جيت طالعة بره مكتبي وقعدت انطط اول مبسووطة ،،
ما مصدقة كل شوية اطلع المرايا اعاين لي روحي وبوسة معاها وارجعها تاني مبسوطة ياخ صدقت اني حلوة معناها بقي بعاين لي ،، بقيت بعد في الوقت يمشي نطلع نتغدا ،،
مشيت عملت لي كم شغلانية كدا وجيت راجعة مع فرحتي ديك قعدت اغني وب عليا وب عليا وب وب عليا الريد الريد ،،
كرب الباب فتح ليك..
وااااي ما باقي لي الا ادخل تحت التربيزة ،،
عاين لي ساي قال لي يلا ،،
اتربشت انا زاتي من دون احس قلت ليه بس دقايق ،،
قال لي اوك منتظرك بره ،،
دا مالو مؤدب كدا بقي ،،
معقول مفعول العمل بدا يجيب نتيجة ،، لالا ولا شنو ،،
ما علينا دخلت الحمام وظبت روحي وصلحت مكياجي واتمسحت واتريحت ،،
جيت طلعت معاه العربية ،،
قبل نتحرك عاين لي كدا قال لي بالمناسبة انتي بدون مكياج احلا ما تحاولي تبقي نسخة طبق الاصل من غيرك ،،
حسيت بي احراج وفهمت هو قصد منو ،،
كرب فتح الدرج وطلع مناديل جونسون المبللة ونزل المرايا ومداهم لي ،،
من جواي اتحرقت وولعت نار لكن حكم القوي ،،
قشك قشك قشيت الروج والايلاينر اصلو ما باقي شي ف مسحت وشي كلو مرة واحدة ..
جينا مطعم هادي وحلو كدا طلب اكل وبعدها عصير وايسكريم وميلك شيك ،، لما بطني خلاص قربت تطق ،،
بقينا تاني ساكتين زي الصبت فينا مطرة وتوتري زاد بقيت مدنقرة وبعاين في التربيزة ومرة اجرجر في الاسكيرت واهبش فيه وتاني اهبش في التربيزة ،
جاني صوتو..
لينا تعرسيني؟
شفتو لما الواحدة فجأة تتخلع وتبقي منططة عيونا وفاتحة خشمها ومندهشة بتعاين لا بترمش لا بتتحرك بس انا الساعة ديك كنت كدا ،،
لينا انتي كويسة انتي معاي ،
ا أ اي معاك
سمعتي كلامي ،،
انا قصدك تعرسني عرس عرس يعني اهلي واهلك يكونو عارفين ولا شنو انت بتهظر ،
انتي مجنونة اي عرس عديل بالحلال ،، انا ما قاعد اهظر وجادي في كلامي قلتي شنو،،
سكته ،، لالا هو عايز يغيظ ريل اكيد وانا داير يعملني لعبة عشان يأدبها ،، ولا شنو دا العمل مشي فيه ،، لالا انا ما مصدقة اصلا لما مشيت للشيخ ما كنت مقتنعة بالكلام دا من جواي ،، طيب وموضوع شادية انا اعتبرتو صدفة جات ساي ،، ودا برضو صدفة يعني ،
لينا انتي سكتي مالك في حاجة ،،
ممكن توديني البيت ،،
معليش انا عارف انو الظروف والوقت ما مناسبات وانا بقول ليك الموضوع دا بس بديك لي بكرا منتظر ردك ، يلا اوصلك البيت الوقت اتأخر ،،
فعلا كنت ما مصدقة البحصل دا ،،
جيت البيت دخلت سكتم بكتم لا حس لا خبر ،،
دخلت الغرفة رب وقعت في الكنبة ،،
نينا نينا الحقيني انا عندي هبوط ،
قامت مخلوعة من السرير مالك يابت مسكتني من يدي لقتهم تلج بس ،، لينا مالك انتي شكلك ما طبيعية في شنو ،،
الحقيني يا نينا الليلة ووووب علي انا ما مصدقة الحصل وختيت يدي في راسي ،،
نينا اتخلعت جرت نادت عزو وجات،،
لينا في شنو مالك ،،
وضاح يا عزو؟
بي صوت واحد وخلعة وضاح مالو؟
قال عايز يعرسني ..
تممم ما سمعت ليهم صوت صنو الاتنين ،
فجأة عزو قعد يضحك انت حلمانة ولا بتحلمي شكلو طردك ودي اثر الصدمة واضح عليك ،،
وشال تلفونو رن علي وضاح اشوف ليك زولك قعد طوالي بعد شوية وقال لي مبروك شكلكم انتو الاتنين جنيتو ،،
انتي يا نينا طاااخ ضربتني علي ضهري مبروك لما وقعته علي الارض قعدت اضحك وقلبتها بكي ،،
بقينا التلاتة في الواطا مخلوعين ،، لانو وضاح خاطب ريل وعرسهم تقريبا بعد اسبوع ،، قلت ليه يا عزو انا الليلة سمعتو متشاكل معاها بس ما عارفة في شنو،، وعزمني غدا بره وقال لي كلامو دا ،،
قال لي انا عارف وضاح معناها ريل جابتها كبيرة وهو ما بحب اللف والدوران،،
الليل كلو شلناه نحلل ونفكر ،،
تاني يوم ما مشيت الشغل ما فيني حيل كان لاني ما نمته اصلا كويس ،،
فجاة تلفوني يدق
وضاح يتصل ،،،
خفته الصراحة اول مرة اخاف كدا ،، دا العمل العملتو ليه معقول كلام الناس طلع صحي صحي وانو فعلا الحاجات دي بتمشي في الزول ،، ولا صدفة ،، بس مستحيل تصادف لينا انا وشادية كدا ،،
تاني اتصل ، ،
فتحت الخط
اها قلتي شنو؟
موافقة ...
يتبع🌷
فاطمة قسم الله✏
