقة ،، بس جاتني ليك نهرة حارة من خالي تممم سكته ولا حرف ما رديتو ..
خلاص من الليلة قاعدة معانا منها تنزل الكورس وعزو يوريها الشغل ،،
بس يا خالو ا انا..
في شنو مالك ؟
لا مافي حاجة كنت عايزة امشي البيت واجيب حاجاتي ، ،
قال لي الحاجات حا تطير يعني عندك نينا البسي منها
( بتك البكبوظة دي هدومها بتلبسني شوال ) خفت من خالي وتجيني نهرة تانية ،، حاضر يا خالو ..
امي طلعت مشي عزو يوصلها البيت ،، وانا ما بيت خالي عادي يعني زي بيتنا جيت داخلة غرفة نينا لقيتا كالعادة مالية السرير كلو وشغالة تاكل دي اكلت التلاجة كلها ،،
لينا تعالي تعالي احضري معاي الفلم دا رهييييب بتاع سيلينا ،،
قلت ليها شنو طبعا انا لا عندي شغلة بي تلفزيون ، ولا عارفة اسماء الممثلين ولا مسلسلات ولا غيرو ،، كنت فاضية هو من يا بيت امسكني يا بيت فكني مع ونسة النسوان والشمارات وقعاد الجبنات ،،
قالت لي يا بت سيلينا غوميز حبيبة جاستن بيبر كانت ،،
عوجت ليها خشمي وما كنت ناقشة حاجة بقيت متنحة فيها ،، ويعني انا اعمل ليها شنو ،،
اووو منك خلاص تعالي احضري معاي الفلم دا ،،
ياخ ما عايزة وبعدين انتي حا تكوني شغالة تاكلي كدا لما تطرشقي ،،
فوووو رب ضربتني بي الجداعة الله يعلم حسيتها قزيفة وقعت فيني لما راسي صدع ،،
حمرت ليك فيها وبدين ضرب ،، الساعة الجرتني وقعدت فيني انا نفسي اتكتم وبقيت شغالة ليها ،،
بي خنقة وصوت تقيل كدا كح كح ن ني نين نينا بتقتلينييي صرخت معاها ،،
ياخ لما قامت مني لا حولا ولا قوة الا بالله ،، وااااي انا كنت حا اموت ،،
طيب اديني شي يكون قدري البسو ،،
هداك الدولاب شوفي براك ..
من فوق لي انك سمينة قطيمة كمان ، .
قرشك قرشك قرشك بقت تاكل في الفشار ولا كاني بتكلم معاها..
فتحت الدولاب اتخلعته بي كمية الهدوم الفيه بقيت افتح ضلفة واقفل ضلفة ،، ما لقيت شي قدري في النهاية رضيت بالامر الواقع وشلت بجامة ،،استحميت وجيت طالعة ،،
نينا انا جيعانة جيبي لي شي اكلو..
وقاااااااه بقت تضحك علي وتعاين لي وتضحك ..
في شنو مالك بتضحكي كدا زي الهبلة ،،
عايني لي روحك في المرايا واتفقعت بالضحك ..
وقفت قدام المرايا النصيحة عاملة زي الارقوز بقيت الهدوم كبااار ومرخرخات فيني ،،
فجاة الباب فتح وتمت ما انا ناقصة هو،، جا عزو داخل واتفقع بالضحك ،، ودا الهبالة مكملا قال الا يصورني ويفضحني في الفيس ،، بقينا نتساكك البيت كلو وانا ماسكة بنطلون البجامة الناصل خايفة يقع ،،
هلكني الكريه جيت قفلت الباب وهاك يا نومة قمته الصباح جسمي واجعني كلو بسبب نينا نومها كعب ..
لبست عبايتي والطرحة وشلت لي شبط من نينا وطلعت مع عزو جايين الشركة اول يوم لي ،،
مع انو نينا اعترضت علي لبسي وكمان حسيت عزو برضو ما رضي اني امشي بالعباية بس ما اشتغلت بيهم عارفني عنيدة وكان طول الطريق ساكت ما اتكلم معاي حرف ...
اول ما دخلنا اتقلب حد تاني حسيتو ما ودخالي الاهبل ،، دا كان واحد جنتل كدا ومسؤل ..
الغاظني انو ما اشتغل بي قال لي اقعد في الرسبشن هنا انتظرو ومشي مني ...
استغربت من تصرفو زي كأنو ما بعرفني بقي ...
تابعوني🌷
فاطمة قسم الله✏
