جنة ،،،،سلام

الحلقة -34-

جنة ،،،،سلام
بقلم/فراقد حسن علي
،،،،،،،،،،،،،،،،،،،،
البارت-34-

جنات/جسمي أنتهى من المهدأت وبعد مااحرك لا ايد ولا رجل بس أسمع نعاوي شيماء وام حسين ودموعي تنزل

عماد/شيماااااااااااااء يووووووولي شيماااااااااء

شيماء/هاااا عماد جيتك

عماد/يوولي جنات نايمه لو صاحيه

شيماء/زرقتها رحاب أبره مهدئه ودأتغفي

عماد/أدخلي جدامي سويلي طريق

شيماء/شكو عماد شبيك مو على بعضك

عماد/هساع بس ادخلي جدامي سويلي طريق

شيماء/جنات صاحيه تسمعيني عماد يريد يتكلم معاج

جنات/مغمضه عيوني ودموعي تنزل ،،اي شيماء كاعده خلي يتفضل

-سمعت خطوات رجليه وصوت طبت بسطاله على الكاع وحسيته واكف فوك راسي

-فتحت عيوني واشوف عيونه مدمعه وملابسه العسكريه كله دم وشعره مخربط واكو أبتسامه شاگه حلگه

عماد/الحمد لله على سلامتج أم جنة

-وگرة عينج بسلامه زلمتج حي يرزق الحمد لله
عايش ويتنفس الهواء

جنات/اباوع عليه واسمع كلامه اريد أفتهم شيكول وشنو وشيحجي عقلي وكف

-بلكوه نهضت روحي ،،حيلي بايد من المهدأت جلبت بي بثنين أيديه من قميصه من يم صدره أشهك وابجي

-عماد بداعت جهالك بداعت حمودي عليك تقشمر عليه وتريد تواسيني لو شنو؟؟!!

شيماء/عماد عليك النبي محمد بس فهمنه شنو سالفه

جنات/شفته ألتفت على شيماء من سألته وهي مو أحسن من حالي تشهك وتبجي وروحها مفرفحه على أخوها

-رد باوع بوجهي ودموعه نزلت على خده بسرعه مسحها يمكن أستحى من عندي

عماد/وداعت حجي صفوان،، ابو جنة مابي شي ،،
وحي يرزق ،،بس عندوا أصابه وان شاء الله سهله

-هساع راشد اتصل وبلغني وتقريبا زلامنة جميعهم جنبوا

ام حسين/ اللهم صل على محمد وال محمد ،،

-دخيلج يالزهره ياام الحسن ماقصرتي صميتي وليدي سلام بجفج المبارك وحفظيته من الشر

-يمه يا سلام ادعيلك دعوة أم ،،ودعوة مرأه غريبه ربي يحفظك ويطول بعمرك ويخليك خيمه على راس هل يتيمه وبتها

جنات/مااعرف شسوي ،مااعرف شلون أتصرف ،بقيت أضحك وابجي حتى المخبل حاله بهذيج اللحظه احسن من حالي

-عماد طلع من الغرفه ولحكته شيماء،،واني بقيت نفس الخبله والله مااعرف اوصف شعوري بهذيج الساعه