جنة ،،،،سلام

الحلقة -11-

جنة ،،،،سلام
بقلم/فراقد حسن علي
،،،،،،،،،،،،،،،،،،،،
البارت -11-

جنات/زين أسمع مني ،وانت شوف واحكم عليه ،وشوف اذا اني مكذبه عليك او لا

-لان انت هسه منقذي ومخلصي من بعد الله فلازم احجيلك كل الحقيقيه

سلام/عفيه عليج كتيهن كلهن

جنات/يمكن جنت نايمه،،فتحت عيوني ثگيله ،،بقيت افتحها واغمضها

-شفت نفسي نايمه على سرير ،،وايدي بيها مغذي ،،بقيت خايفه ،مااعرف مصدومه

-منو اني،،وين اني ،شنو هذا المكان ،،شلون اجيت لهنا،،

-التفت بصفي شباك باوعت أكو ضوه قوي ،،يعني بوقتها كلشي ماچنت اعرف

-التفت للجهه الثانيه شفت نسوان مريضات ونايمات ،،وشي وياها بعد مريه ثانيه اداريها ،،وشي لا اكثر من مريه

-وشفت اكو كم سرير فارغ مابي احد ،،كمت ابجي بس احس الدموع هي وحدها تطلع من عيوني يمكن بوكتها جنت خايفه

-حاولت احرك ايديه ورجليه ماكدرت ،،ردت احجي لو اصيح على وحده من هذني النسوان صوتي مايطلع

-حسيت راسي حيل ثگيل وصارت بي وشه ،،واذاني عبالك بيها صوت مال صفير

-مااكدر احرك جسمي بس احرك راسي والتف على هاي الجهى وهاي الجهى ،،

-بس لاحظت هذني النسوان ماانتبهن اني كعدت مااعرف ليش

-رديت غمضت عيوني،، ماادري نمت ،،ماادري صارت ظلمه ،،مااعرف شكد وقت ،،حسيت واحد يلزم ايدي

-فتحت عيوني واني عبالي بعدني نايمه ،،شفت كدامي ولد شاب لابس ملابس بيضه ،،

-ووخر صونده المغذي وشال الكانونه ،ويريد يحطلي كانونه جديده ،،

-ردت احجي ما يطلع صوتي ،، فطلع صوت هيجي امممممم

-هو عبالك فز وتفاجئ بيه ،،بسرعه تقرب عليه ،،واسمعه يكولي تشوفيني ،،تسمعين صوتي

-صوتي ميطلع حركت راسي ب اي

-شفته طلع بسرعه من الغرفه ،،ورجع وياه مريه وزلم اثنين هم لابسين ابيض

- جوي وتجمعوا يمي والنسوان الي بالغرفه صارن يجن ويباوعن عليه

-واحد من هذوله الزلم ،،شغل شلون الضوه الصغير وخلاه على عيوني ،

-اني غمضت ،،فتح عيني وبقى يباوع بيها ،ورجع فتح الثانيه ،،كال استجابتها جيده ،

-هذا الثاني ،،كالي بابا حركي ايدج لو رجليج ،،اذا تسمعيني

-اشرتله براسي بمعني لا ،،مااكدر

-هو بيده مفتاح شخط رجليه من جوه فزيت،،شخط الثانيه هم فزيت